Read Maasai Bible – Biblia Sinyati Yeremia 40 Bible Online

Yeremia 40 - Maasai Bible – Biblia Sinyati bible

Yeremia 40

¹Ele rorei oewuo enetii Yeremia eing'uaa Olaitoriani eidipa Nebusaradan olkitok le rripore aishoo ninye meshomo aing'uaa Rama, ina kata apa pee eya ninye eena too lpisia te nebo lelo pooki apa le Yerusalem o Yuda ootarayioki meshomo Babilon.

²Neya ilo kitok le rripore Yeremia nejoki ninye, “Olaitoriani Enkai ino otudung'oko ene wueji entorroni:

³eyaua Olaitoriani, netaasa ninye anaa enatejo. Te nkaraki nitaasa iyie eng'oki ti alo Olaitoriani, neitu ining oltoilo lenye, pee eewuo ena toki shumata iyie,

⁴ng'ura ore taata, kaalaku nanu aitung'uaa lelo pisia ootii nkaik inono. Te nidol eishiaakino te iyie pee ilo te nebo nanu Babilon, wou, naa kaalo nanu agolie; kake te nidol ajo meishiaakino nilotu te nebo nanu Babilon, nimilotu. Ng'ura ajo etii enkop pooki dukuya iyie; shomo eneba anaa enidol ajo aisidai neishiaakino nilo.

⁵Ti nitobiko iyie, torrinyoyu naa shomo enetii Gedalia olayioni le Ahikam olayioni le Shafan, laa ninye apa etegelua olaiguanani le Babilon aitaa olgafanai too nkanas e Yuda nibik te nebo ninye ti atua iltung'ana; aashu ilo eneba anaa enidol ajo aisidai tinilo.” Neisho ilo kitok le rripore ninye endaa o enkishooroto, neisho ninye meshomo.

⁶Nelo ninye Yeremia enetii Gedalia olayioni le Ahikam, te Mispa nebik te nebo ninye ti atua iltung'ana apa ootung'uayioki teina kop.

⁷Ore ake pee ening ilkituaak pooki loo njorin e Yuda teina kop naisiasha o ltung'ana lenye nchere etegelua olaiguanani le Babilon Gedalia olayioni le Ahikam aitaa olgafanai teina kop, neishoo ninye meitoria ilewa o nkituaak o nkera, lelo apa aisinak oleng leitu eyae Babilon te yararoto,

⁸eshomo apa ninche enetii Gedalia te Mispa Ore Ishmael olayioni le Netania, Yohanan olayioni le Karea o Seraia olayioni le Tanhumet, ilayiok le Efai olnetofiti, Yetania olayioni le Maakasite, ninche o ltung'ana lenye.

⁹Ore Gedalia olayioni le Ahikam, olayioni le Shafan, nenya olmumai te nkaraki ninche o ltung'ana lenye, ejo, “Emiureishoyu tinisiaayiayia Ilkaldayo. Entobik ti atua ena kop, nisiaayiayia olaiguanani le Babilon, amu kesidanu te intae.

¹⁰Ore nanu, kabik te Mispa, pee aitashe te nkaraki intae te dukuya Ilkaldayo oopuonu enikitii iyiook; kake ore intae, enturrurro enaisho oo sabibu o lng'anayio le nkata enkirowuaj o eilata, nishumushumu ninche too ntokitin inyi naashumishoreki nibikibiki ti atua nkanas inyi apa nitegelutua.”

¹¹Neijia eikununo, ore apa pee ening Ilyahudi pooki ootii Moab o atua Ilamoni o atua Edom o atua kulie kuapi nchere etelekua olaiguanani le Babilon olpisiai ti atua Yuda netegelua Gedalia olayioni le Ahikam, olayioni le Shafan aitaa olgafanai te shumata ninche.

¹²Neitoki Ilyahudi pooki ashukunye eing'uaa iwuejitin apa naaterewaki ninche nepuonu enkop e Yuda, enetii Gedalia te Mispa; neiturrur ninche enaisho oo sabibu o lng'anayio le nkata enkirowuaj te nkumoi.

¹³Nelotu apa Yohanan olayioni le Karea o larikok pooki loo njorin teina kop naisiasha aapuo enetii Gedalia te Mispa.

¹⁴Nejoki ninye, “Iyiolo iyie nchere eirriwua olaiguanani loo Lamoni Ishmael olayioni le Netania pee elotu aiwuang'ie enkishui ino?” Kake menyorraa Gedalia olayioni le Ahikam ninche.

¹⁵Neitoki Yohanan olayioni le Karea airorie Gedalia too nkurrat te Mispa ejo, “Nchooki nanu mashomo asesekuan Ishmael olayioni le Netania, nemeetae oltung'ani oyiolou. Kainyoo ninye pee eyieu neiwuang'ie enkishui ino, neaku ore Ilyahudi pooki likinturrurrokinote iyie neidapasha, ore ilo pisiai le Yuda neidaaya?”

¹⁶Kake etiaaka Gedalia olayioni le Ahikam Yohanan olayioni le Karea, “Miaas iyie ena bae, amu irorita iyie te lejare tialo Ishamel.”