Read Maasai Bible – Biblia Sinyati Yeremia 23 Bible Online

Yeremia 23 - Maasai Bible – Biblia Sinyati bible

Yeremia 23

¹“Oi kulo shekuti ooidaikie neidapash ntare enkirrita ai?” Olaitoriani ojo.

²Neaku nji ejo Olaitoriani, Enkai e Israel, tialo lelo shekuti ooing'or iltung'ana laainei: “Indapasha intae eluaata ai, nitaaraitie ninche meshomo, neitu intae ing'oring'oro ninche. Ng'ura, kaitame nanu intae te nkaraki nkiaasin inyi torrok, Olaitoriani ojo.

³Naitoki taa aiturrur olpisiai le luaata ai aitung'uaa nena kuapi apa naterewa ninche naa kepuo neponari.

⁴Naa kapik nanu ilchekuti shumata ninche laa ninche ooing'or ninche, nemeitoki aikata aaureisho, aashu aaiputukuny, nemeitoki hoo nabo aimin, Olaitoriani ojo.

⁵“Kepuonu nkolong'i, Olaitoriani ojo, pee atum aitaa eishoi e Daudi supatisho, naa keitoreisho anaa olaiguanani neasisho te ng'eno, nedung enkiguana te sipata o te supatisho te nkop.

⁶Ore tiatua nkolong'i enyena neitajeuni Yuda, nebik Israel te seriani. Naa ena enkarna naa ninye eipotieki ninye, ‘Olaitoriani esupatisho ang.’

⁷“Neaku, ng'ura kepounu nkolong'i, Olaitoriani ojo, nemeitoki iltung'ana aajo, ‘Anaa enaishu Olaitoriani oitayio iltung'ana le Israel ailepunye te nkop e Misiri,’

⁸kake, ‘Anaa enaishu Olaitoriani oitayio nerikoo eishoi e nkaji e Israel aitung'uaa enkop e moikuape oatua nkuapi apa naaterewa ninye ninche.’ Netum taa aatobik tiatua enkop enye maate.”

⁹Ore tiatua iloibonok: Aatigile oltau lai tiatua nanu, keikirikira iloik laainei pooki; atiu nanu anaa oltung'ani otemere, anaa oltung'ani oidimua enaisho, te nkaraki Olaitoriani o te nkaraki irorei lenyena sinyat.

¹⁰Amu ebore enkop iloololoito; ore te nkaraki oldeket neishir enkop, ore nkujit naanyori e ong'ata neitoyu. Ore olkuaak lenye naa entorroni, ore engolon enye neme sidai.

¹¹“Ore pokira oloiboni o lapolosani neme ilorrekie le Nkai; ore ninye tiatua enkaji ai nanoto entorroni enye, Olaitoriani ojo.

¹²Neaku ketiu enkoitoi enye te ninche anaa enkoitoi naideket te naimin, atua ninye emirakini ninche nebatata amu kayau nanu entorroni shumata ninche tiatua ilo ari le nkitamioto enye, Olaitoriani ojo.

¹³Ore tiatua iloibonok le Samaria atoduaa nanu entoki e modai eibonishote ninche te Baal nerik iltung'ana laainei Israeli aaitapong'oo.

¹⁴Kake ore tiatua iloibonok le Yerusalem atoduaa nanu entoki suuji: eas ninche eloloito nepuo te lejare; eitagol ninche inkaik oo laasak loo ntorrok, metaa meetae hoo obo oibelekenya aing'uaa nkiaasin enyena torrok; etotiutuo ninche pooki anaa Sodom te nanu, neikununo anaa lelo oomanya Gomora.”

¹⁵Neaku nji ejo Olaitoriani loo lororani tialo iloibonok: “Ng'ura kaitoti nanu ninche te sayiet, naisho ninche enkare natipikaki esayiet metooko; amu iloibonok le Yerusalem etupukunye orrekie leme ole Nkai alo enkop pooki.”

¹⁶Nji ejo Olaitoriani loo lororani: “Mining iyie, irorei leilo oiboni likimbonoki iyie nikimput iyie inkisilagat e pesho; eiro ninche induaat oo ndamunot enye, mme naaing'uaa enkutuk o Laitoriani.

¹⁷Kejoki ninche anaake lelo lemeshilaa ororei lo laitoriani, ‘Ekesidanu te intae’ nejoki pooki ng'ae ogolung'u osuj oltau lenye ake, ‘Metii entorroni nalotu shumata iyie.’ ”

¹⁸Amu kaing'ae tiatua ninche oitasho tiatua enkiguana o Laitoriani pee emusu nening ororei lenye aashu aing'ae oibung'a ororei lenye neinining?

¹⁹Ng'ura, osiwuo lo Laitoriani! Eipang'ua engoro napi enye o lkutati ogol kedanyakino ninye elukunya e ilo torrono.

²⁰Meshuko engoro o Laitoriani ometaba anaa nedung ninye enkiguana neitabaya iyieunot endamunoto enye. Ore too nkolong'i e siadi naa iyiolou iyie aibalie.

²¹“Eitu nanu airriwaa iloibonok, kake ekueta ninche, eitu nanu airorie ninche, kake eibonishote ninche.

²²Kake tenaa naaji keitasheito ninche te nkiguana ai, anaata etolimutuo irorei laainei too ltung'ana laainei, naa anaata aibelekenya ninche metung'uai nkoitoi enye torrok, o entorroni oo nkiaasin enye.

²³“Kara nanu Enkai nataana, Olaitoriani ojo, neme Enkai nalakua?

²⁴Keidim oltung'ani aisudoi kewan too wuejitin oo nkisudorot pee madol nanu ninye? Olaitoriani ojo. Emati nanu shumata o enkop? Olaitoriani ojo.

²⁵Atoning'o nanu enatejo lelo oibonok ooibonisho te lejare te nkarna ai, ejo, ‘Aidetideta nanu, aidetideta nanu!’

²⁶Keaku kenya elejare o anu tiatua iltauja le lelo oibonok ooibonu elejare oo ltauja lenye maate,

²⁷lelo oojo maishoo iltung'ana laainei erikino enkarna ai te nena kidetidetat enye naa ninche ejokino maate, anaa apa enatorikine loo menye enkarna ai te nkaraki Baal?

²⁸Nchoo ilo oiboni oata enkidetidet elimu enkidetidet, kake nchoo ilo oata ororei lai elimu ororei lai te sipata. Kainyoo ebaikino mbenek o enkano? Olaitoriani ojo.

²⁹Aimetiu ororei lai anaa enkima, Olaitoriani ojo, netiu anaa enyuntu nabelibel endapidapoi?

³⁰Neaku, ng'ura, kagilunore nanu iloibonok, Olaitoriani ojo, lelo oopurro to rorei laainei te ninche maate.

³¹Kaarare nanu lelo oibonok, ooasishore ilng'ejepa lenye, ‘Olaitoriani ojo.’

³²Kaarare nanu lelo ooibonu enkidetidetat e lejare, Olaitoriani ojo, laa ninche oojoki ninche nerikoo iltung'ana laainei aaitapong'oo te lejare enye o te nkitokoos enye, eitu nanu airriwaa ninche aashu aitanap ninche; metaa meret ninche ele orere katukul, olaitoriani ojo.

³³“Tinikinkilikuan iyie oltung'ani obo te kulo aashu oloiboni, aashu olapolosani, ajoki, ‘Kainyoo olola lo Laitoriani?’ Tiaaki iyie ninche, ‘Ntae ilo ola, naa kanang'aa intae aiturraa, Olaitoriani ojo.’

³⁴Naa ore tialo oloiboni, olapolosani aashu obo loo ltung'ana ojo, ‘Olola lo Laitoriani’ naitame nanu ilo tung'ani o enkaji enye.

³⁵Nji iyie tejo, ore pooki ng'ae to lelatia enye o pooki ng'ae to lalashe lenye, ‘Kainyoo etawalua olaitoriani ajo?’ Aashu ‘Kainyoo eiroro Olaitoriani?’

³⁶Kake ore ‘Olola lo Laitoriani’ mingil aekata aimaki, amu ore ilo ola naa ororei le pooki ng'ae makewan, nimbelekenyenye irorei le Nkai naishu, Olaitoriani loo lororani, Enkai ang.

³⁷Neaku tiaaki iyie oloiboni, ‘Kainyoo kitawalikia Olaitoriani ajoki?’ Aashu ‘Kainyoo eiroro Olaitoriani?’

³⁸Kake te nijo iyie, ‘Olola lo Laitoriani’ nji ejo Olaitoriani, ‘Ore te nkaraki nitejo kulo rorei: Olola lo Laitoriani,’ ina kata apa pee aairriwaki iyie olkilikuai, ajoito, ‘Mijo ake: Olola lo Laitoriani.’

³⁹Metaa, kedede kaadumu nanu iyie aing'atie enkop naanang'aa aitung'uaa enaatii nanu, iyie o ina anasa apa naaishoo nanu iyie o loo papaai lino.

⁴⁰Naa kayau nanu shumata iyie esulare oo ntarasi o enkurruna e anaake, ina nemerikinishoi aekata.”