Read Maasai Bible – Biblia Sinyati Yeremia 50 Bible Online

Yeremia 50 - Maasai Bible – Biblia Sinyati bible

Yeremia 50

¹Ele rorei eiroro Olaitoriani neipirta Babilon eipirta enkop oo Lkaldayo eimunye Yeremia ilo oiboni le Nkai ejo:

²“Mbalie tiatua loreren nintudupaa, entipik enanka nintudupaa, emisudoo, naa entejo: ‘Ewaki Babilon neitukurruni enkai enye naji Bel, Etapalari Merodak eitukurruaki nkitanyaanyukot enyena ore nena kitanyaanyukot neme enkai neitapalari.’

³“Amu moikuape eing'uaa enkop nalotu aarare ninye, naa ninye nalotu aitaa enkop enye mitil, nemeitoki hoo ng'ae amanya; keisik oltung'ani o eng'ues aailanyisho.

⁴“Ore kenya te nena olong'i o teina kata, Olaitoriani ojo, ore iltung'ana le Israel o ltung'ana le Yuda, nepuonu tenebo, neishir ninche epuonu neing'oru Olaitoriani Enkai enye.

⁵Neikilikuanu ninche enkoitoi nalo Sion, eibelekenya nkomomi enye aaing'or ina alo, ejo, ‘Wootu, matushulare iyiook Olaitoriani tiatua osotua loo ntarasi lemerikinishoi aekata.’

⁶“Etaa apa iltung'ana laainei ntare naaimina, etorikoitie ninche ilairritak lenye aaitapong'oo, aaibelekeny ninche too ldoinyo nepuo ninche oldoinyo o endoinyo, etorikine ninche eluaata enye.

⁷Ore pooki oonoto ninche neinosa ninche, netejo ilmang'ati lenye, ‘Eitu iyiook kintarruoo; amu etaasa ninche eng'oki tialo Olaitoriani, laa ninye emanyisho enye nadede, Olaitoriani osiligi loo loo papaai lenye.’

⁸“Esika entung'uai empolos e Babilon, nipuopuo aaipang te nkop oo Lkaldayo, nitiuu anaa iloroi te dukuya iluaat oo ntare.

⁹Amu ng'ura, kadumu nanu nayau metaarare Babilon olorora kitok loo loreren oogol, ooing'uaa enkop e moikuape; naa keitobirakino ninche olarrabal pee earare ninche; ore teine neyae ninye. Eikununo mbaa enye anaa olmurrani arriyia lemeshukunye ninye too nkaik naarook.

¹⁰Keaku kepuo Ikaldayo eyararoto; ore lelo pooki ooraya ninye netum pooki toki, Olaitoriani ojo.

¹¹“Ore hoo ning'ida, ore hoo nirup kewan, intae ilararok le njung'ore ai, ore hoo nintigiran anaa enkashe too nkujit, ninchirishiri anaa oloing'oni le mbarta,

¹²keitukurruni ng'utunyi katukul, ore apa ina natoiwuo intae nesuli. Ee, keaku ninye e nesiadi too loreren, ong'ata natoyio naa olpurkel.

¹³Ore te nkaraki engoro o Laitoriani memanyi ninye, kake keaku olmuaate mijooni; ore pooki ng'ae ogiroo Babilon neiputukuny, neing'asia te nkaraki ilbaa lenyena pooki.

¹⁴“Entobirakinoto pee iararere Babilon aaman aamuat te pooki shoto, intae pooki oloo enkawuo, entang'or ninye, mileku mbaa, amu etaasa ninye eng'oki tialo Olaitoriani.

¹⁵Tabuaaki ninye te pooki shoto, ekueta ninye etuurori nkang'itie enyena, etusulari isunta enyena, amu elap Olaitoriani ena; intalaku elap te ninye, ntaasa ninye anaa apa enataasa.

¹⁶Iwuang'ie te Babilon olaunoni o ilo oibung olalem le nkikesare te nkata enkikesare; ore te nkaraki ilo alem lo loitorogonyani, keibelekenyakino pooki ng'ae iltung'ana lenye maate, neisikaki pooki ng'ae enkop enye makewan.

¹⁷“Enker narreshitoi Israel namirita ilng'atunyo etang'asa olaiguanani te Asiria anya ninye, ore taata te siadi neguenyita Nebukadnesa olaiguanani le Babilon iloik lenyena.

¹⁸Neaku, nji ejo Olaitoriani loo lororani, Enkai e Israel: Ng'ura, kayau nanu enkitamioto shumata olaiguanani o enkop enye, anaa apa enaitame nanu olaiguanani le Asiria.

¹⁹Kashukoki nanu Israel ewueji enye nedaare, naa kedaa ninye te nchumata e Karmel o tiatua Bashan, neiputakini ninye eyieunoto enye te nchumata oldoinyo le Efraim o tiatua Gilead.

²⁰Ore kenya te nena olong'i o teina kata, Olaitoriani ojo, neing'oruni entorroni te Israel, nelai, neing'oruni ng'ok tiatua Yuda, nemetumi hoo nabo; amu kapalaki nanu lelo laleku metaa olpisiai.

²¹“Ilepa shomo taarare enkop e Merasaim, nilo aarare lelo oomanya Pekod, taara metuata, tusujai indaikie ninche katukul. Olaitoriani ojo, naa taasa nena pooki naaitanapa nanu iyie.

²²Etii oltoilo lo Larrabal atua enkop, o enkidaata kitok!

²³Kaji eikuna olnyuntu le nkop pooki pee etudung'oki aagil! Kaji eikuna pee etaa Babilon entoki naitureisho tiatua iloreren!

²⁴Airragie apa nanu orreshet te nkaraki iyie, nikimbung'aki iyie Babilon, neitu apa iyie iyiolou; kinotoki apa iyie nikimbung'i, te nkaraki nitekeshare iyie Olaitoriani.

²⁵Etabolo Olaitoriani ewueji enye neshumieki imasaa o larrabal, neitayu imasaa o larrabal engoro enye napi, amu eeta Olaitoriani Enkai oo lororani esiaai naas tiatua enkop oo Lkaldayo.

²⁶Tarasaki ninye te pooki shoto; tabolo ilchumat lenyena le ndaa; tasoto ninye anaa isotot le nkano, nindaikie ninye tukul; mincho eleku toki te ninye.

²⁷Taara metuata ilmurran lenyena pooki oing'ok nchoo ninche edoyio aapuo ewueji neyieng'ishoreki. Oi ninche, amu eewuo enkolong enye, enkata enkitamioto enye.

²⁸“Enining'o oltoilo lenye eisik te nkop e Babilon, pee eibalunye tiatua Sion elap o Laitoriani Enkai ang, elap te nkaraki enkaji enye.

²⁹“Mpotu lelo oong'oroo mbaa meetu aarare Babilon lelo pooki oloo enkawuo. Entamuat entaman ninye; emincho eluaya hoo obo. Entalaa ninye te risioroto oo nkiaasin enyena, entaasa ninye te risioroto e nena pooki naataasa ninye; amu eisarkionie ninye to lwuasa lenye Olaitoriani, Ilo Sinyati le Israel.

³⁰Neaku kebatata ilbarnot lenyena too lkurrot ootumoreki le nkanasa, enye, ore isikarini lenye pooki neidaikieki teina olong, Olaitoriani ojo.

³¹“Toduaa ajo kaagilunore nanu iyie te nkaraki olwuasa lino, Olaitoriani Enkai oo lororani ojo; amu eetuo nkolong'i inono, e nkata naaitameyie nanu iyie.

³²Kerrorro ilo wuasa nebatata, nemeetae olodumu ninye aitasheyie, naa kainok nanu enkima too nkanas enye naa kemut pooki toki namanita ninye.

³³“Nji ejo Olaitoriani loo lororani: Eibookoki iltung'ana le Israel enkop o ltung'ana le Yuda tenebo ninche, ore lelo pooki apa ootaraitie ninche neibung'a ninche aakurraki, etanyaita ninche eisho ninche meshomo.

³⁴Ore ilo olaku ninche naa kegol; Olaitoriani ninye enkarna enye. Kemitu ninye ninche tukul, pee etum aishoo enkop enkiyeng'iyeng, kake enyamali te lelo oomanya Babilon.

³⁵“Etii olalem shumata Lkaldayo, Olaitoriani ojo, o shumata lelo oomanya Babilon o shumata lkituaak lenyena o lang'eni lenyena!

³⁶Etii olalem shumata lelo aitumusumusok, pee etum aataa ilmoda! Pee etumi aaidaikie ninche!

³⁷Etii olalem shumata mbartan enyena o shumata ngarrin enyena oo mbartan o shumata lelo timito omon ootii atua ninye, pee etum aata inkituaak! Etii olalem shumata ilchumat lenyena, pee etumi aawaita.

³⁸Etii entoi shumata nkariak enyena pee etumi aaitoyio. Amu enkop oo nkitanyaanyukot oo nkaitin ninye netomodate ninche too nkitanyaanyukot neme inkaitin.

³⁹“Neaku kemany ilouarak le ntim o lng'ojinia Babilon, nebik isidan tiatua ninye; meitoki aatii iltung'ana atua ninye ntarasi, nememanyi too lporori pooki.

⁴⁰Amu ore apa enatotiuo pee enang'aa Enkai Sodom o Gomora o nkang'itie naatashare, Olaitoriani ojo, neijia etiu meitokini aata oltung'ani omanya ine nemeitokini aata oltung'ani obik teine.

⁴¹“Ng'ura, epuonu iltung'ana ooing'uaa enkalo e moikuape; erretena olosho magilani o laiguanak kumok too wuejitin neelakua enkop.

⁴²Eibung'ita ninche enkawuo o empere; kegogong ninche nemeeta olng'ur. Ore oltoilo le lototo enye etiu anaa enaiposha nailugo; neked ninche mbartan, neishopo anaa oltung'ani lo larrabal pee kiarare iyie, Babilon!

⁴³“Etoning'o Olaiguanani le Babilon oratioti lenye, neilepunye nkaik enyena; neiput ninye emion, emion naaijo ene nkitok nasaisai.

⁴⁴“Ng'ura, ore anaa olng'atuny olotu te ntim e Yordan ajing'aki eluaata oo ntare, kaluam nanu ninche mekueta aaing'uaa Babilon; nagelu nanu meitoria ninye oloba anaa olagelu. Amu kaing'ae laanyaanyukie nanu? Kaing'ae laakesh nanu? Kalo shekut loo ntare oidim aitasho te dukuya nanu?

⁴⁵Neaku toning'o enkitobirata naitobira Olaitoriani agilunore Babilon, o yieunot naaipirua ninye agilunore enkop oo Lkaldayo. Esipa ore lelo ooti le luaata enye naa keing'irtitori aaya; esipa ore eluaata enye naa keiputukuny.

⁴⁶Ore to ltoilo le yararoto e Babilon neigirigiro enkop, ore enkishirata enye nening'ori tiatua iloreren.”