Read Maasai Bible – Biblia Sinyati Ilawi 13 Bible Online

Ilawi 13 - Maasai Bible – Biblia Sinyati bible

Ilawi 13

²“Teneeta oltung'ani enetejia to sesen lenye aashu oldututai aashu olpepedoi, neibelekenya aaku enkeeya oo lbolot to lchoni lo sesen lenye, neyakini ninye Aron olapolosani aashu obo loo layiok lenyena lelo apolosak.

³Nejur ilo apolosani ine netii olpepedoi to lchoni lo sesen leilo tung'ani, naa teneibelekenyate ilpapit leine wueji netii olpepedoi lenye, aaiborru, nelioyu ina muoyian etugumo to sesen lenye, naa enkeeya oo lbolot ina. Ore pee eidip olapolosani atujurro ninye, neibalunye ninye ajo oloiduruk.

⁴Kake teneibor ilo pepedoi otii olchoni lo sesen lenye, nelioo ajo eitu eturoyu alang olchoni, neitu eibelekenya ilpapit leine, eitu eturoyu alang olchoni, neitu eibelekenya ilpapit leine aaiborru, neikenoo olapolosani ilo tamuoyiai nkolong'i naapishana,

⁵neitoki olapolosani ajur ninye te nkolong e naapishana. Naa tenetujurro too nkonyek enyena ina muoyian, neitu eitoki ina muoyian aponari to lchoni neitoki olapolosani aikenoo ninye kulie olong'i naapishana.

⁶Neitoki olapolosani ajur ninye te nkolong e naapishana naa tenetunukunye ilo pepedoi neitu eitoki ina keeya aponari to lchoni, neibalunye olapolosani ajo meiduruk ilo tuung'ani; olpepedoi ake, neituku ninye ilkilani lenyena nesidanu.

⁷Kake teneponari ilo pepedoi to lchoni lo sesen, ina kata eidipa aitoduaai kewan to lapolosani te nkitukuoto enye; neigil ninye alotu dukuya olapolosani;

⁸nejur olapolosani ninye, naa tenetubulayie ilo pepedoi to lchoni lo sesen lenye, netum olapolosani aibalunye nchere keiduruk naa enkeeya oo lbolot.

⁹“Teneidimu oltung'ani enkeeya oo lbolot, neyakini ninye olapolosani.

¹⁰Nejur olapolosani ninye, naa tenetii enetejia neibor olchoni lo sesen lenye, neibelekenyate ilpapit leine aaiborru, neiwotiwote ine wueji

¹¹naa enkeeya oo lbolot torrono natijing'a olchoni lo sesen lenye, neibalunye olapolosani ninye ajo keiduruk. Neikenoo olapolosani ilo tung'ani aiwuang'ie to lorere amu keiduruk ninye.

¹²Naa teneipang'u ina keeya oo lbolot to lchoni lo sesen lenye, metaa eibulayie enkeeya oo lbolot olchoni pooki lo sesen leilo tung'ani omuoi ebaiki endukuya o metabaiki nkejek, anaa enadol olapolosani

¹³nejur olapolosani ninye, naa teneibulayie ina keeya oo lbolot osesen lenye, pooki neibalunye ninye ajo eisidai meiduruk teina muoyian; eibelekenye pooki aiborru, metaa meiduruk ninye.

¹⁴Kake tenelioyu ineeiwotiwotate te ninye, neaku ninye oloiduruk.

¹⁵Nejur olapolosani ine neiwotiote, neibalunye ninye ajo keiduruk. Ore ewueji neiwotiote to sesen naa keiduruk; amu enkeeya oo lbolot.

¹⁶Kake teneitoki ine neiwotiote aibelekenya neiborru, nelotu ilo tung'ani enetii olapolosani,

¹⁷nejur olapolosani ninye, ore ake pee eibelekenya ina keeya aiborru, neibalunye olapolosani ilo tung'ani omuoi ajo meiduruk; keisidai ninye.

¹⁸“Naa tenetii oldututai osesen lo ltung'ani, neishiu,

¹⁹ore ine wueji apa netii oldututai nejing ewueji neibor netejia aashu ewueji oo ltipot ooibor o loo nyokie, nepuoi aaitodol olapolosani,

²⁰nejur olapolosani ine, naa teneliooyu egut alang olchoni lo sesen ore ilpapit leine neibelekenyate aaiborru neibalunye olapolosani ninye ajo keiduruk, enkeeya oo lbolot eeta nayopua ilo dututai.

²¹Kake tenejur olapolosani ine, ore ilpapit leine neitu eiborru neitu egutu alang olchoni lo sesen kake etunukunye, neikenoo olapolosani ninye aiwuang'ie to lorere nkolong'i naapishana;

²²naa teneponari to lchoni lo sesen, netum taa olapolosani aibalunye ninye nchere oloiduruk; netijing'a ninye enkeeya oo lbolot.

²³Kake tenetoni lelo tipot te wueji nebo nemeponari naa enkiporoi ake o ldututai, neibalunye olapolosani ilo tung'ani ajo meiduruk.

²⁴“Naa teneeta osesen ewueji neinosa enkima to lchoni lenye, ore ine wueji neinosa enkima neaku oltipoti onyokie aashu oloibor,

²⁵nejur olapolosani ine, ore pee eibelekenyate ilpapit leine aaiborru netugumo ine alang olchoni lo sesen, naa enkeeya o lbolot, ninye nayopua ina kinosata e nkima, neibalunye olapolosani ilo tung'ani ajo keiduruk, enkeeya oo lbolot ena.

²⁶Kake tenejur olapolosani ine, ore ilpapit leine neitu eiborru neitu egutu alang osesen, kake etunukunye, neikenoo olapolosani ilo tung'ani aiwuang'ie too nkolong'i naapishana.

²⁷Nelotu olapolosani ajur ninye te nkolong e naapishana, naa teneibulayie olchoni lo sesen lenye, neibalunye olapolosani ninye ajo oloiduruk naa keeta, enkeeya oo lbolot.

²⁸Kake teneton ilo tipoti te wueji nebo nemeibulaa osesen, kake etunukunye ake netejia teina kinosata e nkima, neibalunye olapolosani ninye ajo meeta entioto amu enkiporoi enkima ake.

²⁹“Naa teneeta olee anaa enkitok enkeeya te ndukuya anaa to lboony,

³⁰nejur olapolosani ine; ore pee elioyu ine egut alang olchoni lo sesen lenye, ore ilpapit leine naa eisikitok nelamilama, neibalunye olapolosani ninye ajo keiduruk, amu olpepedoi ilo, enkeeya oo lbolot e ndukuya aashu eno lboony.

³¹Naa tenejur olapolosani ina muoyian e ojo, nelioyu ajo megut alang olchoni lo sesen, nemetii ilpapit oorook ine, netum taa olapolosani aikenoi ilo tung'ani oata olpepedoi nkolong'i naapishana.

³²Ore te nkolong e naapishana nejur olapolosani ina keeya naa teneitu eibulaa ilo pepedoi nemetii ilpapit sikitok, nemelio ilo pepedoi etugumo alang olchoni lo sesen,

³³netum taa ilo tung'ani atabarno kewan kake mebarn ilo pepedoi. Neitoki olapolosani aikenoo ilo tung'ani oata olpepedoi kulie olong'i naapishana.

³⁴Ore te nkolong e naapishana neitoki olapolosani ajur ilo pepedoi, naa teneitu eibulaa ilo pepedoi osesen nelioyu ajo megut alang olchoni lo sesen neibalunye olapolosani ajo meiduruk ilo tung'ani neituku ninye ilkilani lenyena, nesidanu.

³⁵Kake teneibulayie ilo pepedoi osesen eidipaki aaisuja ninye,

³⁶neitoki olapolosani ajur ninye, ore ake pee eibulayie ilo pepedoi osesen lenye, nemeeta tipat pee eitoki olapolosani aing'oru ilpapit sikitok; amu keiduruk ninye

³⁷kake tenetujurruo ilo pepedoi too nkonyek enyena, netubulakita ilpapit oorook neishiuo ilo pepedoi, meeta ninye entioto, neibalunye olapolosani ilo tung'ani ajo meiduruk ninye.

³⁸“Teneeta olee aashu enkitok iltipot to lchoni lo sesen lenye, iltipot ooibor,

³⁹nelo olapolosani ajur, ore lelo tipot lo lchoni lo sesen lenye nemeibor oleng, naa ilgeet ootijing'a osesen lenye; meeta ninye olduruk.

⁴⁰“Teneishunye ilpapit aapuku te ndukuya oltung'ani, naa endukuya ake natukurre, kake meeta ninye olduruk.

⁴¹Naa teneishunye ilpapit lo ltung'ani te nkalo enkomom enye o nkushu, naa endukuya ake natukurre te nkalo enkomom, kake meeta ninye olduruk.

⁴²Kake tenetii ina kurroto e ndukuya aashu ina kurroto enkalo enkomom oloti pepedoi onyokie neibor, naa enkeeya oo lbolot natijing'a enkurroto enye e ndukuya aashu ina kurroto enye enkalo enkomom.

⁴³Nelotu naa olapolosani ajur ilo tung'ani naa tenenyokie neibor ine netejia te nkurroto enye e ndukuya anaa te nelio etiu anaa empukunoto enkeeya oo lbolot to lchoni lo sesen,

⁴⁴naa oltung'ani oata enkeeya oo lbolot ninye, neeta ninye olduruk. Neibalunye olapolosani ninye ajo keiduruk, endukuya etii ina keeya enye.

⁴⁵“Ore ilo tung'ani oata enkeeya oo lbolot nchoo eishop nkilani naapolosa neisho ilpapit le ndukuya enye eisiong'a, neimulumul ninye enkutuk enye ejo, ‘Olduruk, olduruk.’

⁴⁶Nebik ninye aa oltung'ani oata olduruk enkata pooki naba anaa enaata ina keeya; neaku ninye oloata entioto; neton ninye openy te wueji enye tiauluo ilng'oborri.

⁴⁷“Tenejing olduruk le nkeeya oo lbolot atua olkila, aa olkila loo ntare aashu olkila le kitani,

⁴⁸tenaa oloripuno too usin anaa oloo nkarash naapuyiapui, anaa oloo lpapit loo ntare, anaa oloo ndapan, anaa ole pooki toki naitobiruaki too ndapan, anaa ole pooki toki naripuno too ndapan

⁴⁹naa tenelioyu naa enkeeya oo lbolot enyori anaa enyokie to lkila, aa taa olkila oripuno too usin, anaa oloo ntokitin naapuyiapui, anaa oloo lpapit loo ntare, anaa oloo ndapan, anaa ole pooki toki naitobiraki too ndapan, naa enkeeya oo lbolot naa kepuoi aaitodol olapolosani.

⁵⁰Nelo olapolosani ajur ina keeya, neikenoo ina toki naata enkeeya nkolong'i naapishana;

⁵¹neitoki taa alo ajur ina keeya te nkolong e naapishana. Teneibulayie enkeeya ilo kila, oripuno anaa oloo ntokitin naapuyiapui, anaa oloo ndapan o endapana naasishoreki keiduruk ninye.

⁵²Naa kelo ninye apejoo ilo kila, aa oloripuno too usin, aashu oloo ntokitin naapiyaya, anaa oloo lpapit loo ntare anaa ole kitani napuyiapui, anaa pooki toki oo ndapan, amu enkeeya torrono ina, naa kepejori te nkima.

⁵³“Naa tenejur olapolosani, neitu eitoki ina keeya aponari teilo kila oripuno anaa o too ntokitin naapiyaya, anaa oloripuno anaa pooki toki oo ndapan,

⁵⁴netum naa olapolosani aitanapisho meitukui ina toki natijing'a enkeeya neikenoo ninye nkulie olong'i naapishana;

⁵⁵neitoki olapolosani ajur ina toki natijing'a enkeeya ina kata eidipaki aaitukuo. Naa teneitu eibelekenya emua e ilo tipoti le nkeeya, hoo neitu eibulaa ina keeya, naa olduruk; nipejoo iyie ninye te nkima, aa enkalo e oriong etii ilo tipoti le nkeeya oo lbolot aashu ene dukuya.

⁵⁶“Kake tenejur olapolosani, nedol ajo eimisiloyie ilo tipoti eidipaki aaitukuo, netum naa ninye aigeru ilo tipoti aitayu teilo kila, aashu te ndapana, aashu teina naripuno aashu teina oo ntokitin naapiyaya.

⁵⁷Naa teneigil ilo tipoti aliooyu to lkila, oripuno too usin, anaa oloo ntokitin naapiyaya, anaa naaripuno o pooki toki oo ndapan, naa kegira aponari. Nilo apejoo te nkima ina natii enkeeya.

⁵⁸Kake ore ilo kila, oripuno too usin, anaa too ntokitin naapiyaya anaa pooki toki oo ndapan nemeekure etii oltipoti le nkeeya indipa intae aaitukuo, neitokini aaigil aaituku, kat are nesidanu taa.”

⁵⁹Ena naa enkitanapata e nkeeya oo lbolot to lkila loo lpapit loo nkerra aashu le kitani, aa oloripuno aashu oloo ntokitin naapiyaya, aashu enaripuno aashu ae toki oo ndapan, pee eutu tenaa keeta olduruk aashu tenaa meeta olduruk.