Read Maasai Bible – Biblia Sinyati Yeremia 51 Bible Online

Yeremia 51 - Maasai Bible – Biblia Sinyati bible

Yeremia 51

¹Nji ejo Olaitoriani: “Kaputu nanu enkiyang'et e nkidaaroto metigilunore Babilon, negilunore lelo oomanya Kaldea;

²naa kairriwa Babilon ilasilak naa kepuo aasil ninye, naa keitorok ninche enkop enye, tenepuonu aarare ninye te pooki shoto teina olong e nyamali.

³Mincho ilo ong'orisho te nkawuo eyietu enkawuo enye, nimincho ninye meitasho eeta imasaa enyena o larrabal mileku ilbarnot lenyena; indaikie tukul ilororani lenyena pooki.

⁴Kebatata ninche etaraki metuata te nkop oo Lkaldayo, netipikaki ilbaa too nkoitoi enyena naalala.

⁵Amu eitu eing'ua Israel o Yuda Enkai enye, Olaitoriani loo lororani; kake ore enkop oo Lkaldayo nebore enkitarruoroto tialo Ilo Sinyati le Israel.

⁶“Esika entung'uai empolos e Babilon, enchoo pooki tung'ani eitajeu enkishui enye! Emincho edung'ori intae te nkitamioto enye amu enkata e lap o Laitoriani ena, enkitalakunoto naitalak ninye.

⁷Etiu apa Babilon anaa enkikompe e saabu te nkaina o laitoriani, eitemer enkop pooki; etemerate iloreren te naisho enye oo sabibu, neaku eshomo nkuapi etarruoitie ilukuny.

⁸Etabatate nabo kata Babilon negila; teyietu nchiraki ninye! Ewaita olchani te nkaraki emion enye. Keidimayu pee eishiunyeki ninye.

⁹Anaata iyiook kinchiunye Babilon, kake eitu ninye eishiu tung'uai ninye, maape iyiook oltung'ani ake enkop enye makewan; amu ore endung'okinoto enye e nkiguana netabaikia shumata netudumuaki aailepie omeitabaikini nkatampo.

¹⁰“Etabawua enkata pee eilepie iyiook Olaitoriani enkilepioto ang, wou, maibalunye iyiook tiatua Sion esiaai o Laitoriani Enkai ang.

¹¹“Eiyio nena baa! Entudumu ilong'oi! Etuputuo Olaitoriani oltau loo laiguanak le Amedi, amu ore eyieunoto enye tialo Babilon naa pee eidakie ninye, amu ina elap o laitoriani, elap te nkaraki enkaji enye.

¹²Entipik ilmonek isunta e Babilon; Entagolo ilarripok. Entipik ilarripok; Entobira ilnukat. Amu eitobira Olaitoriani neitabayie ina apa nairoro tialo lelo oomanya Babilon.

¹³Oi iyie oton too nkariak kumok, karsis too lchumat etabawua enkiting'oto ino, etudung'oki olpiyayoi le nkishui ino.

¹⁴Einosa Olaitoriani loo lororani olmumai te kewan enye: Esipa kaaiput nanu iyie iltung'ana ooba anaa ilmaat, naa keilepie ninche embuakunoto e nkisulata nikisulie ninche iyie.

¹⁵“Ilo ninye oitayio enkop te ngolon enye, laa ninye oitobira enkop te ng'eno enye nagut, ore te yiolounoto enye neitorioo shumata.

¹⁶Teneitayu oltoilo lenye netii enkikurrukur oo nkariak shumata, neisho ninye enkinuku metudumunye too nkiting'ot enkop. Keitayu ninye nkiwuang'at e nchan, neisho osiwuo metupuku aing'uaa ineeshumishoreki enyena.

¹⁷Kemoda pooki tung'ani nemeeta eng'eno; eitukurruaki pooki kunoni too nkitanyaanyukot enyena; amu ore nkitanyaanyukot enyena naa elejare, nemetii enkiyang'et atua ninche.

¹⁸Inepesho ninche, esiaai nemeeta tipat; ore te nkata enkitamioto enye nerruoyo ninche.

¹⁹Metiu Enkai e Yakobo anaa kulo, amu ninye naipirua ntokitin pooki, ore Israel naa olosho le njung'ore enye; Olaitoriani loo lororani enkarna enye.

²⁰“Ira iyie enyuntu ai o emasaai o larrabal: te iyie nanu agil iloreren aitaa ingiligilat. Te iyie nanu aidaikie nkitoriat,

²¹negiligili imbartan o lakedok, negiligili ingarrin oo mbartan o larewak lenye.

²²Near metuata ilewa o nkituak nesesekuan iltung'ana moruak o looti; near metuata nkayiok o ntoyie.

²³Nesesekuan ilairritak loo ntare o nkerrai enye, nesesekuan ilaturok loo nkurman o mbartan enye, nepurd ilaitoriak o lelo oata enkitoo.

²⁴“Kalaaki nanu o lelo pooki oomanya atua Ilkaldayo te dukuya nkonyek inono teina torroni apa pooki nataasa ninche te Sion, Olaitoriani ojo.

²⁵“Ng'ura kaarare nanu iyie ele otiu anaa oldoinyo oinyalisho, Olaitoriani ojo, ilo oidaikie enkop pooki; kaitorioo nanu enkaina ai pee aarare iyie, naa kaibeleleng'oo nanu too ndapidapo naaitaa nanu iyie oldoinyo otapejoki.

²⁶Nemeitayuni te iyie osoit oitaae olo lmairroto, nemeitayuni osoit lo lkitamyunoto, kake iaku iyie mijooni anaake Olaitoriani ojo.

²⁷“Tuuno iyie enanka te nkop, toosho esekekua tiatua iloreren, ntobiraki nkuapi olarrabal tialo ninye, mpotoki ninye nkitoriat meetu aarare ninye, Ararat o Mini o Askenas; Entegelu olarikoni le njore oarare ninye. Eyautu mbartan naaba anaa olmaati.

²⁸Ntobiraki nkuapi olarrabal pee earare ninye lelo aiguanak le Mede, tenebo ilbalusuni lenye o laretok lenye o pooki kop natii abori enkitoria enye.

²⁹Eikirikira enkop te mion, amu eitashe nkitobirat o Laitoriani ear Babilon, pee eitaa enkop e Babilon mitil, nememanya tung'ani.

³⁰Etapala ilmurran le Babilon olarrabal, ebikito ninche too sempewueti lenye eishunye engolon enye etaa ninche nkituaak eibung'ita enkima imanyishoritin enye. Etigilate ntaloishin oo nchomito enye.

³¹Eipirri oltung'ani anang'are olikae nenang'are olkilikuai olikae pee eliki olaiguanani le Babilon nchere eibung'aki enkanasa enye te pooki shoto.

³²Eibung'aki iwuejitin neelang'ieki too lkejek netapejoki iwuejitin neeisudoriyieki te nkima neiputukunyo isikarini lo larrabal.

³³Amu nji ejo Olaitoriani loo lororani, Enkai e Israel: Etotiwuo entito e Babilon anaa osoit oiutuutishoreki tenakata naitunyoki, ore ake eyia naa tenkiti kata naa kelotu enkata e inkikesare enye.”

³⁴“Nebukadnesa ilo aiguanani le Babilon laatumuta nanu, aatupurda ninye nanu, aaitaa ninye emaasai narok aatoijoie ninye anaa entiamasi kitok. Eiputa ninye enkoshoke enye intokitin aainei e sikar, aaiturrayie ninye anotu.

³⁵Metijing'a shumata Babilon ina kinyalata naainyalaki nanu o ltung'ana laainei.” Nchoo ilo omanya Sion ejo, “Metijing'a osarge lai shumata lelo oomanya Kaldayo. Nchoo Yerusalem ejo.”

³⁶Neaku nji ejo Olaitoriani, “Kaamitu nanu naitalaku elap te nkaraki iyie. Kaitoi nanu enaiposha enye naitoi enkong'u enye e nkare,

³⁷naa keaku Babilon osototi loo suut neaku emanyisho oo mbariak ewueji olkirutoto o enking'asia nememanya oltung'ani.

³⁸“Keikurrukur ninche tenebo anaa ilng'atunyo; neishir anaa ilkuoo lo lng'atuny.

³⁹Ore te nkure enye naitobiraki nanu ninche, naitemer nanu ninche o metishipata neirura ninche nkolong'i pooki nemeigil aainyototo, Olaitoriani ojo.

⁴⁰Kaitadou nanu ninche anaa ilkuoo le kerra oopuoi aayieng, anaa ilmeregeshi o loroi.

⁴¹“Eng'ura eneikunayioki Babilon, ewaki ina naikasie enkop pooki eng'ura aajo etaa Babilon entoki naitureisho too loreren!

⁴²Eilepaka enaiposha Babilon, eitemoyioki ninye te lelo opir le naiposha kumok.

⁴³Etaa nkanas enyena entoki naitureisho enkop natoiwuo olpurkel, enkop nememanya hoo ng'ae nemeim hoo oltung'ani atua ninye.

⁴⁴Naa kaitame nanu ina ai e Babilon naji Bel, naitayu tiatua enkutuk enye ina toki natoijoyie meitoki nkuapi aarukokino ninye etusulari esuntai e Babilon.

⁴⁵“Empang'a enchom te mpolos enye, lo tung'ana laainei! Nchoo pooki tung'ani eitajeu enkishui enye teina goro napi o Laitoriani!

⁴⁶Emimputukunyunyu nimiruturutu teilo marenke oning'o te nkop tenelotu olomoni to lari obo. Neitoki ake olomoni alotu to likae ari netii olarrabal enkop nearare oloitoreisho likae oitoreisho.

⁴⁷“Neaku, ng'ura, kepuonu nkolong'i pee aitame nanu nkitanyaanyukot oo nkaitin e Babilon; neitukurruni enkop enye pooki, ore lelo tung'ana lenyena pooki ootaraki metuata te mpolos enye.

⁴⁸Netum taa shumata o enkop o pooki natii atua ninche, aatarany te ng'ida te nkaraki Babilon amu kelotu oloidaikie aarare ninche oing'uaa moikuape, Olaitoriani ojo.

⁴⁹Meeta nchere mebatata Babilon te nkaraki lelo ootuata le Israel, amu te nkaraki Babilon etabatatate lelo loo nkuapi pooki ootuata.

⁵⁰“Ore intae oo imishote to lalem, enchom, emintashe aaitirring'a! Entadamu Olaitoriani tenelakua enchoo Yerusalem elotu ndamunot inyi:

⁵¹‘Eitukurruaki iyiook, amu kitoning'o embuaakinoto eimulumulayie esulare inkomomi ang amu eetuo iltung'ana loo loreren atua iwuejitin sinyat e nkaji o Laitoriani!’

⁵²“Neaku, ng'ura kepuonu nkolong'i Olaitoriani ojo, pee adung'oki nanu enkiguana nena kitanyaanyukot enyena naa ore tiatua enkop enye pooki neishir te mion lelo oata ilbaa.

⁵³Ore hoo nerupa Babilon abaiki shumata ore hoo naa keitagol ailepie ine neshurie, ore ake eyia naa kepuonu ilainyalak ooidaikie ooing'uaa enatii nanu aapuonu enetii ninye, Olaitoriani ojo.

⁵⁴“Enining'o! Enkishirata naing'uaa Babilon! Oltoilo le nkidaata kitok eing'uaa enkop oo Lkaldayo!

⁵⁵Amu emutita Olaitoriani Babilon neimisie ilo toilo lenye kitok. Ore ilopir lenye neikurrukur anaa ilopir loo nkariak kumok, ore embuakunoto oo ltoiloishi lenye neitabuakuni;

⁵⁶amu eewuo olainyalani shumata ninye, shumata Babilon; ewaki ilmurran lenyena etigilaki nkai enyena aaitaa ng'iligilat amu ore Olaitoriani naa Enkai e lap, esipa keitalaku ninye.

⁵⁷Kaitemer nanu ilkituaak lenyena o lang'eni lenyena, ilbalusuni lenyena, ilarikok lenyena le njore, o lmurran lenyena; keirura ninche anaake nemeigil aainyototo, olaiguanani ojo, oji enkarna enye Olaitoriani loo lororani.

⁵⁸“Nji ejo Olaitoriani loo lororani: Ore ina suntai dapash e Babilon naa keitorisiokini enkop aaitadou, ore nena shomito enyena adoru naa kepeji te nkima. Eisiaaisho iltung'ana te mpesho ore nkuapi pooki naa te nkima ake eitanaur ate.”

⁵⁹Ele rorei apa eitanapa Yeremia oloiboni le Nkai Seraia olayioni le Neria, olayioni le Mahaseia ina kata apa pee elo tenebo Sedekia olaiguanani le Yuda Babilon, to lari liong'uan le nkitoria enye. Olaitasheikinoni apa Seraia.

⁶⁰Neiger apa Yeremia tiatua embuku ina torroni pooki nalotu shumata Babilon, kulo rorei pooki apa eigeroki ooipirta Babilon.

⁶¹Nejoki Yeremia Seraia: “Tinilotu kenya Babilon, toduaa ajo isuma iyie kulo rorei pooki,

⁶²nijo iyie Olaitoriani, itejo inaaipirta ene wueji nchere iwuang'ie iyie ninye, pee meitoki amanya toki atua ninye, aa oltung'ani aashu eng'ues, naa keaku olmuaate ntarasi.

⁶³“Ore pee indip aisuma ena buku, teeniki ninye isoito ninang'aki empolos olkeju le Frati,

⁶⁴nijo, ‘Nji eikoni Babilon aaimisie, pee meigil ae kata adumunye, te nkaraki ina torroni nayau nanu shumata ninye.’ ” Ene ebaiki irorei le Yeremia.