Read Maasai Bible – Biblia Sinyati Ilawi 23 Bible Online

Ilawi 23 - Maasai Bible – Biblia Sinyati bible

Ilawi 23

¹Nejoki Olaitoriani Musa,

²“Tiaaki iltung'ana loo Siraeli, ore lelo siruai gelunot lo Laitoriani, nilimunyenye aaibalunye nchere iumat sinyat lelo siruai laainei, kulo ninche isiruai gelunot naa ninche kulo.

³Nkolong'i ile easi esiaai, kake ore te nkolong e naapishana naa enkolong e Sabato naitirring'ae aayeng'iyeng'a, eumata sinyati, miasiasa intae esiaai ina olong. Sabato ina to Laitoriani tiatua imanyishoritin inyi pooki.

⁴Kulo ninche lelo siruai oogeluno to Laitoriani, nena umat naasinya, naa ninche ipuopuo aalimu aaibalunye too nkatitin enye naategelakaki ninche.

⁵“Ore to lapa le dukuya te nkolong e tomon oong'uan o lapa, teipa, naa Pasaka o Laitoriani.

⁶Naa ore te nkolong e tomon o imiet eilo apa ake naa osirua loo mukateni neitu eisuishieki to Laitoriani, ninyanya intae imukateni neitu eisuishieki nkolong'i naapishana.

⁷Ore te nkolong e dukuya nintayuyu eumata sinyati, nimiasiasa esiaai nagol.

⁸Kake intarasaa ilasarri te nkima aaitarasaki Olaitoriani nkolong'i naapishana. Ore te nkolong e naapishana naa eumata sinyati, nimiasiasa esiaai nagol.”

⁹Nejoki Olaitoriani Musa,

¹⁰“Tiaaki iltung'ana loo Siraeli tenipuonunu kenya atua ina kop naisho nanu intae ninkesikese ilng'anayio lenyena, eyaki intae irridat loo lng'anayio le dukuya le nkikesare olapolosani.

¹¹Nelo ninye ayuk ilo rridati te dukuya Olaitoriani, pee itumutumu aanoto eng'amaroto. Ore pee ekenyu etulusoyie Sabato neyuk olapolosani ilo rridati.

¹²Naa ore ina olong niyukuyuku ilo rridati, nipolososo olkuoo le ker lo lari obo lemeeta entioto anaa olasar opejokini Olaitoriani.

¹³Ore ilo asar le ntapa opudakini naa irubat are e tomon e efa e ntapa napuyiapui naipurjaki te ilata, pee eitayunyeki olasar opejokini te nkima Olaitoriani, esong'ouna narropil o lasar le ntoki naoki tenebo ninye naa enaisho oo sabibu, erubata e ong'uan e tomon ninye.

¹⁴Niminyanya intae imukateni aashu ilpaek ootoito aashu ilooshal ometabau ina olong, ometaba anaa niyauu ilasarri le Nkai inyi. Enkitanapata ena oo ntarasi tiatua iishoritin inyi too manyishoritin inyi pooki.

¹⁵“Ninkenikene intae ebaiki ina akenya etulusoyie Sabato, ebaiki ina akenya apa niyautua orridati lo lasar oyuki wikii naapishana naalulung'a.

¹⁶Enkena nkolong'i onom ometabaiki ina akenya nasuju Sabato e naapishana, nitumutumu taa aaitarasaki olasar leina tapa ng'ejuk Olaitoriani.

¹⁷Niyauu intae tiatua imanyishoritin inyi imukateni are pee eyuki, naaitobirunyeki irubat are tiatua e tomon e Efa, naa ine ntapa napuyiapui, naa kepeji ninche tenebo enkisuishoi anaa ilng'anayio le dukuya ooishori Olaitoriani.

¹⁸Nintarasaa intae tenebo nena mukateni ilkuoo le kerra oopishana lo lari obo lemeeta ntioot o loti oing'oni obo o lmeregeshi oaare, neaku ninche olasar opejokini Olaitoriani te nkima tenebo o lasar lenye le ntapa o lasarri lenye ooki, anaa olasar opejori, esong'ouna narropil to Laitoriani.

¹⁹Nipolososo ositima obo le kine metaa olasar le ng'oki o lkuoo oaare le kerra lo lari obo anaa lasarri le seriani.

²⁰Neyuk olapolosani ninche tenebo ina mukate oo lng'anayio le dukuya anaa olasar oyuki te dukuya Olaitoriani, tenebo lelo kuoo oaare le kerra, neaku ninche sinyat to Laitoriani te nkaraki olapolosani.

²¹Nilimu aibalunye ina olong nintayuyu eumata sinyati, nimiasiasa esiaai nagol. Enkitanapata ena ntarasi tiatua imanyishoritin inyi pooki, tiatua iishoritin inyi.

²²“Naa teninkesikese intae nkurman inyi niminkesikese aaitabaiki nkiting'ot, nimisotisoto ina natelekua te nkurma nitudung'o te nkikesare entung'uai ninche te nkaraki olaisinani o lomoni, Kara nanu Olaitoriani Enkai inyi.”

²³Nejoki Olaitoriani Musa,

²⁴“Tiaaki iltung'ana loo Siraeli. Ore to lapa liopishana te nkolong e dukuya o lapa, nintaa enkolong nayeng'iyeng'ae aaitirring'a, endamunoto nalimuni aaibalunye te oshoto oo sekekuani, eumata sinyati.

²⁵Nimiasiasa esiaai nagol, nintarasakiki Olaitoriani olasar opejori te nkima.”

²⁶Nejoki Olaitoriani Musa,

²⁷“Ore te nkolong e tomon eilo apa liopishana naa enkolong o lning'o lo sotua naa keaku te intae enkata e umata sinyati, naa ieniene ate aaitupukoo nintarasakiki Olaitoriani olasar opejori te nkima.

²⁸Nimiasiasa esiaai teina olong, amu enkolong o lning'o lo sotua, pee eitobiri olning'o lo sotua te nkaraki intae te dukuya Olaitoriani Enkai inyi.

²⁹Amu ore oltung'ani lemeen kewan aitupukoo teina olong neitayuni aaiwuang'ie too ltung'ana le Nkai.

³⁰Ore oloba anaa oloas esiaai teina olong, ore ilo tung'ani naidaikie aiwuang'ie tiatua iltung'ana laainei.

³¹Miasiasa intae esiaai, keaku ina enkitanapata ntarasi tiatua iishoritin too manyishoritin inyi pooki.

³²Keaku te intae enkolong nayeng'iyeng'ae aaitirring'a nieniene ate aaitupukoo. Ore te nkolong e naaudo o lapa, aiteru te nteipa ometabaiki teipa nimbung'ubung'u intae Sabato inyi.”

³³Nejoki Olaitoriani Musa,

³⁴“Tiaaki iltung'ana loo Siraeli. Ore te nkolong e tomon o miet ele apa liopishana o too nkolong'i naapishana naa osirua loo lng'oborri lo Laitoriani.

³⁵Ore te nkolong e dukuya naa keaku eumata sinyati, miasiasa intae esiaai nagol.

³⁶Nkolong'i naapishana intarasaa intae ilasarri oopejori te nkima aaisho Olaitoriani. Ore te nkolong e isiet nimbung'ubung'u eumata sinyati nintarasakiki Olaitoriani olasar opejori te nkima, eumata e seremare ina. Miasiasa intae esiaai nagol.

³⁷“Kulo ninche isiruai oogeluno lo Laitoriani, laa ninche ilimumu aaibalunye anaa iumat naasinya naaitarasakinyeki Olaitoriani ilasarri le nkima, ilassari le nkurma, ilasarri ooki, olasar ake te nkolong enye naishiaakino.

³⁸Ore kulo asarri tenebo nena Sabatoni o Laitoriani o tenebo nkishoorot inyi o tenebo lelo muma linyi pooki, o tenebo nena kishoorot inyi pooki o lpela ninchosho intae Olaitoriani.

³⁹“Ore te nkolong e tomon o miet o lapa liopishana, indipa intae aaiturrurro ilng'anayio le nkop, nipuopuo intae aaibung osirua lo Laitoriani nkolong'i naapishana, neaku enkolong e naapishana enayeng'iyeng'ae aaitirring'a neaku sii enkolong e isiet enayeng'iyeng'ae aaitirring'a.

⁴⁰Nintayuyu intae te nkolong e dukuya ilng'anayio le lelo keek sidain o ilng'osil loo ltuka o ilng'osil lo lchani olit, ning'idayuyu te dukuya Olaitoriani Enkai inyi nkolong'i naapishana.

⁴¹Nimbung'ubung'u intae anaa osirua lo Laitoriani nkolong'i naapishana tiatua olari. Enkitanapata ena oo ntarasi tiatua iishoritin inyi pooki, imbung'ubung'u intae ina to lapa liopishana.

⁴²Nitonini too lng'oborri nkolong'i naapishana, ore lelo pooki ooikino enkop oo Siraeli netoni too lng'oborri,

⁴³pee etum iishoritin inyi aatayiolo nchere aishoo nanu iltung'ana loo Siraeli metotoni too lng'oborri ina kata apa ayau ninche aipang'unye te nkop e Misiri. Kara nanu Olaitoriani Enkai inyi.”

⁴⁴Neiko Musa neijia aibalakinye iltung'ana loo Siraeli isiruai oogeluno to Laitoriani.