Read Maasai Bible – Biblia Sinyati Yeremia 49 Bible Online

Yeremia 49 - Maasai Bible – Biblia Sinyati bible

Yeremia 49

¹Ena ejo Olaitoriani tialo Ammon: “Aimeeta Israel ilayiok? Aimeeta ninye oloyooki ajung? Kainyoo naa pee ewa Milkom Gad, ore iltung'ana lenyena netamanya nkanas enyena?

²Neaku, ng'ura, kepuonu nkolong'i, Olaitoriani ojo, pee aisho nanu olkiyioi lo larrabal metoning'oyu te nkaraki Raba oo Lamoni; naa keaku olmuaate mijooni, ore nkang'itie enyena nepejori te nkima; netum taa Israel aawa lelo apa oowaita ninye, Olaitoriani ojo.

³“Teyietu, iyie Heshbon, amu eitomijoonoki enkang e Ai! Nchira iyie, natito e Raba! Nchopoki kewan ilkuniyiani, nchira, nikuet alimana tiatua nkang'itie! Amu kelo Milko atua eyararoto, tenebo ilapolosak lenyena o lkituaak lenyena.

⁴Kainyoo iyie pee intokoos too yarat linono naselenkei nemeisiligayu, apa naisiliga olchumati lenye, ejo, ‘Kaing'ae laalo aarare nanu?’

⁵Ng'ura kayau nanu enkuretisho shumata iyie, Olaitoriani Enkai oo lororani ojo, aitung'uaa lelo pooki likimanita iyie, naa kearari intae aaipang'ie, neilanyisho pooki ng'ae, nemeetae hoo ng'ae oiturrur lelo ooimin.

⁶“Kake ore te siadi nashuku nanu lelo tung'ana loo Lamoni apa ootarayioki, Olaitoriani ojo.”

⁷ Ena bae etejo Olaitoriani naipirta Edom: “Aimeekure etii eng'eno atua Teman? Keidaayie enkiguana te lelo ang'eni? Keimisiloyie eng'eno enye?

⁸Elanyisho entushukoto, entotoni tiatua ewueji negut, intae iloomanya Dedan! Amu kayau nanu entaboi e Esau shumata ninye, teina kata naitameyie nanu ninye.

⁹Amaa te nepuonu ilaiturrurrok loo sabibu enitii aimeleku ninche kulikae ng'anayio? Amaa te nepuonu ilapurrok kewarie, aime ina ake nairirikino ninche einyal?

¹⁰Kake atooruo nanu Esau nkilani, metaa olmasipai, ataboluo nanu iwuejitin enyena neeisudoriyie, nemeekure eidim aisudori. Eidaikieki nkera enyena o lalashera lenyena o lelatia enye; nemeekure etae ninye.

¹¹Tapala nena kera inono nemeeta menye, kaitopok nanu; nchoo maaisiliga nanu nkolia

¹²Amu nji ejo Olaitoriani, ‘Amaa teneok, lelo lemeishiaakino enkikompe enye enkitamioto ijo iyie ilo mintamio? Milo iyie mintamio, kake meeta nchere pee miok iyie.

¹³Amu ainosa nanu olmumai te kewan ai, Olaitoriani ojo, nchere keaku Basara, entoki naitureisho, enkurruna, olmuaate oldeket, ore nkanas enyena pooki neaku ilmuaateni anaake.’ ”

¹⁴Atoning'o nanu ilomon supati ooing'uaa Olaitoriani, neirriwakaki olkilikuai atua nkuapi pooki: “Enturrurroto maate tenebo, nipuonunu aarare ninye, nidumakinono olarrabal!”

¹⁵Amu ng'ura, kaaitaa nanu iyie kiti tiatua iloreren, nikimenuni tiatua iltung'ana.

¹⁶Ore nena baa naaitureishore nikiteleja iyie, oilo wuasa lo ltau lino, iyie oton too lbaat le ndapidapoi oibung entopij oldoinyo. Ore hoo nipik enkaji ino shumata oleng anaa olkurragos, kaaitadou nanu iyie aitung'uaa ine, Olaitoriani ojo.

¹⁷“Keaku Edom entoki naitureisho; ore pooki ng'ae oim embata enye neiputukuny, te nkaraki ina nataraki ninye.

¹⁸Ore anaa enapa natanang'ayioki Sodom o Gomora o nkanas naatashare, Olaitoriani ojo, meetae oltung'ani oitoki alo aton teine, meetae oltung'ani omany atua ninye.

¹⁹Ng'ura, ore anaa olng'atuny oilepu alotu aing'uaa entim e Yordan ajing'aki emuatata nagol oo nkerra, kaisho nanu ninche mekueta nabo kata aapuo aaing'uaa ninye, nagelaki nanu shumata ninye oloba anaa olagelu. Amu kaing'ae laanyaanyukie nanu? Kaing'ae laaipotu nanu? Kalo shekut loo ntare oidim aitasho te dukuya nanu?

²⁰Neaku toning'o enkitobirata naitobira Olaitoriani tialo Edom o eyieunoto naipirakinye ninye lelo oomanya Teman: Keing'irtitori ninye lelo ooti le luaata aaya; ore iluaat enye neiputukuny teina.

²¹Ore to ltoilo le mbatatata enye neigirigiro enkop; ore oltoilo le nkishirata enye nening'i te naiposha nanyokie.

²²Ng'ura kekedisho obo nekuet tiai anaa olkurragos, nelak inaipuko enyena agilunore Basara, ore oltau loo lmurran le Edom netiu kenya ina olong anaa oltau le nkitok nasaisai.”

²³Ena ejo Olaitoriani tialo Dameski: “Eitukurruaki Hamad o Arpad, amu etoning'o ninche mbaa torrok, etalepori ninche te nkuretisho, neilugo anaa enaiposha nemeidim aitirring'ayu.

²⁴Etemene Dameski, eibelekenye ninye aisik, neterewa ninye olkirutoto; neibung ninye emion o sinaitin, laaijo ilenkitok nasaisai.

²⁵Anaaijo ketung'uayioki enkanasa ning'oti, ina anasa e ng'ida!

²⁶Neaku kepuo ilbarnot lenyena aabatata too lkurrot ootumoreki le nkanasa, ore isikarini lenyena pooki nemuti teina olong, Olaitoriani loo lororani ojo.

²⁷Anaa kainok nanu enkima tiatua olpaashe, naa keidaikie lelo sempewueti le Benhadad.”

²⁸Ena ejo Olaitoriani tialo Kedar o enkitoria te Hasor apa natesesekuana Nebukadnesa olaiguanani le Babilon: “Entudumunye, enchom entaarare Kedar! Endakie iltung'ana le nkilepunoto enkirowuaj!

²⁹Keyae kenya ilng'oborri lenye o luaat enye oo nkerrai o ilkarash lenye o masaa enye pooki; nerei ntamesin enye aaitung'uaa ninche neishiraki iltung'ana ninche: ‘Enkuretisho te pooki shoto!’

³⁰Esika endapashari te nelakua, entobik tiatua enguton, intae iloomanya Hasor! Olaitoriani ojo. Amu ore Nebukadnesa olaiguanani le Babilon, neitobira enkitobirata tialo intae neipirua ina nayieu tialo intae.

³¹Tudumunye, shomo taarare ina kop te leleki, etonita te seriani Olaitoriani ojo, ina nemeeta nchomito aashu isekenke, ina nabikito openy.

³²Kerayae kenya ntamesin enye ore luaat enye oo nchoo neaku iyararot. Naidapashaki nanu pooki siuo lelo oodung ilpijat loo lpapit lenye nayau nanu osina lenye aimunye pooki shoto enye, Olaitoriani ojo.

³³Keaku Hasor emanyisho oo mbariak, olmuaate loo ntarasi. Meetae oltung'ani olo aton tiatua ninye.”

³⁴Ele rorei lo Laitoriani oewuo enetii Yeremia oloiboni le Nkai eipirta Elam, te nkiterunoto enkitoria e Sedekia olaiguanani le Yuda ejo:

³⁵Nji ejo Olaitoriani loo lororani, “Ng'ura kagil nanu enkawuo e Elam, ine netii engolon e magilanisho enye;

³⁶naa kayau nanu shumata Elam ilkutat pokira oong'uan eing'uaa imatuan ong'uan e shumata naa kaidapashaki nanu ninche lelo kutat pooki, nemeitoki atii olorere lemepuonu lelo ooterewa olkutati te Elam.

³⁷Kaiture nanu Elam te dukuya ilmang'ati lenye o te dukuya lelo ooing'oru enkishui enye; kayau nanu entorroni shumata ninche o engoro ai napi, Olaitoriani ojo. Kairriwaa nanu olalem metusujai ninche, ometaba anaa namut nanu ninche;

³⁸naa kapik nanu olorika lai le nkitoo Elam, naidaikie olaiguanani lenye o lkituaak, Olaitoriani ojo.

³⁹Kake ore too nkolong'i e siadi nashuku nanu lelo ooena le Elam, Olaitoriani ojo.”