Read Maasai Bible – Biblia Sinyati Yeremia 29 Bible Online

Yeremia 29 - Maasai Bible – Biblia Sinyati bible

Yeremia 29

¹Kulo ninche irorei le ina palai nairriwayie ilo oiboni le Nkai oji Yeremia etii Yerusalem airriwaki lelo payiani apa le yararoto o lapolosak o loibonok o ltung'ana pooki apa, ootarayie Nebukadnesa aitung'uaa Yerusalem nepuo Babilon.

²Ina kata apa eidipa olaiguanani Yekonia o ng'otonye enkitok olaiguanani o lelo sunashi oogelema o lkituaak le Yuda o Yerusalem o lelo arriyiak tenguetare o lkunono, aatudumunye aatung'uai Yerusalem.

³Eirriwayioki apa ina palai te nkaina e Elesa olayioni le Shafan o Gemaria olayioni le Hilkia, laa ninche eirriwayie Sedekia olaiguanani le Yuda Babilon enetii Nebukadnesa olaiguanani le Babilon. Nejo apa ina palai,

⁴“Nji ejo Olaitoriani loo lororani, Enkai e Israel, te lelo pooki le yararoto apa natarayie nanu meshomo eyararoto aaing'uaa Yerusalem nepuo Babilon:

⁵Enteshet nkajijik nitonini tiatua ninche; entuun nkurman ninyanya inaikesu.

⁶Eyamisho niiuu ilayiok o ntoyie; eyamaki ilayiok linyi, ninchosho ntoyie inyi meyami, pee etum aatoiu ilayiok o ntoyie; entoponari teine, nimiakuku kuti.

⁷Kake engoru olmabarishoi leina anasa apa naterewa intae te yararoto, niomonono Olaitoriani te rishata enye, tialo ninye amu ore tiatua olmabarishoi lenye nitumutumu intae olmabarishoi linyi.

⁸Amu nji ejo Olaitoriani loo lororani, Enkai e Israel: Emincho iloibonok linyi o laitumusumusok linyi otii atua intae elej intae, nimining'ining'i nena kidetidetat naidetidetu,

⁹amu ore ina naa elejare naibonoki ninche intae te nkarna ai, eitu nanu airriu ninche, Olaitoriani ojo.

¹⁰“Amu nji ejo Olaitoriani: Teneishunye ilarin ntomoni naapishana te Babilon, kalotoki nanu intae, naa kaitabaya nanu te intae enkisiligata ai narrinyu intae ayau ene wueji.

¹¹Amu kayiolo nanu nkitobirat naata te intae, Olaitoriani ojo, nkitobirat olmabarishoi neme ine ntorroni, pee eisho intae osiligi too nkolong'i naapuonu.

¹²Naa eikimpotipoto intae nanu nikipoununu aaomon nanu, naa kaning nanu intae.

¹³Eiking'oruru intae nanu nikitumutumu; teniking'oruru to ltauja linyi pooki,

¹⁴nikitumutumu nanu, Olaitoriani ojo, naa kaitopok nanu intae naiturrur intae aitung'uaa iloshon pooki o wuejitin pooki apa naterewa intae, Olaitoriani ojo, narrinyu nanu intae ayau ine wueji apa naterewa intae enchom eyararoto.

¹⁵“Ore te nkaraki nitejo intae, ‘Etudumaka iyiook Olaitoriani iloibonok tiatua Babilon,’

¹⁶nji ejo Olaitoriani tialo ilo aiguanani otonita to lorika le nkitoo le Daudi o tialo lelo tung'ana pooki oomanya atua ena anasa, lelo alashera linyi leitu apa eipang aapuo tenebo intae tiatua eyararoto.

¹⁷‘Nji ejo Olaitoriani loo lororani, ng'ura, kairriwaki nanu ninche olalem o lameyu o lmeitai, naa kaitaa nanu ninche anaa ilng'abolo ootarruoitie lemeinosayu.

¹⁸Nasujaa nanu ninche to lalem, to lameyu o to lmeitai, naitaa ninche enkuretisho too nkitoriat pooki e nkop, pee eaku oldeket o enkuretisho o enkiputukuny o esulare tiatua iloreren pooki laterewa nanu ninche,

¹⁹amu eitu ninche ening ilomon laainei, Olaitoriani ojo, lelo laitirrishaka nanu airriwaki intae too sinkan laainei lelo oibonok, kake mining'ining'i intae, Olaitoriani ojo!’

²⁰Entoning ororei lo Laitoriani, intae pooki le yararoto apa laterewa nanu aitung'uaa Yerusalem nareu Babilon:

²¹‘Nji ejo Olaitoriani loo lororani, Enkai e Israel, tialo Ahab olayioni le Kalaya o Sedekia olayioni le Ma-asea, lelo ooibonu elejare te intae te nkarna ai: Ng'ura, kayau nanu ninche apik atua e nkaina e Nebukadnesa olaiguanani le Babilon, naa kear ninye ninche metuata te dukuya nkonyek inyi.

²²Ore te nkaraki ninche ketumi aadekishore ele deket lelo pooki le yararoto ooing'uaa Yuda ootii atua Babilon: Mikintotiwuo Olaitoriani anaa Sedekia o Ahab, ootapejo olaiguanani le Babilon te nkima.

²³Ore te nkaraki nataasa entaboi tiatua Israel, etololoitote too nkituaak oo lelatia enye, neiroro ninche, te nkarna ai irorei le lejare leitu nanu aitanap ninche. Nanu ilo oyiolo naa nanu olchakeni, Olaitoriani ojo.’ ”

²⁴Tiaaki Shemaia le Nehelam:

²⁵“Nji ejo Olaitoriani loo lororani, Enkai e Israel: Irriwaka iyie mpala te nkarna ino iltung'ana pooki le Yerusalem o Sefania olayioni le Maaseia ilo apolosani o lapolosak pooki, ijo,

²⁶‘Kintaa iyie Olaitoriani olapolosani te rishata e Yehoida ilo apolosani, pee intore enkaji o Laitoriani te pooki ng'ae oata oloirirua oibonisho, apik ninye olpisiai emurt.

²⁷Kainyoo naa pee eitu isikong abuaaki Yeremia le Anatot likimbonoki iyie?

²⁸Amu eirriwaka ninye iyiook olkilikuai te Babilon, ejo: Keadoru eyararoto inyi; enteshet nkajijik nimanyimanya, niununu nkurman ninyanya nena naikesu to nkurman enye.’ ”

²⁹Eisuma Sefania olapolosani ena palai metoning'o Yeremia oloiboni le Nkai.

³⁰Neitoki ororei lo Laitoriani alotu enetii Yeremia ejo:

³¹“Irriwaki olkilikuai lelo pooki le yararoto ijo, ‘Nji ejo Olaitoriani tialo Shemaya le Nehalam: Te nkaraki naibonoko Shemaya intae eitu nanu airriwu ninye, neisho intae esiliga elejare,

³²metaa nji ejo Olaitoriani: Ng'ura, kaitame nanu Shemaya le Nehelam o eishoi enye; metum ninye hoo ng'ae oishu tiatua kulo tung'ana oaku olenye odol ina sidai naitaas nanu iltung'ana laainei, Olaitoriani ojo, amu eiroro ninye enapaashari tialo Olaitoriani.’ ”