Read Maasai Bible – Biblia Sinyati Yeremia 19 Bible Online

Yeremia 19 - Maasai Bible – Biblia Sinyati bible

Yeremia 19

¹Nji etejo Olaitoriani, “Shomo, inyiang'u endukuny o laitobirani loo nkulupuok, niya embata oo lpayiani loo ltung'ana o embata oo lapolosak kituaak,

²nimpang alo oyarata lo layioni le Hinom tenejing'ieki enkishomi e Poshed, nimbalunye teine lelo rorei laaliki nanu.

³Nijo iyie, ‘Entoning ororei lo Laitoriani, intae ilaiguanak le Yuda oloomanya Yerusalem. Nji ejo Olaitoriani loo lororani, Enkai e Israel, ng'ura kayau nanu entorroni shumata ene wueji ometaa ore nkiyiaa e pooki ng'ae oning ena neng'eyu.

⁴Te nkaraki naatung'uaitie nanu iltung'ana, neisarkione ninche ene wueji etapejokito enkorropil tiatua ine kulie aitin neitu eyiolou ninche aashu iloomenye aashu ilaiguanak le Yuda; o te nkaraki naiputa ninche ene wueji osarge le lelo lemeeta ntiot,

⁵netesheta iwuejitin neeika e Baal pee epejie ilayiok lenye te nkima anaa ilasarri oopejokini Baal, lelo leitu nanu aitanapisho aashu alimu, neitu ejing atua endamunoto ai,

⁶ng'ura, kepuonu nkolong'i, Olaitoriani ojo, nemeitokini aajo ene wueji Tofet, aashu oyarata lo layioni le Hinom, kake oyarata le sesekuanare o lalem.

⁷Naa ore tiatua ene wueji kainyal nanu nkitobirat e Yuda o Yerusalem, naisho ene metabatatayu to lalem te dukuya ilmang'ati lenye, o te nkaina e lelo ooing'oru enkishui enye kaisho nanu mpopoki enye metaa endaa oo motonyi oloing'ang'e o ng'uesi enkop.

⁸Naitaa nanu ena anasa entoki naitureisho, entoki naing'asiakinoi; ore pooki ng'ae ogiroo ninye neiputukuny neing'asia te nkaraki enkidaaroto enye pooki.

⁹Naisho nanu meinosa ninche nkiri oo layiok lenye o noo ntoyie enye, nenya pooki ng'ae nkiri e ilo lelatia enye te nkata eilo somit otipikakita ilmng'ati lenye ooing'oru enkishui enye.’

¹⁰“Nibel iyie ina dukuny te dukuya lelo tung'ana oopuo tenebo iyie!

¹¹Nijoki iyie ninche, ‘Nji ejo Olaitoriani loo lororani: Neaku kadanyidany nanu kulo tung'ana o ena anasa anaa enadany oltung'ani entoki oo nkulupuok o metaa meigili aekata aaram. Nenukaa iltung'ana ninye te Tofet amu meitokini aata ewueji nenukarieki.

¹²Nji nanu aitaas ene wueji, Olaitoriani ojo o lelo oomanya, aitotiu ena anasa anaa Tofet.

¹³Ore nkajijik e Yerusalem o nkajijik oo laiguanak le Yuda nena ajijik pooki naatapejorieki enkorropil inchumat enye te nkaraki olorora pooki le shumata neibukorieki ilasarri ooki te nkaraki nkulie aitin naa keisarkionieki enewueji e Tofet.’ ”

¹⁴Neitoki Yeremia alotu eing'uaa Tofet, ine apa neirriwayie Olaitoriani ninye meshomo aibonisho, neitashe ninye to lgoriet le nkaji e Nkai, nejoki ninye iltung'ana pooki:

¹⁵“Nji ejo Olaitoriani loo lororani, Enkai e Israel, ng'ura kayaki nanu shumata ena anasa o shumata nkang'itie enyena ina torroni, pooki natejo kaitaas ninye, te nkaraki naitagolo ninche lukuny enye, eany ening irorei laainei.”