Read Maasai Bible – Biblia Sinyati Ilawi 6 Bible Online

Ilawi 6 - Maasai Bible – Biblia Sinyati bible

Ilawi 6

¹Nejoki Olaitoriani Musa,

²“Tenelo ake neas oltung'ani eng'oki, neas embae naainyal enkirukoto tialo Olaitoriani, alej ole latia enye too mpisai naashumi aashu te mbae natoning'okinoteki aashu aikonyaa, aashu aitorogony ole latia enye

³aashu adumu entoki naimina nelejishore anya olmumai le lejare, tiae nabo oo mbaa naas iltung'ana netaasa eng'oki teina.

⁴Teneaku etaasa oltung'ani eng'oki neaku oloitarruoyie nerrinyu ninye ina toki nawa te nkikonyare, aashu ina nanoto te nkitorogonyata, aashu ina naishooki ninye meiteng'ela, aashu ina toki apa naimina natudumua ninye,

⁵aashu ae toki ake ninye nainosie ninye olmumai le lejare; nerrinyu ninye elulung'a neponiki erubata e imiet, neisho olopeny, teina olong o lasar le nkitarruorroto enye.

⁶Naa keyaki ninye olapolosani olasar lenye le nkitarruorroto, aisho Olaitoriani olmeregesh lemeeta entioto aitayu tiatua eluaata enye, nedung'oki olapolosani enkinyiang'a nchere keiririkino olasar le nkitarruorroto.

⁷Neitobir olapolosani olning'o lo sotua te nkaraki ninye te dukuya Olaitoriani, naa kepalakini ninye te pooki bae naba anaa enataasa oltung'ani neaku oloitarruoyie.”

⁸Nejoki Olaitoriani Musa,

⁹“Intanapa Aron o layiok lenyena, tiaaki, Ena enkitanapata o lasar opejori. Ore ilo asar opejori neton te nchumata oo ng'esherreta o lperere lo lasar enkewarie pooki o mekenyu, ore enkima o lperere lo lasar neishori metobiko eyupuyup te nchumata enye.

¹⁰Neishop olapolosani olkila lenye le kitani napuyiapui neishop enkila e atua e kitani napuyiapui, neitayu taa nena kuruon eilo asar otumuta enkima etapejoyioki to lperere lo lasar, nepik ninche embata olperere lo lasar.

¹¹Neitoki aitayu nena kilani naaishopito neishop kulie kilani, nenap nena kuruon aya auluo ilng'oborri ewueji nemeiduruk.

¹²Ore ina kima o lperere lo lasar nepali meyupuyupo, meishori metua, nepik olapolosani ilkeek enkima anaake tadekenya, neirragie ilo asar opejori aiteleiki aitobiraki, nepejoo te nchumata enye enkurriny eilo asar le seriani.

¹³Neishori enkima meyupuyupo te shumata olperere lo lasar nkatitin pooki, meishori metua.

¹⁴“Ena enkitanapata o lasar le ntapa. Ilayiok le Aron ooishooyo te dukuya Olaitoriani, te dukuya ilo perere lo lasar.

¹⁵Keitayu obo emborei e nkaina eina tapa napuyiapui o lasar le ntapa tenebo o eilata o enkorropil pooki natii enchumata eina tapa o lasar, nepejoo ena metaa erubata nadamuni te nchumata olperere lo lasar, esong'ouna narropil to Laitoriani.

¹⁶Ore enkae pooki nenya Aron o layiok lenyena, nenyae ninye eitu eisuishieki tiatua ewueji sinyati, tiatua olgoriet leilo ng'obor le ntumo nenya ninche.

¹⁷Nemepejieki ena tapa entoki naisuisho. Aishoo nanu ilapolosak metaa erubata enye to lasar lai opejori te nkima, entoki ena nasinya oleng naikununo anaa olasar le ng'oki o lasar le nkitarruorroto.

¹⁸Keidim pooki lee too layiok le Aron ainosa ninye, anaa enaibalunyeki ntarasi tiatua iishoritin inyi pooki, tialo ilasarri lo Laitoriani oopejori te nkima, ore oloba anaa oloiseyie ninche neaku sinyati.”

¹⁹Nejoki Olaitoriani Musa,

²⁰“Ele ninye olasar oisho Aron o layiok lenyena Olaitoriani teina olong nabukokini ninye eilata aaput: ematua e tomon e efa e ntapa napuyiapui metaa olasar le ntapa li anaake, olpisiai lenye tadekenya o likae pisiai teipa.

²¹Neitobiruni te ilata, teina moti nayierishoreki, niyau iyie eipurjaki aaitobiraki, too rubat naatapejoki anaa olasar le ntapa, ninchooyo anaa esong'ouna narropil to Laitoriani.

²²Ore ilo apolosani tiatua ilayiok le Aron, laa ninye etubukokoki eilata aaput pee etonie olorika lenye, neitarasaki ninye Olaitoriani anaa apa enaibalunyeki ntarasi, nepejori pooki.

²³Ore pooki asar le ntapa lo lapolosani naa kepejori pooki, menyae ninye.”

²⁴Nejoki Olaitoriani Musa,

²⁵“Tiaaki Aron o layiok lenyena, ena enkitanapata o lasar le ng'oki. Ore te wueji neteyieng'ieki olasar opejori, neyieng'i ilo asar le ng'oki te dukuya Olaitoriani, naa kesinya ninye oleng.

²⁶Ore ilo apolosani oishooyo olasar te nkaraki eng'oki nenya ninye, nenya ninye tiatua ine wueji sinyati, tiatua olgoriet lo lng'obor le ntumo.

²⁷Ore pooki toki naiseyie inkiri eilo asar neaku sinyati, naa tenelo neisuaakino osarge lenye olkila, nintuku iyie ilo sarge tiatua ewueji sinyati.

²⁸Ore ina moti oo nkulupuok nateyierieki inkiri, nerrarri, kake tenaa emoti o suyai eteyierieki neiutuuti ina, neitukui te nkare.

²⁹Keidim pooki lee tiatua ilapolosak ainosa ilo asar, entoki nasinya ena oleng.

³⁰Kake meetae olasar le ng'oki onyae inkiri eyawuaki osarge lenye atua olng'obor le ntumo pee eitobiri olning'o lo sotua tiatua ine wueji sinyati, kepejori ninye te nkima.”