Read Maasai Bible – Biblia Sinyati Yeremia 8 Bible Online

Yeremia 8 - Maasai Bible – Biblia Sinyati bible

Yeremia 8

¹“Ore kenya teina kata, Olaitoriani ojo, ore iloik loo laiguanak le Yuda o loik loo lkituaak lenyena o loik loo lapolosak o loik loo loibonok le Nkai o loik le lelo oomanya Yerusalem neyauni aitung'uaa nkuraren enye;

²neidapashi ninche te dukuya enkolong o lapa o te dukuya olorora pooki le keper, naa ninche apa etonyorra ninche neisiaai, aa ninche apa etusujaitie, aa ninche eing'orutua neserem; nemeiturrurri ninche aashu enukari; netiu ninche anaa modiok ti oriong enkop.

³Kenyorrarri kenya keeya aaitudutie enkishui ilo pisiai oleku lele marei torrono too wuejitin pooki naterewa nanu ninche, Olaitoriani loo lororani ojo.

⁴“Ijoki iyie ninche, nji ejo Olaitoriani, Amaa tenebatata oltung'ani aimeitoki ninye adumunye? Amaa teneibelekenya oltung'ani alo, aimeitoki ninye ashukunye?

⁵Kainyoo naa pee eibelekenyate kulo tung'ana aapuo siadi? Neibung ninche aakurraki elejare, neany ninche eshukunye.

⁶Ainining'o nanu, kake eitu ninche eiro aaitorioki; meetae oltung'ani oirridu te ntorroni enye, ejo ‘Kainyoo nanu ataasa?’ Eibelekenyakino ake pooki ng'ae nkoitoi enyena, anaa embarta nakuetiki olarrabal.

⁷Ekeyiolo ninye entilagos te shumata nkatitin enyena; ore enturkuluo o emotoroki, o enkaileeri neibung nkatitin enye naapuonunye; kake meyiolo iltung'ana laainei nkitanapat Olaitoriani.

⁸“Kaji intae inkoko tenijojo, ‘Aikira iyiook ng'eni, ore enkitanapata O Laitoriani netii tenebo iyiook?’ Ngura ajo eibelekenya.

⁹Ore lelo tung'ana ng'eni naa keitukurruni, keidang'ieki ninche neyae; Oi, etanyaita ninche ororei lo Laitoriani, naa kaa ng'eno natii atua ninche?

¹⁰Neaku kaisho nanu nkituaak enye ilkulikae naisho nkurman enye lelo ooisulu, te nkaraki naa ore ebaiki oloti ometabaiki olkitok eeta pooki ng'ae olorok le dupoto te nkoitoi elejare. Eiteru to loiboni le Nkai o metabaiki olapolosani meetae ake ole measisho te lejare.

¹¹Eishiunye ninche olbae loo ltung'ana laainei te nkitaakunoto ejo, ‘Eseriani, eseriani’, nemetii eseriani.

¹²Ketukurrutua ninche ina kata pee eas olminong A'a, eitu ninche ekurru katukul; menya ninche orere. Neaku kebatata ninche tiatua lelo ootabatatate; ore ake pee aitame ninche, nenang'ari ninche, Olaitoriani ojo.

¹³“Ore tenajo aiturrur ninche; Olaitoriani ojo, nemetii ilng'anayio o sabibu aashu ilng'abolo olng'aboli etoito ninye mbenek, ore apa ina naishoo nanu ninche netulusoyie alo aing'uaa ninche.”

¹⁴Kainyoo pee kitoni iyiook aaitirring'a enturrurroto tenebo, maape iyiook atua nena anas naasheta, pee kindaaya teine; amu etudung'oko iyiook Olaitoriani Enkai ang enkidaata, neishoo iyiook enkare natii esayiet matook, te nkaraki nikitaasa iyiook eng'oki to Laitoriani.

¹⁵Kisiligu iyiook eseriani kake meetae esidai naewuo, enkata enkishiunoto, kake ng'ura, enkuretisho.

¹⁶“Ore enkikurrukur oo mbartan enye nening'o te wueji neji Dan. Ore to ltoilo loo mbartan enye e njore neikirikira enkop pooki. Kepuonu ninche aaidaikie enkop o pooki toki nabore, enkanasa o lelo oomanya atua.

¹⁷Amu ng'ura, kairriu nanu tiatua intae ilasuriaa o nturbubuani naata esayiet nemeibooyo intaleng'o, naa keony ninche intae.” Olaitoriani ojo.

¹⁸Meishiunoyu osina lai? Kemuoi oltau lai.

¹⁹Toning'o olkiyioi loo ltung'ana laainei eing'uaa enkadoro o endapasho enkop. “Aimetii Olaitoriani atua Sion? Aimetii olaiguanani lenye atua ninye?” Kainyoo pee aaitagoro ninche too nkitanyaanyukot enye naaguetuno, o too nkitanyaanyukot enye omon?

²⁰“Etulusoyie enkikesare; eishunye enkata enkirowuaj, neitu eitajeuni iyiook.”

²¹Amu ore ilo bae leina tito oo ltung'ana laainei naa oltau lai etipikaki olbae, aishir nanu, naaiputa nanu enking'asia.

²²Aimetii olchani atua Gilead? Aimetii olabaani ine? Kainyoo naa pee eitu eishiunyeki iltung'ana laainei?