Read Maasai Bible – Biblia Sinyati Yeremia 32 Bible Online

Yeremia 32 - Maasai Bible – Biblia Sinyati bible

Yeremia 32

¹Ororei oewuo enetii Yeremia eing'uaa Olaitoriani to lari le tomon le Sedekia olaiguanani le Yuda, laa ninye apa olari le tomon o isiet le nkitoria e Nebukadnesa.

²Ore apa ina kata nemanita enjore o laiguanani le Babilon Yerusalem, ore Yeremia oloiboni le Nkai neikenoro apa to lgoriet le rripore otii enkaji enkitoo o laiguanani le Yuda.

³Amu etipika apa Yuda Sedekia olaiguanani le Yuda ninye jila, ejo, “Kainyoo iyie pee imbonisho nijo, ‘Nji ejo Olaitoriani: Ng'ura kaishooyo nanu ena anasa apik nkaik o laiguanani le Babilon, naa keya ninye.

⁴Meimisho tukul Sedekia olaiguanani le Yuda too nkaik oo Lkaldayo kake kepiki enkaina o laiguanani le Babilon, naa keiro ninye tenebo ninye eing'ura too nkomomi;

⁵naa keya ninye Sedekia Babilon, nebik ninye teine ometaba anaa naparan nanu ninye, Olaitoriani ojo. Ore hoo niaarare iyie Ilkaldayo mimirisho iyie.’ ”

⁶Nejo Yeremia, “Aairorie Olaitoriani naajoki:

⁷Kelotu Hanamel olayioni le Shalom olenkapu lino enitii nejo, ‘Inyiang'u enkurma ai natii Anatot, amu iyie eishiaakino te nikordu ainyiang'u.’

⁸Nelotu Hanamel olenkapu lai enatii tiatua olgoriet le rripore, te risioroto o rorei lo Laitoriani, naajoki nanu, ‘Inyiang'u enkurma ai natii Anatot tiatua enkop e Benchamen, amu iyie eishiaakino te niya ainyiang'u; inyiang'aki iyie kewan.’ Nayiolou taa nchere ororei lo Laitoriani.

⁹Nainyiang'u nanu ina kurma natii Anatot te Hanamel olayioni lo le nkapu lai, naineneng'aki ninye mpisai naaji shekeli tomon oopishana e nkosholai.

¹⁰Naiger te nkarna ai teina palai enkurma, nemisir neyau ilchakenini, neipim mpisai to rratili.

¹¹Naitoki nanu aitayu ina palai namishira e nkinyiang'unoto, natii olning'o o ndung'eta o entashata;[6]

¹²naisho nanu ina palai e nkinyiang'unoto Barak olayioni le Neria olayioni le Mahasia, te dukuya Hanamel olenkapu lai, te dukuya ilchakenini ootimishira ina palai e nkinyang'unoto o te dukuya Ilyahudi pooki apa ootonita to lgoriet le rripore.

¹³Naitanap nanu Barak te dukuya ninche olchakenini ajoki,

¹⁴‘Nji ejo Olaitoriani loo lororani, Enkai e Israel: Iwa kuna pala pokira, ena namishira e nkinyang'unoto o ena tashati enye nememishira, nipik ninche atua emoti oo nkulupuok, pee etum aatobik te nkata naado.

¹⁵Amu nji ejo Olaitoriani loo lororani, Enkai e Israel keitokini aainyiang'u nkajijik o nkurman.’

¹⁶“Ore aidipa aishoo ina palai e nkinyang'unoto Barak olayioni le Neria, naomon nanu Olaitoriani ajo,

¹⁷‘Ee Olaitoriani Enkai! Iyie oitobira shumata o enkop te ngolon ino kitok o te nkaina ino naitoriori! Meetae entoki nagol te iyie,

¹⁸oitoduaya enyorrata nauno too nkalifuni, kake intalaku entorroni oo loo menye too nkera enye te siadi ninche, Iyie Enkai olmagilani oji enkarna enye Olaitoriani loo lororani,

¹⁹kitok too nkiguanat naa magilani te yasata; obolo nkonyek enyena too nkoitoi pooki oo ltung'ana, nilaaki pooki tung'ani te risioroto oo nkoitoi enyena o terisioroto oo lng'anayio loo nkiaasin enyena;

²⁰oitodolua ilmonek o nenking'asia te nkop e Misiri, ometabaiki ena olong tiatua Israel o too loreren pooki, nintobiraki kewan enkarna, anaa enatiu ena olong.

²¹Iyaua apa iyie iltung'ana linono Israel aitung'uaa enkop e Misiri too lmonek o too nenking'asia, te nkaina nagol naitoriori o to lkirutoto sapuk;

²²nincho ninche ena kop, apa ninosie iyie olmumai tenebo loo menye pee incho ninche, enkop naruko inaishi o kule;

²³nejing ninche atua neya aaitaa enenye. Kake eitu ninche ening oltoilo lino aashu epuo te nkitanapata ino; eitu ninche eas hoo toki te nena pooki apa nintanapa iyie ninche metaasa. Neaku nchoo iyie ena torroni pooki meeu shumata ninche.

²⁴Ng'ura enjore namanita amuat enkanasa pee eya, naa ore te nkaraki olalem o lameyu olmeitai eishooyioki enkanasa aapik nkaik oo Lkaldayo, laa ninche oarare ninye. Ore apa ina niroro iyie netabayie, naa ng'ura, idolita iyie.

²⁵Ore ake eyia Olaitoriani Enkai, kitiaaka nanu, Inyiang'u enkurma too mpisai ning'oru ilchakenini - hoo neishooyioki enkanasa aapik nkaik oo Lkaldayo.’ ”

²⁶Aairorie Olaitoriani naajoki:

²⁷“Kara nanu Olaitoriani, Enkai e pooki naishu; keetae hoo toki nagol te nanu?

²⁸Neaku nji ejo Olaitoriani: Ng'ura kaishooyo nanu ena anasa apik nkaik oo Lkaldayo o atua nkaik e Nebukadnesa olaiguanani le Babilon; naa keya ninye.

²⁹Ore lelo Kaldayo oarare ena anasa naa kepuonu aapik ena anasa enkima, nepejoo ninye, tenebo nkajijik naa ore nchumat enye netapejokinyeki Baal enkorropil neibukorieki inaishi enkishooroto e nashe aabukoki kulie aitin, pee aaitagor nanu.

³⁰Amu ore ilayiok le Israel o layiok le Yuda meeta ae nataasa neme entorroni too nkonyek aainei ebaiki kitisho enye; meeta ilayiok le Israel ae nataasa neme kaaitagoro nanu te siaai oo nkaik enye, Olaitoriani ojo.

³¹Etuputuo ena anasa engoro ai o engoro ai napi ebaiki enkolong apa nateshetaki ometabaiki ena olong, neaku kaiwuang'ie nanu ninye too nkonyek aainei.

³²Te nkaraki entorroni pooki oo ilayiok le Israel o layiok le Yuda apa nataasa pee aaitagor ilaiguanak lenye o lkituaak lenye, ilapolosak lenye o loibonok lenye, iltung'ana le Yuda o lelo oomanya Yerusalem.

³³Aaibelekenyakita ninche nanu inkoriong'i enye, neitu aaitorioki inkomomi enye; naa ore hoo naiteng'ena nanu ninche aitirrishaki eitu ninche ening'isho aang'amu nkiteng'enat.

³⁴Etipika ninche olminong atua ina aji naipotieki enkarna ai, pee eisarkionie ninye.

³⁵Etesheta ninche iwuejitin e shumata e Baal to yarata lo layioni le Hinom, pee etum aaitayunye ilayiok lenye o ntoyie olasar oishori Molek, hoo neitu nanu aitanap ninche, neitu ninye ejing aata e ndamunoto ai, nchere pee eas ena olminong napik Yuda ing'ok.

³⁶“Nji naa taata ejo Olaitoriani, Enkai e Israel, tialo ena anasa nijojo intae, ‘Eishooyioki aapik atua enkaina o laiguanani le Babilon to lalem o to lameyu o to lmeitai’:

³⁷Ng'ura, kaiturrur nanu ninche aitung'uaa nkuapi pooki apa naterewa ninche te ngoro ai o te ngoro ai napi te mpushuna kitok; kashuku nanu ninche meetu ene wueji, naisho nanu ninche metobiko te seriani.

³⁸Naa keaku ninche iltung'ana laainei, naaku nanu Enkai enye.

³⁹Kaisho nanu ninche oltau obo o enkoitoi nabo pee aatum ninche aatureita nanu ntarasi te nkaraki ninche maate o nkera enye te siadi ninche.

⁴⁰Kaitobir nanu tenebo ninche osotua loo ntarasi, nchere maibelekenya nanu eitu aitaas ninche esidai; naa kapik nanu olturiaki lai atua oltau lenye, pee maaitoki ninche aaibelekenya aaing'uaa.

⁴¹Kang'ida nanu te naitaas ninche esidai, naa kaun nanu ninche tiatua ena kop naitubulu to ltau lai pooki o te nkishui ai pooki.

⁴²“Amu nji ejo Olaitoriani: ore anaa enayaua nanu ena torroni kitok shumata kulo tung'ana, neijia sii aiko, kayau nanu shumata ninche ina pooki sidai apa naisiligie ninche.

⁴³Keinyiang'uni nkurman tena kop nijoitoto intae, olmuaate, metii oltung'ani aashu eng'ues; eishooyioki aapik atua nkaik oo Lkadayo.

⁴⁴Keinyiang'uni nkurman too mpisai neigerokini mpala nkarn nemishiri neikeni, tiatua enkop e Benchamen, tiatua iwuejitin naamanita Yerusalem o tiatua nkanas e Yuda, tiatua nkanas e nkop oo ldoinyo, tiatua nkanas e Shefela o tiatua nkanas e Negeb; amu kashuku nanu ilooena lenye, Olaitoriani ojo.”