Read Maasai Bible – Biblia Sinyati Yeremia 52 Bible Online

Yeremia 52 - Maasai Bible – Biblia Sinyati bible

Yeremia 52

¹Ilarin tikitam oo obo apa eeta Sedekia pee eiteru aitoreisho; neitoreisho ninye ilarin tomon oobo te Yerusalem. Ore apa enkarna e ng'otonye naa keji Hamutal entito e Yeremia le Libna.

²Neas apa ninye entorroni te dukuya Olaitoriani, te risioroto eina pooki nataasa Yehoiakim.

³Esipa ore te nkaraki engoro o Laitoriani eetuo mbaa aaikunakino neijia Yerusalem o Yuda neaku etanang'ayie ninye ninche aitung'uaa kewan. Netogolong'ua Sedekia apong'ore olaiguanani le Babilon.

⁴Ore to lari lioudo le nkitoria enye, to lapa le tomon, te nkolong e tomon olapa, nelotu Nebukadnesa olaiguanani le Babilon tenebo enjore enye pooki agilunore Yerusalem, nemuat aman ninye neshetu esuntai tiauluo aaitaman enkang.

⁵Neaku etamuataki apa aaman ina anasa ometabaiki olari le tomon oobo le nkitoria o laiguanani Sedekia.

⁶Ore te nkolong e naaudo o lapa liong'uan nerasu olameyu tiatua ina anasa, nchere meetae apa endaa too ltung'ana leina kop.

⁷Neitayuni elusie te suntai eina anasa kewarie, ore iltung'ana pooki lo larrabal neipang aaisik teina anasa kewarie, aaim enkoitoi natii erishata oo sunta are te mbata enkurma o laiguanani. Ore ina kata nemanita ilkaldayo enkanasa. Neim lelo tung'ana le Sedekia enkalo e Araba.

⁸Kake etusujaitie enjore oo Lkaldayo olaiguanani, neinepu ninche Sedekia te nkisiashata e Yeriko; ore enjore enye pooki neidapasha aaing'uaa ninye.

⁹Neibung ninche olaiguanani, neyau ninye enetii olaiguanani le Babilon te Ribla tiatua enkop e Hamat, nedung'oki ilo aiguanani le Babilon ninye enkiguana.

¹⁰Near olaiguanani le Babilon ilayiok le Sedekia metuata te dukuya ninye neitoki sii aar metuata ilkituaak pooki le Yuda te Ribla.

¹¹Nekurtu ninye nkonyek e Sedekia neen ninye too lpisia, neya olaiguanani le Babilon ninye Babilon, nepik ninye jila ometabaiki enkolong e keeya enye.

¹²Ore to lapa le imiet, te nkolong e tomon o lapa aa olari apa le tomon ooudo le nkitoria o laiguanani Nebukadnesa olaiguanani le Babilon ore Nebusaradan ilo kitok le rripore apa oisiaai olaiguanani le Babilon, nejing Yerusalem.

¹³Nepejoo ninye enkaji o Laitoriani o enkaji o laiguanani o nkajijik pooki e Yerusalem; ore pooki aji kitok nepejoo ninye.

¹⁴Ore ina jore pooki oo Lkaldayo apa natii tenebo ilo kitok le rripore negil isunta pooki naamanita Yerusalem.

¹⁵Neya Nebusaradan ilo kitok le rripore araya embata oo ltung'ana aisinak o kulikae tung'ana pooki apa ootung'uayioki teina anasa o lelo apa ooisikakita olaiguanani le Babilon, tenebo lelo aisiaayiak arriyiak.

¹⁶Kake etung'uayie apa Nebusaradan ilo kitok le rripore embata oo ltung'ana aisinak oleng pee eing'or isabibu neturisho.

¹⁷Ore apa ing'apeta o suyai naatii atua enkaji o Laitoriani o nkitotoneta e ilo moti le nkare lo suyai apa otii atua enkaji o Laitoriani, nebel Ilkaldayo aaitaa mbelibelat, nenap osuyai pooki aaya Babilon.

¹⁸Neya ninche imotioo o nchempei o ntokitin o ltaa o mbakulini o masaa naapejieki enkorropil o masaa pooki osuyai apa naasishoreki te nkisiaayiare e nkaji e Nkai.

¹⁹Ewaki sii mbakulini kutiti o ntokitin nainokieki enkima o mbakulini sapuki o motio o iketa oo ltaai o ntokitin naapejieki enkorropil o lbakulini ooitukuoreki. Ore apa ina nara saabu neya ilo kitok le rripore anaa saabu, ore enapa nara enkosholai, neya anaa enkosholai.

²⁰Ore apa nena ng'apeta are o ilo moti obo le nkare o lelo oing'ok tomon oaare lo suyai apa otii abori ilo moti le nkare o nena kitasheta apa naaitobira Solomon olaiguanani te nkaraki enkaji o Laitoriani, ore osuyai le kuna tokitin pooki nemeipimoyu te nkiroishi.

²¹Ore ing'apeta enkadoro eng'ape nabo naa ntemat tomon o isiet e nkaina ore ne emanaroto enye naa ntemat tomon oaare, ore enkirrushai enye naa ntemat oo lkimojik oong'uan naa keudo empolos.

²²Ore enchumata enye netii osuyai, ore enkadori e nchumata nabo naa ntemat imiet e nkaina, neikodo too lgululu oopurupurana, naa ilo suyai pooki netii enchumata enye aaman. Ore enkae ng'ape naa neijia eikununo, eeta ilgululu oopurupurana.

²³Etii apa ilgululu oopurupurana ntomoni naaudo o ile mbat enye, ore lelo gululu oopurupurana naa iip nabo neikodokino te manarato.

²⁴Neya ilo kitok le rripore Seraia ilo apolosani kitok o Sefania ilo apolosani osujita ninye te nkitoo o lelo arripok kituaak okuni le kishomi;

²⁵ore te nkanasa neya olkitok apa laa ninye oitasheiki enjore o ltung'ana oopishana le nkiguana o laiguanani, ooinepuaki tiatua enkanasa o laigeroni lo lkitok le njore laa ninye apa oiger iltung'ana leina kop o ltung'ana ntomoni ile loo ltung'ana leina kop ooinepuaki te mpolos eina anasa.

²⁶Neya ninche Nebusaradan ilo kitok le rripore ayaki olaiguanani le Babilon te Ribla.

²⁷Near olaiguanani le Babilon ninche metuata te Ribla tiatua enkop e Hamat. Neaku eibung'aki Yuda aaraya neitung'uari enkop enye.

²⁸Ena esiana oo ltung'ana oowa Nebukadnesa eyararoto: ore to lari liopishana, naa Ilyahudi nkalifuni uni o tikitam oo kuni.

²⁹Ore to lari le tomon oisiet le Nebukadnesa neya ninye araya aitung'uaa Yerusalem iltung'ana iip isiet o tomoni uni o are.

³⁰Ore to lari le tikitam oo kuni le Nebukadnesa, neya Nebusaradan ilo kitok le rripore araya Ilyahudi iip naapishana o artam o imiet; era esiana oo ltung'ana pooki nkalifuni ong'uan o iip ile.

³¹Naa ore to lari le tomoni uni oopishana le yararoto e Yohoiakim olaiguanani le Yuda, to lapa le tomon o are, te nkolong e tikitam o imiet o lapa, ore teilo ari otaarayie Efi-Merodak olaiguanani le Babilon, neitopok ninye Yehoiakim ilo aiguanani le Yuda, neitayu ninye aitung'uaa jila;

³²neirorie ninye te supatisho, neisho ninye olorika olang ilorikan loo laiguanak apa ootii tenebo ninye te Babilon.

³³Neitayu Yehoiakim nena kilani enyena apa e jila. Ore nkolong'i pooki te nkishui enye nedaa ninye anaake te misa o laiguanani;

³⁴ore tialo nkolati enyena, keisho apa ninye olaiguanani enkishooroto anaake te risioroto eyieunoto enye, ometabaiki enkolong e keeya enye, anaa ake duoo neishu.