Read Maasai Bible – Biblia Sinyati Yeremia 46 Bible Online

Yeremia 46 - Maasai Bible – Biblia Sinyati bible

Yeremia 46

¹Ele rorei lo Laitoriani oewuo enetii Yeremia ilo oiboni le Nkai eipirta iloreren ejo.

²Ena naipirta Misiri, te nkaraki ina jore e Farao Neko, olaiguanani le Misiri, apa natii embata o lkeju le Frati te Karkemish naa ninye apa etimira Nebukadnesa olaiguanani le Babilon to lari liong'uan le Yehoiakim olayioni le Yosia, olaiguanani le Yuda:

³“Entobira ilong'oi kutiti o long'oi sapuki pee ingutakiki olarrabal!

⁴Entobira mbartan; entaked, intae ilakedok loo mbartan! Entoluaata iatata iruparen inyi, entisik iremeta inyi, enchopo nkilani inyi oo lgooitie!

⁵Kainyoo nanu pee atoduaa ina? Etureishote ninche neibelekenyate aashuko. Earitae ilmuran lenye aaiting'ie, nekueta aaisik te nkisarrisar; menang ninche silig enkuretisho te pooki shoto! Olaitoriani ojo.

⁶Meidim ilo oten ailanyisho, nemeidim olmurrani aimisho te moikuape te mbata olkeju le Frati etarrorrote ninche nebatata.

⁷“Kaing'ae ele, oilepu anaa olkeju le Nail, anaa ilkejek ooilugo nkariak?

⁸Eilepua Misiri anaa olkeju le Nail, anaa ilkejek ooilugo nkariak. Etejo ninye, kailepu nanu, kaiput nanu enkop, kainyal nanu nkanas o lelo oomanya.

⁹Enchom oleng nabartan, nikuetikuete, na garrin oo mbartan enchoo ilmurran epuo lelo tung'ana le Etiopia o Puti ooyiolo long'oi, o lelo tung'ana le Ludi arriyiak te nkibung'ata e nkawuo.

¹⁰Ore idia olong naa enkolong o Laitoriani Enkai oo lororani, enkolong e lap, pee eitalaaki kewan too lmang'ati lenyena. Kenya olalem ometaraposhoyu, neok osarge ometirikayu. Amu Olaitoriani Enkai oo lororani oibung'ita olasar, teina kop e moikuape te mbata olkeju le Frati.

¹¹Ilepa shomo Gilead niyau olchani, lo tung'ana le Misiri! Itooko iyie ilkeek kumok pesho; meetae enkishiunoto te iyie.

¹²Etoning'o iloreren nkuapi kumok enkurruna ino, neiputa enkop pooki olkiyioi linyi; amu etabatatakine olmurrani olikae murrani etabatatate tenebo.”

¹³Ele rorei eirorie Olaitoriani Yeremia oloiboni le Nkai oipirta elotunoto e Nebukadnesa olaiguanani le Babilon pee eosh enkop e Misiri:

¹⁴“Mbalie tiatua Misiri, nintoning'oo tiatua Migdol; ntoning'oi tiatua Memfis o Tapanis; Tejo, ‘Ntasho tashololoyu nirretena, nirretena amu keman olalem amuat embata ino.’

¹⁵Kainyoo pee eisika Enkai inyi napi Apis kainyoo pee eitu eitashe oloing'oni linyi? Te nkaraki natanang'aka Olaitoriani ninye enkop:

¹⁶Etarrorre esiamo inyi nebatata, nejokino ninche oltung'ani o likae, ‘Tudumunye, ematushukoto iyiook aapuo enetii iltung'ana lang maate. O enkop apa natoinyeki iyiook, te nkaraki ilo alem leilo oibooki iyiook enkop.’

¹⁷Mpoto enkarna e Farao olaiguanani le Misiri, ‘Olailepilepani oiturraa enkata.’

¹⁸“Ore anaa enaishu nanu, Olaiguanani ojo, laa ore enkarna enye naa Olaitoriani loo lororani, ore anaa Tabor tiatua ildoinyo, o anaa Karmel te mbata enaiposha, neijia etiu ilo olotu.

¹⁹Entobira ilolan linyi pee isikisiki, intae iloomanya Misiri! Amu keaku Memfis olmuaate o enkidaata, meetae olomanya.

²⁰“Enkashe sidai Misiri, kake eewuo olojong'ani torrono ooing'uaa moikuape shumata ninye.

²¹Ore ninye lelo sikarini lenyena ooigeroki ootii atua ninye netiu anaa ilasho ooitopiroki, ee, eibelekenyate ninche neisik tenebo, eitu ninche eitashe; amu eewuo enkolong enkidaata enye shumata ninche, enkata enkitamioto enye.

²²“Eitayu ninye oltoilo laijo olasurai elotu te ngolon; amu eisarisarutua ilmang'ati lenyena te ngolon, nepuonu aarare ninye too ntoluo, anaa loshi oouroo ilkeek.

²³Kepuonu ninche aadung entim enye, Olaitoriani ojo. Hoo nemeikenayu amu aikumok ninche aalang olmaati; meeta ninche esiana.

²⁴Ore iltung'ana le Misiri naa keitukurruni, keyauni ninye aapik atua enkaina oo ltung'ana ooing'uaa moikuape.”

²⁵Etejo Olaitoriani loo lororani, Enkai e Israel, “Kayau nanu enkitamioto shumata Amon le Sebes o Farao o Misiri o nkaitin enyena o laiguanak lenyena, shumata Farao o lelo ooisilig ninye.

²⁶Kayau nanu ninche apik atua enkaina e lelo ooing'oru enkishui enye, atua enkaina e Nebukadnesa olaiguanani le Babilon o lkituaak lenyena. Ore te siadi nemanyi Misiri anaa apake, Olaitoriani ojo.

²⁷“Kake miureishoyu, iyie Yakobo osinka lai, aashu ing'aing'ai iyie Israel; amu ng'ura, kaaitajeu nanu aitung'uaa enelakua, ore eishoi ino naitung'uaa ina kop enye eyararoto. Keshukunye Yakobo netum enkitirring'a o enkiyeng'iyeng, nemeetae oloitore ninye.

²⁸Miureishoyu, iyie Yakobo osinka lai, Olaitoriani ojo, amu atii nanu tenebo iyie. Kaiting'ie nanu katukul iloshon pooki lelo apa laaterewa nanu iyie. Kake ore iyie maaiting'ie tukul kaaitame nanu iyie te nkiririkinoto nasipa, nemeeta nchere pee aatung'uayie nanu eitu aitame.”