Read Maasai Bible – Biblia Sinyati Yeremia 14 Bible Online

Yeremia 14 - Maasai Bible – Biblia Sinyati bible

Yeremia 14

¹Ele rorei lo Laitoriani oewuo enetii Yeremia eipirta olameyu:

²“Eishirita Yuda neishirita nkanas enyena; neishir iltung'ana lenyena etoni te nkop neilep olkiyioi le Yerusalem alo shumata.

³Ore lelo kituaak lenyena neirriwaa isinkan lenye meyau enkare; nepuonu ninche nchorroi nelau ninche enkare, nerrinyo ninche too motioo neemeti ae toki, etukurrutua ninche neidang'a neimulumul ilukuny enye.

⁴Ore te nkaraki enkop natabee, te nkaraki neitu eshaiki enchan enkop netukurrutua ilaramatak, neimulumul ilukuny enye.

⁵Keituraa ninye enkolii enkuo enye amu meetae nkujit.

⁶Neitashe isirkon ti ong'ata too nkisiashat naaika, neipang'ipang aaok enkijape anaa mbariak neiliilaa nkonyek enye, amu meetae nkujit.

⁷Ore hoo neishakenoki iyiook entorroni ang, taasa, iyie Olaitoriani te nkaraki enkarna ino, amu eikumok nchukot ang e siadi, kitaasa iyiook ing'ok tialo iyie.

⁸Iyie osiligi le Israel, Olaitajeunoni lenye te nkata e nyamali kainyoo iyie pee itiu anaa olomoni te nkop, anaa olalotoni oun olng'obor lenye te nkaraki enkewarie.

⁹Kainyoo iyie pee itiu anaa oltung'ani oidang'a, anaa oltung'ani ogol lemeidim aitajeu? Ore eyia, iyie Olaitoriani, itii empolos ang, neipotoki iyiook te nkarna ino; ming'uaa iyiook.

¹⁰Nji ejo Olaitoriani tialo kulo tung'ana: ‘Etonyorra ninche aaidapashari aaiko nji, eitu ninche eibooyo nkejek enye; neaku meng'amu ninche Olaitoriani, kedamu ninye entorroni enye neitame ing'ok enye.’ ”

¹¹Naajoki nanu Olaitoriani, “Miomon te nkaraki olmabarishoi[3] le kulo tung'ana.

¹²Ore hoo neen ate aaitupukoo, maning nanu olkiyioi lenye, naa ore hoo neishoru ninche ilasarri oopejori o lasar le ntapa, mang'amu nanu ninche; kake kamut nanu ninche to lalem o to lameyu o tolmeitai.”

¹³Najo nanu; “Oi Olaitoriani Enkai, ng'ura, ejoki iloibonok ninche, ‘Midolidolo intae olalem aashu itumutumu olameyu, kake kaisho nanu intae eseriani nadede tiatua ene wueji.’

¹⁴Naajoki nanu Olaitoriani: ‘Elejare eibonu lelo oibonok te nkarna ai: eitu nanu airriwaa ninche, neitu nanu aitanap ninche aashu airorie ninche. Kimbonokito ninche iyie enduaata e lejare o enaibon e pesho o elejare oo ndamunot enye.

¹⁵Metaa nji ejo Olaitoriani tialo lelo oibonok ooibonisho te nkarna ai hoo neitu nanu airriwaa ninche o lelo oojo melotu olalem aashu olameyu ena kop: to lalem o to lameyu emuti lelo oibonok.

¹⁶Ore lelo tung'ana laa ninche eibonoki nenang'ari boo tiatua nkoitoi e Yerusalem, pee ear ninche olameyu o lalem, metii hoo obo onukaa ninche o nkituaak enye, o layiok lenye o ntoyie enye. Amu kabukoki nanu entorroni enye shumata ninche.

¹⁷“Tiaaki iyie ninche ele rorei: ‘Nchoo nkonyek aainei enang'ari too lkiyio kewarie o ndama, naa nchoo ninche eaku medung'o aekata, amu ore ina selenkei oo ltung'ana laainei netooshoki aapik olbae sapuk te oshoto sapuk oleng.

¹⁸Tenaipang nanu alo ong'ata, nadol lekua ootaraki to lalem! Tenajing nanu enkang, nadol ilootara olameyu! Amu ore pooki oiboni o lapolosani neas biashara enye te nkop pooki, nemeeta eng'eno.’ ”

¹⁹Olaitoriani itanya iyie Yuda katukul? Ketonyimo oltau lino Sion? Kainyoo iyie pee itoosho iyiook, ometaa meetae olmairo te yiook? King'oru iyiook eseriani, kake meetae esidai naewuo; kisiligu enkata enkishiunoto, naa ng'ura oloputukunyi.

²⁰Kimbalie iyiook entorroni ang, iyie Olaitoriani o entorroni oo loo papa lang, amu kitaasa iyiook eng'oki tialo iyie.

²¹Ore te nkaraki enkarna ino, minturaa iyiook. Mintadou olorika lino le nkitoo; tadamu nimigil olning'o lino lo sotua tenebo iyiook.

²²Ketii kulie tiatua nena aitin e lejare oo loreren naaidim aayau enchan? Aashu tenaa keidim shumata aishoru enkirujuruj? Aimira iyie ninye, Olaitoriani Enkai ang? Kipik iyiook osiligi lang iyie, amu ias iyie kuna baa pooki.