Read Maasai Bible – Biblia Sinyati Ilawi 21 Bible Online

Ilawi 21 - Maasai Bible – Biblia Sinyati bible

Ilawi 21

¹Nejoki Olaitoriani Musa, “Irorie ilapolosak, lelo ayiok le Aron nijoki ninche, meetae olapolosani oisarkionie kewan to ltung'ani otua tiatua iltung'ana lenye,

²meteleku ake to ltung'ani le sotua lo lmarei, aa ng'otonye, aa papaai lenye aa olayioni lenye, aa entito enye, aa o lalashe lenye,

³aashu eselenkei anashe enye nemeyiolo olee neitu eyami naa ninye oing'orita amu meeta olpayian. Ore teina neidim ninye aisarkionie kewan.

⁴Nemepik kewan olduruk tenaa kitok tiatua iltung'ana lenyena, metaa keidurukie kewan.

⁵Nemepik ilapolosak nkurrot ilukuny enye nemebarn mbat oo lmunyo lenye aashu edung'udung iseseni lenye.

⁶Keaku ninche sinyat te nkaraki Enkai enye, nemeisarkionie enkarna e Nkai enye, keitarasaa ninche ilasarri te nkima aaitarasaki Olaitoriani, ina mukate e Nkai enye; metaa keaku ninche sinyat.

⁷Nemeyam ninche emulayoi, aashu enkitok naisarkionieki, aashu enkitok natung'uayie olpayian lenye, amu ore olapolosani naa eisinyati te nkaraki Enkai enye.

⁸Intisinya ninye, amu keitarasaa ninye emukate e Nkai ino; keaku ninye sinyati te iyie, amu ore nanu Olaitoriani ilo likintisiny, kara sinyati.

⁹Ore entito e pooki apolosani teneisarkionie kewan neiborrie onyek naa papaai lenye eisarkionie nepejori ninye te nkima.

¹⁰“Ore olapolosani ora kitok tiatua ilalashera lenyena, otubukokoki endukuya enye eilata aaput neitisinyaki meishopo ilkilani nemeisho olpapita le ndukuya enye meisiong'ayu aashu epolos ilkilani lenyena.

¹¹Nemelo ninye ayiaya osesen lo ltung'ani otua, aashu epik kewan entioto te papaai lenye aashu te ng'otonye;

¹²nemeipang ninye alo tiatua ewueji sinyati, aashu eisarkionie ewueji sinyati e Nkai enye; amu ore ina kitisinyata e mbukokinoto e ilata naputishoreki e Nkai enye netii shumata ninye. Kara nanu Olaitoriani.

¹³Naa keyam ninye eselenkei nemeyiolo olee aitaa enkitok.

¹⁴Ore enkoliai, aashu enatung'uayie olpayian lenye aashu enaisarkionieki aashu emulayoi, ore kuna meeyam ninye; kake nchoo ninye eyam eselenkei nemeyiolo olee naa enolorere lenye;

¹⁵pee meisarkionie ake eishoi tiatua olorere lenye; amu kara nanu Olaitoriani oitisiny ninye.”

¹⁶Neitoki Olaitoriani ajoki Musa,

¹⁷“Tiaaki Aron, meetae hoo obo tiatua eishoi ino too ishooritin enye pooki oata entioto oidim atinyiku aitarasai emukate e Nkai enye.

¹⁸Amu meetae oltung'ani oata entioto oidim atinyiku, oltung'ani modooni aashu olmaima, oltung'ani tarrush aashu olemelulung'a osesen.

¹⁹Oltung'ani ogila enkeju aashu ologila enkaina,

²⁰anaa oloruja enkoriong, anaa olkorriot lemebulu, anaa oloata oltialei anaa oloata ilpepedo, anaa oloata ilbolot to sesen lenye anaa oloidong'oki aaitaa osunash.

²¹Meetae oltung'ani le ishoi e Aron ilo apolosani oata eleyiata oidim atinyiku aitarasai nkishoorot o Laitoriani naapejori te nkima. Ore amu keeta naa eleyiata menyiku ninye alotu aitarasaa emukate e Nkai enye.

²²Ekeidim ninye ainosa emukate e Nkai enye eine wueji sinyati aisul o enoo ntokitin sinyat,

²³kake melotu ninye ataaniki olkarasha lo lodung'oro le wueji sinyati aashu ataaniki olperere lo lasar, amu keeta ninye eleyiata, pee melotu ninye aisarkionie iwuejitin aainei sinyat; amu kara nanu Olaitoriani oitisiny ninche.”

²⁴Kuna etiaaka Musa Aron o layiok lenyena o ltung'ana pooki loo Siraeli.