Read Maasai Bible – Biblia Sinyati Yeremia 45 Bible Online

Yeremia 45 - Maasai Bible – Biblia Sinyati bible

Yeremia 45

¹Ele rorei eirorie Yeremia oloiboni le Nkai Barak olayioni le Neria, ina kata apa pee eiger ninye kulo rorei tiatua embuku te limunoto e Yeremia, to lari liong'uan le Yehoiakim olayioni le Yosia, olaiguanani le Yuda ejo:

²“Nji ejo Olaitoriani, Enkai e Israel tialo iyie Barak:

³Itejo iyie, ‘Woi kewan ai, amu etoponayie Olaitoriani osina le mion ai, atalepori nanu too nkigorot aainei, nemata enkiyeng'iyeng.’

⁴Nji iyie tiaaki ninye, nji ejo Olaitoriani: Ng'ura ina natesheta nanu naa kasulaa, ore ina natuuno nanu naa kadotu, aa taa enkop pooki.

⁵Ing'oru doi iyie ntokitin pooki sapuki tialo kewan ino? Ming'oru iyie ninche; amu ng'ura, kayau nanu entorroni shumata pooki toki naishu naata osesen Olaitoriani ojo: kake ekaaisho nanu iyie enkishooroto o larrabal tiatua iwuejitin pooki neeba anaa nilo.”