Read Maasai Bible – Biblia Sinyati Yeremia 16 Bible Online

Yeremia 16 - Maasai Bible – Biblia Sinyati bible

Yeremia 16

¹Aarorie Olaitoriani naajoki:

²“Miyamisho aashu iiu ilayiok aashu ntoyie tene wueji.

³Amu nji ejo Olaitoriani tialo ilayiok o ntoyie naaini tene wueji o tialo ntomonok naatoiwutuo ninche o lpayian ooiu ninche tiatua ena kop:

⁴keye ninche too nkeyaitin torrok. Meishirakini ninche, aashu enukari; ketiu ninche anaa emodiei ti oriong enkop, keidak ninche to lalem o to lameyu, ore mpopoki enye neaku endaa too lmotonyi lo loing'ang'e, o too lowuarak le ntim.

⁵“Amu nji ejo Olaitoriani: Mijing enkaji naishirieki, aashu ilo aishir, aashu aishiraki ninche, amu aiwuang'ie nanu eseriani ai te kulo tung'ana, Olaitoriani ojo, enyorrata ai nauno o lng'ur.

⁶Ore pooki, lkituaak o looti naa kepuo aaye tiatua ena kop; nemenukari ninche, nemeetae hoo obo oishiraki ninche aashu edung'udung kewan aashu ebarn kewan te nkaraki ninche.

⁷Nemeetae hoo obo onya emukate eilo oishir, pee eitigir teilo otua; aashu eetae hoo oloisho ninye enkikompe enkitagoloto metooko te nkaraki menye lenye aashu ng'otonye.

⁸Milo iyie atua enkaji osirua aton tenebo ninche; adaa niokisho.

⁹Amu nji ejo Olaitoriani loo lororani, Enkai e Israel: ng'ura kaisho nanu meishunye tene wueji, te dukuya nkonyek inyi o too nkolong'i inyi, oltoilo le ng'ida, oltoilo le nchipai, oltoilo lo loyamisho oltoilo le nayami.

¹⁰“Naa tiniliki iyie kulo tung'ana kulo omon, nikijoki ninche iyie, ‘Kainyoo pee etudung'oko iyiook Olaitoriani ena torroni kitok? Kainyoo entorroni ang? Kainyoo eng'oki nikitaasa iyiook to laitoriani Enkai ang?’

¹¹Nijoki iyie ninche: ‘Te nkaraki naatung'uaitie iloo papaai linyi nanu Olaitoriani ojo, nepuo aasujaa kulie aaitin neisiaai neserem ninche, naaing'uaa nanu neitu eibung enkitanapata ai,

¹²naa ore te nkaraki nitaasa intae entorroni nalang enoo loo papaai linyi, amu ng'ura, etusuja ake pooki ng'ae te intae engolong'u enye torrono, eany aaning nanu;

¹³metaa kanang'aa nanu intae aitung'uaa ena kop apik atua enkop nimiyiololo nemeyiolo apa loo papaai linyi, ore teine nitum taa aisiaayia kulie aitin dama o kewarie, amu maaisho nanu iyie omom!’

¹⁴“Metaa, ng'ura, kepuonu nkolong'i Olaitoriani ojo, nemeitokini aajo, ‘Anaa enaishu Olaitoriani laa ninye oyaua ailepunye iltung'ana le Israel aitung'uaa enkop e Misiri.’

¹⁵Kake ‘Anaa enaishu Olaitoriani laa ninye oyawua iltung'ana loo Siraeli aitung'uaa enkop e moikuape o nkuapi apa pooki naaterewa ninche.’ Amu kayau nanu ninche ashuku meetu enkop apa naishoo loo papaai lenye.

¹⁶“Kairriu nanu ilarreshok kumok loo sinkir, Olaitoriani ojo naa kerresh ninche; ore te siadi nairriu ilang'orok kumok loo ng'uesi, naa keng'or ninche te pooki doinyo o te pooki oigululu o too nchumat oo ndapidapo.

¹⁷Amu etii nkonyek aainei shumata nkoitoi enye pooki, meisudoo ninche te nanu, nemeisudoro entorroni enye too nkonyek aainei.

¹⁸Naa kaitalaku nanu katitin are entorroni enye o eng'oki enye te nkaraki naituruja enkop ai too mpopoki oo nkitaanyaanyukot, neiputa ninche enjung'ore ai nena o lminong lenye.”

¹⁹Olaitoriani, engolon ai naa osempewuet, naa esarunoto ai te nkolong e nyamali enitii iyie epuonu iloreren. Eing'uaa ineeiting'ie enkop nepuonu aajo: “Eitu ejung loo papaai toki neme nkaitin e lejare, o ntokitin e pesho nemeeta dupoto.

²⁰Keidim oltung'ani aitobiraki kewan nkaitin naaguetuno? Ore kuna mme nkaitin!”

²¹“Metaa, ng'ura, kaisho nanu ninche metayiolo, ore ena kata nabo kaisho ninche metayioloito engolon ai o enkidimata ai, naa keyiolou ninche aajo ore enkarna ai naa Olaitoriani.”