Read Maasai Bible – Biblia Sinyati Ilawi 17 Bible Online

Ilawi 17 - Maasai Bible – Biblia Sinyati bible

Ilawi 17

¹Nejoki Olaitoriani Musa,

²“Tiaaki Aron o layiok lenyena o iltung'ana pooki loo Siraeli, Ena bae eitanapishe Olaitoriani.

³Teneyieng ake ninye oltung'ani loo Siraeli olkiteng aashu olker aashu enkine tiatua enkang oo lng'oborri aashu eyieng tiauluo,

⁴nemeyau ninye kutukaji eilo ng'obor le ntumo, pee eishooyo anaa enkishooroto to Laitoriani te dukuya ilo ng'obor lo Laitoriani, neikenakini ilo tung'ani aajo keeta entioto o sarge; eibukoyie ninye osarge; neyae ilo tung'ani aaiwuang'ie tiatua iltung'ana lenyena.

⁵Ore ena naa te nkaraki pee etum iltung'ana loo Siraeli aayau lelo asarri lenye eishu neyaki Olaitoriani teine netii olapolosani te kutukaji ilo ng'obor le ntumo, neyieng ninche anaa ilasarri loo nkishoorot e seriani to Laitoriani.

⁶Nelo olapolosani aisuaaki osarge enchumata o lperere lo lasar lo Laitoriani te kutukaji e ilo ng'obor le ntumo, nepejoo enkurriny metaa esong'ouna narropil to Laitoriani.

⁷Metaa meigil aekata Isiraeli aayiang'aki ilasarri lenye iloiriruani, laa ninche etololoitore. Keaku ena enkitanapata ntarasi te nkaraki ninche tiatua iishoreitin enye pooki.

⁸“Naa tiaaki iyie ninche, ore pooki tung'ani le nkaji oo Siraeli aashu lelo tung'ana omon ooetuo aatoni tiatua ninche oishorua olasar opejori,

⁹nemeyau kutukaji o lng'obor le ntumo, pee epolosaki ninye Olaitoriani; ore ilo tung'ani neiwuang'ieki tiatua iltung'ana lenyena.

¹⁰“Ore pooki tung'ani le nkaji oo Siraeli aashu lelo tung'ana omon ootoni tiatua ninche, te nenya osarge, naing'orie nanu enkomom ai te ngoro ilo tung'ani oinosa osarge, naiwuang'ie ninye tiatua iltung'ana lenyena.

¹¹Amu ore enkishui e ng'ues naa atua osarge etii, naishooyie nanu te nkaraki intae te nchumata olperere lo lasar pee eitobir olning'o lo sotua te nkaraki enkishui inyi amu osarge oitobir olning'o lo sotua, te nkaraki enkishui.

¹²Neaku atiaaka nanu iltung'ana loo Siraeli, meetae oltung'ani tiatua intae onya osarge, nemenya ilo tung'ani omoni oton tiatua intae osarge.

¹³Ore sii pooki tung'ani too ltung'ana loo Siraeli aashu lelo omon ootii atua ninche olo arresh aibung eng'ues aashu emotonyi nainosayu, neng'as aibukoo osarge lenye neitemoo too nkulupuok.

¹⁴“Ore enkishui e pooki toki naishu naa osarge lenye etii. Neaku atiaaka nanu iltung'ana loo Siraeli, eminya ake osarge li ae toki ake ninye pooki, amu ore enkishui e pooki toki naishu naa osarge lenye etii. Ore pooki ng'ae onya osarge neiwuang'ieki ninye.

¹⁵Ore pooki tung'ani onya eng'ues natua openy aashu enataara ilowuarak te ntim, aa oinoti aashu olomoni oidurrua, nelo ninye aituku ilkilani lenyena, neisuj osesen lenye te nkare, neton ninye eeta olduruk o metaa teipa, netum taa atisidana.

¹⁶Kake tenemeituku ninye ilkilani lenyena anaa eituku osesen lenye nenap ninye entorroni enye.”