Read Maasai Bible – Biblia Sinyati Ilawi 20 Bible Online

Ilawi 20 - Maasai Bible – Biblia Sinyati bible

Ilawi 20

¹Nejoki Olaitoriani Musa,

²“Tiaaki iltung'ana loo Siraeli, ore pooki tung'ani loo ltung'ana loo Siraeli aashu o le lelo omon ooidurrakita aamany atua ninche, oishooyo nabo oo nkera enye aaisho Molek neari metua. Ore iltung'ana lena kop near ninye too soito.

³Nanu kewan oibelekenyakino aipirakinore ilo tung'ani naiwuang'ie nanu ninye tiatua iltung'ana laainei te nkaraki naishooyie nabo oo nkera enyena aisho Molek, nepik enkaji ai entioto neisarkionie enkarna ai sinyati.

⁴Naa teneisudoo iltung'ana leina kop ilo tung'ani ina kata eishooyo nabo oo nkera enyena aisho Molek, neany ear ninye metua,

⁵naibelekenyakino nanu aarare ilo tung'ani naarare olmarei lenye, naitayu nanu ninche aiwuang'ie tiatua iltung'ana lenye, ninye o lelo pooki oosujita ninye te nkiborra oo nkonyek e sujata e Molek.

⁶“Teneibelekenyakino oltung'ani ltung'ana oirorie iloiriruani o lasakutok, aiborrie onyek te ninche, naibelekenyakino nanu ilo tung'ani aarare naitayu nanu ninye aiwuang'ie tiatua iltung'ana lenye.

⁷Entisinya naa ate niakuku sinyat, amu kara nanu Olaitoriani Enkai inyi.

⁸Embung'a nkiguanat aainei, niasiasa ninche, kara nanu Olaitoriani oitisiny intae.

⁹Ore pooki ng'ae odek menye aashu ng'otonye neari metua; etedia ninye menye aashu ng'otonye, neaku ore osarge lenye shumata ninye etii.

¹⁰“Teneloloito oltung'ani te nkitok o lelatia enye, ore pokira olee o enkitok natololoitare neari metuata.

¹¹Ore ilo tung'ani oboitare te loloito enkitok e papaai lenye netaboluo nkilani e papaai lenye, ore ninche pokira are neari metuata, ore osarge lenye neaku shumata ninche etii.

¹²Ore olee oboitare enkitok o layioni lenye, neari pokira are metuata; etaasa ninche embae busus, ore osarge lenye neaku shumata ninche etii.

¹³Teneboitare olee olikae lee anaa enkitok, ore ninche pokira netaasa olminong, naa keari ninche metuata, ore osarge lenye neaku shumata ninche etii.

¹⁴Teneyam oltung'ani entito o ng'otonye tenebo, naa entorroni ina, naa kepejori ninche te nkima, ilo lee o nena kituaak, pee meitoki esuujisho atii atua intae.

¹⁵Teneboitare oltung'ani eng'ues aloloitore, neari ninye metua, ore ina ng'ues neari metua.

¹⁶Teneing'oru enkitok eng'ues aboitare te loloito neari ina kitok metua, ore ina ng'ues neari ninye metua, ore osarge lenye neaku shumata ninche etii.

¹⁷“Teneyam oltung'ani enkanashe enye, ina nang'arie menye, aashu enkanashe nang'arie kina, nelo ninye aboitare nedol olee emasipaisho enye nedol entito emasipaisho olee naa embae e sulare ina, naa keiwuang'ieki ninche te dukuya nkera o lorere lenye. Etaboluo ninye nkilani enkanashe enye, naa kenap ninye entorroni enye.

¹⁸Teneboitare olee enkitok eeta ilkilani, nebolu nkilani enyena, netusula ninye erukunoto enye, neitalioo ninye erukunoto osarge lenye. Ore ninche pokira are naa keiwuang'ieki tiatua iltung'ana lenye.

¹⁹Mintalioo ake emasipaisho enkanashe yieyioo lino aashu ene nkanashe papaai lino, amu ore ina naa nkilani itooruo oltung'ani le sotua lo lmarei; naa kenap ninche entorroni enye.

²⁰Teneboitare oltung'ani enkitok ole nkapu lenye, naa kenap ninche eng'oki enye, neye eitu etum inkera.

²¹Teneya oltung'ani enkitok o lalashe lenye naa embae nemesinya ina netaboluo ninye nkilani o lalashe lenye nemetum ninche inkera.

²²“Embung'a naa nkitanapat aainei pooki o nkiguanat aainei pooki, niasiasa ninche paa ore ina kop nariku nanu intae entamany nemelopu intae aitayu.

²³Nimipuopuo aasujaa olkerreti leilo orere laaraa nanu te dukuya intae, amu etaasa apa ninche kuna baa pooki naibayie nanu ninche.

²⁴Kake atiaaka nanu intae, ‘Ijung'ujung'u intae enkop enye, naa kaisho nanu intae metaa eninyi, ina kop naruko kule o naishi.’ Kara nanu Olaitoriani Enkai inyi, otirishua intae aitung'uaa loreren.

²⁵Enoto naa entirishu eng'ues nasinyari o enemesinyari, o te motonyi nasinyari o enemesinyari, emindurukie naa ate te ng'ues aashu emotonyi aashu tiae toki naikurtutari te nkop, apa natorishie nanu intae nchere mesinyari.

²⁶Entaa intae sinyat te nkaraki nanu; amu ore nanu Olaitoriani naa kara sinyati natirishua intae aitung'uaa iloreren, pee itumutumu aataa ilaainei.

²⁷“Ore olee aashu enkitok nairorie oltung'ani otua aashu esakutisho neari metua, neari ninche too soito, ore osarge lenye neaku shumata ninche etii.”