Read Maasai Bible – Biblia Sinyati Yeremia 43 Bible Online

Yeremia 43 - Maasai Bible – Biblia Sinyati bible

Yeremia 43

¹Ore pee eidip Yeremia airorie iltung'ana pooki kulo rorei pooki lo Laitoriani Enkai enye, laa ninche eirriwayie Olaitoriani Enkai enye meshomo enetii ninche,

²ore Asaria olayioni le Hoshaiai o Yohanan olayioni le Karea o ltung'ana pooki oowuasa nejoki Yeremia, “Elejare iyie ijoito. Eitu iyie kirriu Olaitoriani Enkai ang tejo, ‘Emipuo intae Misiri aatoni teine.’

³Kake Barak olayioni le Neria ninye likimbayunye iyiook, pee iyau iyiook matuata aashu eya iyiook te yararoto Babilon.”

⁴Neaku ore Yohanan olayioni le Karea o larikok pooki loo njorin o ltung'ana pooki neitu eiruk oltoilo lo Laitoriani, pee ebik ti atua enkop e Yuda.

⁵Kake ore Yohanan olayioni le Karea o lkituaak pooki loo njorin neya olpisiai pooki le Yuda apa otushukunye alotu aton tiatua enkop e Yuda eing'uaa iloshon pooki apa oowaki

⁶ilewa o nkituaak o nkera o ilkituaak o pooki tung'ani apa otung'ueikia Nebusaradan ilo kitok le rripore e Gedalia olayioni le Ahikam, olayioni le Shafan; o Yeremia ilo oiboni le Nkai o Barak olayioni le Neria.

⁷Nepuonu ninche atua enkop e Misiri, amu eitu apa eiruk oltoilo lo Laitoriani. Nebau ninche Tefahes.

⁸Neitoki ororei lo Laitoriani alotu enetii Yeremia tiatua Tafanes ejo:

⁹“Iwa too nkaik inono isoito sapuki, nisudoo ninche te nkop teine nejing'ieki enkaji e nkitoo e Farao tiatua Tafanes, te dukuya iltung'ana le Yuda,

¹⁰nijoki ninche, ‘Nji ejo Olaitoriani loo lororani, Enkai e Israel: Ng'ura, kairriu nanu nayau Nebukadnesa ilo aiguanani le Babilon, osinka lai, naa kepik ninye olorika lenye le nkitoo shumata kulo soito laisudoiyie nanu, naa keisalaashaki ninye olng'obor lenye le nkitoo shumata ninche.

¹¹Kelotu ninye aar enkop e Misiri, aisho lelo apake lo lmeitai enya olmeitai, ore lelo apake ooigerokino eyararoto nepuo eyararoto, nepuo olalem lelo apake oigerokino olalem.

¹²Neinok ninye enkima tiatua nkajijik oo nkaitin e Misiri; naa kepejoo ninye ninche nenap ninche aya eyararoto; naa keituku ninye enkop e Misiri, anaa enaituku olairritani loo ntare olkila lenye meshomo lashe; naa kelo ninye aing'uaa ine te seriani.

¹³Naa kegil ninye nena ng'apeta naasinya e Heliopolis naatii atua enkop e Misiri; ore nkajijik oo nkaitin e Misiri nepejoo te nkima.’ ”