Read Maasai Bible – Biblia Sinyati Yeremia 33 Bible Online

Yeremia 33 - Maasai Bible – Biblia Sinyati bible

Yeremia 33

¹Aairorie Olaitoriani enkata e are, eton eikenoro to lgoriet le rripore ejo:

²“Nji ejo Olaitoriani laa ninye oitobira enkop, Olaitoriani oipirua ninye neitobiru ninye, Olaitoriani enkarna enye:

³Mpotoki nanu naa kaairuk iyie; naa kaaliki iyie ntokitin sapuki naaisudoro neitu iyie iyiolou.

⁴Amu nji ejo Olaitoriani Enkai e Israel, tialo nkajijik ena anasa o nkajijik oo laiguanak le Yuda apa naatuuroyioki aasulaki enkop pee eitobirieki isempewueti

⁵o te nkaraki o lalem loo lmang'ati. Kepuonu Ilkaldayo aagilunore intae neiput ninche mpopoki oo ltung'ana laar nanu te ngoro ai o te ngoro ai napi, amu aisudoyie nanu enkomom ai pee maing'or ena anasa te nkaraki entorroni enye pooki.

⁶Ng'ura, kayau nanu atua ninye embiotisho e nkishiunoto, naa kaishiunye nanu ninche naboloki ninche enkiputakinoto e dupoto o eseriani.

⁷Naa kashuku nanu lelo ootaarayioki le Yuda o loo taarayioki le Israel, naitoki ashetu ninche metotiwuo anaa enatiu apake te dukuya.

⁸Naa kaitisiny nanu ninche te ntorroni pooki oo ng'ok enye o engolong'akinoto naatogolong'akita nanu.

⁹Naa keaku ena anasa te nanu enkarna e ng'ida, enkisisa o enkitoo te dukuya iloreren pooki le nkop ooning nena kenya pooki sidain naitaas nanu ninche; keureshoyu ninche neikirikira te nkaraki inapooki sidai o karsisisho pooki naisho nanu ninye.

¹⁰“Nji ejo Olaitoriani: Ore tiatua ene wueji nijojo intae, ‘Olmuaate metii oltung'ani aashu eng'ues;’ ore tiatua nkanas e Yuda o too nkoitoi e Yerusalem naatomijoonito, metii oltung'ani aashu olomanya aashu eng'ues, keitokini aaning

¹¹oltoilo le ng'ida o enchipai, oltoilo lo loyamisho o ltoilo le nayami, oltoilo le lelo ooranyisho eyau nkishoorunot e nashe enkaji e Nkai. ‘Enchoo enashe Olaitoriani loo lororani, amu eisupat Olaitoriani amu ore ina nyorrata enye nauno ebik intarasi!’ Amu kashuku nanu lelo apa ootarayioki tena kop metotiwuo anaa apake te dukuya, Olaitoriani ojo.

¹²“Nji ejo Olaitoriani loo lororani: Ore taata ene wueji naa olmuaate, metii oltung'ani aashu eng'ues o tiatua nkanas enyena pooki keitoki aaigil aajing imanyishoritin oo lairritak loo ntare eing'or nkerrai enye.

¹³Ore tiatua nkanas eina kop oo ldoinyo, tiatua nkanas e Shefala o tiatua nkanas e Negeb tiatua enkop e Benchamen, nene wuejitin neemanita Yerusalem o tiatua nkanas e Yuda, keitoki nkerrai aaim abori nkaik eilo oiken ninche; Olaitoriani ojo.

¹⁴“Ng'ura ajo, kepuonu nkolong'i, Olaitoriani ojo, pee aitabaya nanu nkisiligat apa naitayio nanu te nkaji e Israel o te nakaji e Yuda.

¹⁵Ore kenya te nena olong'i o teina kata naisho nanu olng'osila osinya metubulu te Daudi, naa kedung ninye enkiguana te sipata o te supatisho te nkop.

¹⁶Ore kenya te nena olong'i neitajeuni Yuda nebik Yerusalem te seriani. Naa ena arna kenya eipotieki: ‘Olaitoriani esupatisho ang.’

¹⁷“Amu nji ejo Olaitoriani: Melau aekata Daudi oltung'ani otonie olorika le nkitoo le nkaji e Israel,

¹⁸ore lelo apolosak le Lawi nemelau aekata oltung'ani te dukuya nanu oitayu ilasarri oopejori, nepejoo entapa o lasar, neitayu ilasarri ntarasi.”

¹⁹Aairorie Olaitoriani naajoki:

²⁰“Nji ejo Olaitoriani: Tenaa indim iyie atigila olning'o lai o enkolong olning'o lai o enkewarie, metaa meekure elotu endama o enkewarie nkatitin naategelakaki,

²¹naa keidim sii olning'o lai o Daudi osinka lai atigilayu, metaa metum ninye olayioni oitoreisho to lorika lenye le nkitoo o lning'o lai lo sotua o lapolosak le Lawi lelo aisiaayiak laainei.

²²Ore anaa enemeikenayu olorora le shumata o anaa enemetemayu osinyai le naiposha, neijia aiko aponaa eishoi e Daudi osinka lai o lelo apolosak le Lawi laisiaai nanu.”

²³Aairorie Olaitoriani naajoki,

²⁴“Keitu iyie iyiolou enajeito kulo tung'ana, ‘Etanya Olaitoriani ilmareita oaare apa ootegelua?’ Nji eikuna aamenu iltung'ana laainei ometaa meekure ninche aa olosho te dukuya ninche.

²⁵Nji ejo Olaitoriani teneitu nanu aun aitagol olning'o lai lo sotua te ndama o te nkewarie o too nkitanapat e shumata o enkop,

²⁶anaata naa aany iishoritin e Yakobo o Daudi osinka lai nemagelu hoo obo le ishoi enye meitoria eishoi e Abraham, Isaak o Yakobo. Amu kashuku nanu lelo lenye ootarayioki, naa kaing'urrie nanu ninche.”