Read Maasai Bible – Biblia Sinyati Yeremia 17 Bible Online

Yeremia 17 - Maasai Bible – Biblia Sinyati bible

Yeremia 17

¹“Eigeroki eng'oki e Yuda te nkalamu e sekenkei, eigeroki too ltauja lenye te ntopij e almasi, o too mowuarak oo lpereren lenye loo lasarri.

²Ina kata edamu nkera enye ilpereren lenye loo lasarri o enkai ng'oruoi enye naji Ashera, te mbata e pooki shani onyori o te nchumata e pooki doinyo oado,

³too nchumat oo ldoinyo te nkop naisiasha. Ore karsisisho ino o lchumat linono pooki kaisho metaari anaa enkinyang'a e ng'oki ino, tiatua enkop ino pooki.

⁴Iorore iyie enjung'ore ino apa naaishoo, naa kaaisho nanu iyie isiaayia ilmang'ati linono tiatua enkop nimiyiolo, amu ore te ngoro ai, neinuaaki enkima nayupuyup ntarasi.”

⁵Nji ejo Olaitoriani: “Ediaa oltung'ani oisilig oltung'ani neitaa osesen lo ltung'ani emasaai o larrabal. Ilo oibelekeny oltau lenye aitung'uaa Olaitoriani.

⁶Etiu ninye anaa enkiti shani nabulu olpurkel, nemedol ninye ae sidai elotu. Keton ninye too ooro tiong'ota, te nkop naisukut nememanya.

⁷“Emayiana ilo tung'ani oisilig Olaitoriani, otii osiligi lenye atua Olaitoriani.

⁸Etiu ninye anaa olchani otuunoki te mbata enkare, oreu ntona enyena mbat o lkeju, nemeureishoyu tenelotu enkirowuaj, amu ketoni ake mbenek enyena enyori, nemesi ninye te nkata olameyu, amu meton aekata ninye eiutu eiu ilng'anayio.”

⁹Olalejani oltau alang ntokitin pooki, naa torrono oleng. Kaing'ae oidim atayiolo ninye?

¹⁰“Ore nanu Olaitoriani kajur oltau natem ndamunot, pee aisho pooki tung'ani te risioroto oo nkoitoi enyena te risioroto oo lng'anayio loo nkiaasin enyena.”

¹¹Anaa enkurle naiturrur inkera neitu edanyu, neijia eikununo ilo otum karsisisho kake mme te sipata; ore te mpolos oo nkolong'i enyena neing'uaa ninche ninye, ore te nkiting'oto enye neaku olmodai.

¹²Olorika le nkitoo le nkisisa otipikaki apa shumata ebaiki enkiterunoto, ninye ewueji ang sinyati.

¹³Iyie Olaitoriani osiligi le Israel, ore pooki liking'uaa iyie netum enkurruna; ore lelo ooibelelekenya niking'uaa iyie, neigeri tiatua enkop, too nkulupuok amu etanyaita ninche Olaitoriani, ina ong'u enkare naishu.

¹⁴Nchiunyeki nanu Olaitoriani, naa kaishiu; Ntajewuoki naa kajeu; amu ira iyie enkisisa ai.

¹⁵Kaajoki ninche nanu, “Koree ororei oing'uaa Olaitoriani? Nchoo elotu!”

¹⁶Eitu nanu aaitirrishaki iyie pee irriu entorroni, neitu nanu ang'uar enkolong e mutai, iyiolo iyie; ore ina napuku tiatua enkutuk ai netii dukuya enkomom ino.

¹⁷Meaku olkirutoto te nanu; ira iyie esarunoto ai te nkolong entorroni.

¹⁸Nchoo metukurru lelo laaisilisil nanu, kake mikincho nanu aaitukurruni. Nchoo ninche eirut, kake mikincho nanu airut! Intadoiki ninche enkolong entorroni; ingilie ninche kat are enkidaata.

¹⁹Nji aatiaaka nanu Olaitoriani: “Shomo ntasho te kishomi e Benchamen, naa ninye ejing'unye ilaiguanak le Yuda naa ninye eipang'ie o too nchomito pooki e Yerusalem,

²⁰nijo, ‘Entoning ororei lo laitoriani intae ilaiguanak le Yuda o Yuda pooki o lelo pooki oomanya Yerusalem, oojing'u te kuna shomito.

²¹Nji ejo Olaitoriani: entorripoto te nkaraki enkishui inyi, niminapinapa olola te nkolong e Sabato aashu iimunyenye nchomito e Yerusalem.

²²Niminapinapa olola aaitayu too nkajijik inyi te nkolong e Sabato aashu iasiasa ae siaai, kake entaa enkolong e Sabato sinyati, anaa apa enaitanapa loo papaai linyi.

²³Ore eyia eitu apa ninche ening'isho neitu eishoru enkiok enye, kake etogolong'utua, pee mening nemeng'amu inkiteng'enat.

²⁴“ ‘Kake tenikining'ining'i intae nanu, Olaitoriani ojo, nimintijing'ung'u olola too nchomito ena anasa te nkolong e Sabato, kake nintaa enkolong e Sabato sinyati nimiasishosho teina olong,

²⁵netum aaimu nchomito ena anasa ilaiguanak ootonie olorika le nkitoo le Daudi, ekedito ngarrin oo mbartan o mbartan, ninche o lkituaak lenye, lelo tung'ana le Yuda o lelo oomanya Yerusalem; nemanyi ena anasa ntarasi.

²⁶Nepuonu iltung'ana ooing'uaa nkang'itie e Yuda o wuejitin neemanita Yerusalem, eing'uaa enkop e Benchamen, eing'uaa Shefela, eing'uaa ina kop oo ldoinyo, o looing'ua negeb, eyau ilasarri oopejori o nkishoorot e nkurma o lbani, neyau nkishoorot e nashe enkaji Olaitoriani.

²⁷Kake tenimikining'ining'i intae nanu, aaitaa enkolong e Sabato sinyati, niminapinapa olola niimumu nchomito e Yerusalem te nkolong e Sabato, nainok nanu enkima too nchomito enyena, naa kemut nkajijik e nkitoo e Yerusalem nemeari aekata.’ ”