Read Maasai Bible – Biblia Sinyati Yeremia 18 Bible Online

Yeremia 18 - Maasai Bible – Biblia Sinyati bible

Yeremia 18

¹Ele rorei ninye oewuo enetii Yeremia eing'uaa Olaitoriani ejo:

²“Tudumunye tadoi shomo enkaji o laitobirani loo ntokitin oo nkulupuok, ore teine naaisho nanu iyie toning'o irorei laainei.”

³Nadoyio nanu alo enkaji o laitobirani loo ntokitin oo nkulupuok, ore teine neasisho ninye te nkeju enye e ngarri.

⁴Ore apa ina masaai naitobirita ninye te nkulupuoni nerruoyo te nkaina o laitobirani loo ntokitin oo nkulupuok, neitoki aitobir aitayunye enkae masaai, anaa enadol o laitobirani too ntokitin oo nkulupuok, enaa enadol aa sidai te neas.

⁵Neitoki ororei lo Laitoriani alotu enatii ejo:

⁶“Na aji e Israel, aimaidim nanu aikuna te intae anaa enaikuna ele aitobirani loo ntokitin oo nkulupuok? Olaitoriani ojo: ore anaa esarng'ab te nkaina o laitobirani loo ntokitin oo nkulupuok neijia itiuu intae te nkaina ai, na aji e Israel.

⁷Ore te pooki kata tenaibalunye tialo olosho aashu enkitoria, nchere kadotu nagil nainyal,

⁸naa ore ilo osho, laa tialo ninye airoro, teneibelekenya aing'uaa entorroni enye, nairridu ina torroni apa natejo kaitaas ninye.

⁹Naa ore te pooki kata tenaibalunye nanu tialo olosho aashu enkitoria nchere kashet naun ninye,

¹⁰naa teneas entorroni too nkonyek aainei, mening oltoilo lai, nairridu nanu teina sidai natejo pee aitaas ninye.

¹¹Ore naa, tiaaki iltung'ana le Yuda o lelo oomanya Yerusalem: ‘Nji ejo Olaitoriani, aitobirita entorroni tialo iyie naipiru enkitobirata tialo intae. Tushukunye, pooki ng'ae aing'uaa enkoitoi enye torrono, nintobiriri nkoitoi inyi o nkiaasin inyi.’

¹²“Kake ejo ninche, ‘Pesho ina! Kisuj iyiook nkitobirat ang maate, neas pooki ng'ae te risioroto e ngolon oltau lenye torrono.’

¹³“Neaku nji ejo Olaitoriani: Nkilikuanu tiatua iloreren, kaing'ae otoning'o enanyaanyukie ena? Etaasa ina tito selenkei e Israel embae suuji oleng.

¹⁴Kepal empaso[4] e Lebanon endapidapoi e Sirion? Ketoyu nena ariak o ldoinyo naaimu lelo yerat ooirobi?

¹⁵Kake maadamu nanu iltung'ana laainei, epejoki ninche enkorropil nkaitin e lejare; netarrorrote ninche tiatua nkoitoi enye, too ilbaribarani musan, neshomo aaim nkoitoi naang'el mme enkoitoi kitok.

¹⁶Eitaa enkop enye enaitureisho, entoki naing'asiakinoi intarasi. Ore pooki ng'ae oim embata neiputukuny neipirripir elukunya enye.

¹⁷Anaa osiwuo ogol le nkilepunoto enkolong kaidapash nanu ninche te dukuya olmang'atinta. Kaisho nanu ninche enkoriong ai, mme e nkomom ai, te nkolong enye o sina.”

¹⁸Nejo ninche, “Wootu, maitobiraki Yeremia orreshet, amu merruoyo enkitanapata to lapolosani, aashu enkiguana to lang'eni, aashu ororei to loiboni. Wootu, matar ninye to lng'ejep, nimikining iyiook hoo obo loo rorei lenyena.”

¹⁹Ng'uraki nanu Olaitoriani, nining olkiyioi lai.

²⁰Kentorroni elakieki esidai? Ore eyia etuturo ninche engumoto te nkaraki enkishui ai. Tadamu ina naitasho te dukuya iyie pee airo esidai te nkaraki ninche, pee aibelekeny aiwuang'ie aitung'uaa ninche.

²¹Neaku iwa nkera enye meshomo aatum olameyu; nchooi ninche meshomo engolon empijan olalem, nchoo nkituaak enye eaku olupeno o nkolia. Metanang'are ilewa lenye keeya to lmeitai, metaari elelero enye to lalem to larrabal.

²²Metoning'ori olkiyioi eing'uaa nkajijik enye, tiniyau iyie lelo ooarr ninche metuata te luamata! Amu etuturo ninche engumoto pee aaya nanu, neirragakinye nkejek aainei irresheta.

²³Ore eyia, iyiolo iyie Olaitoriani ilnukat lenye laarieki nanu matua. Mipalaki ninche entorroni enye, nimijut eng'oki enye too nkonyek inono. Nchoo ninche metanang'ari te dukuya iyie; ntanyamala ninche te nkata engoro ino.