Read Maasai Bible – Biblia Sinyati Yeremia 27 Bible Online

Yeremia 27 - Maasai Bible – Biblia Sinyati bible

Yeremia 27

¹Ore te nkiterunoto e nkitoria e Sedekia olayioni le Yosia olaiguanani le Yuda, ele rorei oewuo enetii Yeremia eing'uaa enetii Olaitoriani ejo.

²Nji aatiaka nanu Olaitoriani: “Ntobiraki kewan nkeenta o enchata oo lmong'i, nipik ninche emurt ino.

³Irriwaki olkilikuai olaiguanani le Edom o laiguanani le Moab o laiguanani le lelo ayiok le Amon o laiguanani le Tiro o laiguanani le Sidon too nkaik elelo kiliku ooetuo Yerusalem enetii Sedekia olaiguanani le Yuda.

⁴Nchoo ninche ena kitanapata too lkituaak lenye: ‘Nji ejo Olaitoriani loo lororani, Enkai e Israel: ena intae ipupuo aajoki ilkituaak linyi:

⁵Nanu ilo laa ore te ngolon ai sapuk o te nkaina ai naitoriori oitayio enkop, tenebo iltung'ana o ng'uesi naatii oriong enkop naa kaisho nanu ilo pooki ladol eishiaakino te nanu.

⁶Aishooyie taata nanu kuna kuapi pooki apik nkaik e Nebukadnesa, olaiguanani le Babilon, osinka lai, naishoo sii ninye ing'uesi e ong'ata meisiayia ninye.

⁷Keisiaai ninye iloreren pooki o layioni lenye o layioni lo layioni lenye ometaba anaa nelotu enkata enkop enye makewan; netum taa nkuapi kumok o laiguanak kituaak aaitaa ninye orrindik.’

⁸“Kake tenetii ake ninye enkop aashu enkitoria nemeisiaai Nebukadnesa ele aiguanani le Babilon, nepik emurt enye abori enchata olaiguanani le Babilon, naa kaitame nanu ina kop to lalem o to lameyu o to lmeitai, Olaitoriani ojo, ometaba anaa namut nanu ninye te nkaina enye.

⁹Metaa emining iloibonok linyi o lamusumusok linyi, o ilaidetidetak linyi o lalimunok linyi aashu ilasakutok linyi, lelo oojoki intae, ‘Misiaayiayia olaiguanani le Babilon.’

¹⁰Amu elejare ina naibonoki ninche intae, aa ore intae naa keyae enelakua aaitung'uaa enkop inyi, naa kaaraa nanu intae aipang'ie, naa indaayaya.

¹¹Kake ore ake pooki orere oyau emurt enye apik abori enchata olaiguanani le Babilon aisiaai ninye, napalaki ninche enkop enye, pee etur ninye nebik teine, Olaitoriani ojo.”

¹²Sedekia olaiguanani le Yuda airorie tena oitoi: “Eyautu imurto inyi abori olchata lo laiguanani le Babilon, nisiaayiayia ninye o ltung'ana lenyena pee ipokipoko.

¹³Kainyoo iyie o ltung'ana linono pee iyeye to lalem o to lameyu o to lmeitai, anaa enairoro Olaitoriani tialo pooki orere lemeisiaai olaiguanani le Babilon?

¹⁴Emining ororei le lelo oibonok oojoki intae, ‘Misiayiayia olaiguanani le Babilon,’ amu elejare ina naibonoki ninche intae.

¹⁵Eitu nanu airriu ninche, Olaitoriani ojo, kake keibonisho ninche te lejare te nkarna ai, eji ejo kaaraa nanu intae naa indaayaya, intae o loibonok o lelo oibonok ooibonoki intae.”

¹⁶Naitoki nanu airorie ilapolosak o ltung'ana pooki, ajoki, “Nji ejo Olaitoriani: Emining irorei le lelo oibonok ooibonoki intae, ejo, ‘Eng'ura, keshukuni nena masaa enkaji o Laitoriani aaitasieku aaitung'uaa Babilon,’ amu elejare ina naibonoki ninche intae.

¹⁷Emining intae ninche; esiaayia olaiguanani le Babilon pee ipokipoko. Kainyoo pee eitaae ena anasa olmuaate.

¹⁸Tenaa iloibonok ninche, naa tenaa ketii ororei lo Laitoriani tenebo ninche, nchoo naa ninche esaisho to Laitoriani loo lororani, paa ore nena masaa naatung'uayioki tiatua enkaji o Laitoriani, tiatua enkaji o laiguanani le Yuda o tiatua Yerusalem nemepuo Babilon.

¹⁹Amu nji ejo Olaitoriani loo lororani tialo ng'apeta o lmoti le nkare o nkitasheyieta o kulie masaa pooki naatung'uayioki tiatua ena anasa,

²⁰neitu eya Nebukadnesa olaiguanani le Babilon, ina kata apa pee eya te yararoto aitung'uaa Yerusalem aya Babilon Yekonia olayioni le Yehoiakim, olaiguanani le Yuda o lkituaak pooki le Yuda o Yerusalem.

²¹Nji ejo Olaitoriani loo lororani, Enkai e Israel, tialo nena masaa naatung'uayioki tiatua enkaji o Laitoriani o tiatua enkaji o laiguanani le Yuda o tiatua Yerusalem:

²²kenapi ninche aaya Babilon netoni teine ometabau ina olong naing'or nanu ninche ashukoki ene wueji.”