Read Maasai Bible – Biblia Sinyati Ilawi 2 Bible Online

Ilawi 2 - Maasai Bible – Biblia Sinyati bible

Ilawi 2

¹“Teneyau ake oltung'ani enkishorunoto e ntapa anaa olasar to Laitoriani, naa keaku ina kishorunoto enye olasar le ntapa napuyiapui, nebukoki ninye eilata ina tapa, nepik enkorropil oriong ninye,

²neyaki ilayiok le Aron lelo apolosak. Neitayu olapolosani teina tapa napuyiapui emborei e nkaina eina tapa o eilata tenebo enkorropil pooki, nepejoo olapolosani ena metaa endamunoto te nchumata olperere lo lasar, olasar le nkima, esong'ouna narropil to Laitoriani.

³Ore entapa natelekua neaku ene Aron o layiok lenyena. Ninye erubata nasinya aisul too lasarri oopejokini Olaitoriani.

⁴“Tiniyau iyie enkishorunoto e ntapa natapejoki to ljiko opising'a, aaitaa olasar, naa keishiaa paa imukateni neitu eisuishieki e ntapa napuyiapui naipurjaki te ilata aashu imukateni naabebek nemeisiusho neitu eelieki eilata.

⁵Naa tenaa ore enkishorunoto ino naa olasar le ntapa nateyiaraki te moti, nchoo eaku ole ntapa sidai neitu eisuishieki, naipurjaki te eilata.

⁶Tebela intaa imbelibelat nibukoki eilata oriong enye; olasar le ntapa ninye.

⁷Naa tenaa ore enkishorunoto ino naa olasar le ntapa nateyiaraki te moti, nchoo eitobiruni te ntapa o eilata.

⁸Naa iyau iyie ina kishorunoto e ntapa naitobiraki te kuna tokitin ayaki Olaitoriani; ore ake pee eitarasakini olapolosani, neyau ninye ilo perere lo lasar.

⁹Neya olapolosani teina kishooroto e ntapa ina rubata endamunoto, nepejoo ina rubata te nchumata o lperere lo lasar, olasar le nkima, esong'ouna narropil to Laitoriani.

¹⁰Ore entoki natelekua te ilo asar le ntapa neaku ene Aron o layiok lenyena; erubata naa ninye nasinya aisul o lasar opejokini te nkima Olaitoriani.

¹¹“Meetae enkishooroto e ntapa nayakini Olaitoriani naitobiruni te ntoki naisuisho, amu mepejokini Olaitoriani te nkima entoki naisuisho aashu pooki aisho anaa olasar le nkima.

¹²Ore anaa enkishorunoto oo lng'anayio le dukuya indimidimi intae aayaki ninche Olaitoriani, kake meishoori ninche te nchumata olperere lo lasar aaitaa esong'ouna narropil.

¹³Tipika nena kishoorot inono pooki e ntapa emunyan, nimincho ake eaku metii emunyan o lning'o lo osotua lino o Enkai ino o lasar lino le ntapa; ore too nkishoorot inono pooki nchooi emunyan.

¹⁴“Teninchooyo iyie enkishooroto e ntapa oo lng'anayio le dukuya aisho Olaitoriani, ninchooyo iyie anaa olasar le ntapa loo lng'anayio le dukuya, ina tapa naidong'oki naing'uaa ilukuny e ntapa naatisilaki te nkima.

¹⁵Nibukoki iyie eilata oriong ninye, ninteleiki enkorropil oriong enye, olasar le ntapa ninye.

¹⁶Nepejoo olapolosani anaa entoki nadamuni, eoroti eina tapa naidong'oki o eilata tenebo o enkorropil pooki; olasar opejokini te nkima Olaitoriani.