Read Maasai Bible – Biblia Sinyati Nkishirat 3 Bible Online

Nkishirat 3 - Maasai Bible – Biblia Sinyati bible

Nkishirat 3

¹Kara nanu oltung'ani otodua osina oing'ua eng'udi napi e Nkai.

²Aawa ninye nanu enetii enaimin nemetii hoo ewang'an;

³kesipa nanu egilunore enkaina enye nkatitin pooki e ndama pooki.

⁴Aaitasasa nanu nemugut olchoni lo sesen lai negil iloik laainei;

⁵aatamuata ninye nanu naaimulumul te mion o sina.

⁶Aaishoo ninye nanu matobiko tiatua enaimin anaa olotua apa moitie.

⁷Aatipika nanu ilpisia, atii ilpisia nemaata osiligi laalakunyeki.

⁸Ore hoo naipotishe naishiru eretoto netanya ninye enkomono ai.

⁹Etunuka ninye inkoitoi aainei too soito, neloj inkoitoi aainei aboin.

¹⁰Etotiwuo ninye te nanu anaa olng'arurumi orreshisho, etiu anaa olng'atuny oisudori airrag.

¹¹Aaitapaasha ninye enkoitoi ai naaitaa nanu mpurdat aaitoliyio ninye nanu;

¹²eteyietuo ninye enkawuo enye naiuloki nanu aarie osuyiet[3] too mbaa enyena.

¹³Eishaka ninye atua oltau lai mbaa e mootian enye.

¹⁴Ataa nanu entoki nakueniyieki too ltung'ana pooki, ataa osinkolio lenye endama pooki.

¹⁵Aaiputa ninye nanu emion naairuja nanu olkurto.

¹⁶Etarrarra ninye ilala laainei to soit naaimulumul nanu too nkuruon.

¹⁷Ore oltau lai nemeekure eyiolo eseriani, aatorikine nanu ajo kainyoo eji enchipi.

¹⁸Neaku kajo nanu, “Eshomo enkitoo ai neshomo enkisiligunoto ai naing'uaa Olaitoriani.”

¹⁹Tadamu osina lai o emion ai o lkurto o lodua.

²⁰Edamu oltau lai kuna anaake neiput osina.

²¹Kake tenadamu nanu kuna, natum osiligi.

²²Meish aekata enyorrata o Laitoriani nauno, nemeish aekata olng'ur lenye.

²³Aing'ejuko ninche anaake tadekenya, aikitok esupatisho enye.

²⁴“Olaitoriani ninye erubata ai” neijia ejo oltau lai, “Ore te nkaraki ina kaisilig nanu ninye.”

²⁵Aisupat Olaitoriani te lelo oanyu ninye, te lelo ooing'oru ninye.

²⁶Eisidai te neitirring'a oltung'ani aanyu enjeunoto o Laitoriani.

²⁷Eisidai te nenap oltung'ani enchata e murt nanapishoreki te kitisho enye.

²⁸Nchoo ninye egira aitirring'a openy te neiteleikini ninye;

²⁹nchoo ninye eitabaiki enkutuk enye enterit, amu ebaiki netii osiligi.

³⁰Nchoo ninye meishoo eseder enye ilo ooshisho; nesukenyi ninye.

³¹Amu meiturraa Olaitoriani ninye ntarasi.

³²Kake ore hoo neyau osina, ketum ninye olng'ur, te risioroto e sapuko e nyorrata enye nauno;

³³amu meotiki ninye aitameisho aashu epik osina inkera e tung'ani.

³⁴Apurdaki enkop too nkejek, lelo pooki ooena te nkop.

³⁵Pee eibelekeny esipata o ltung'ani te dukuya ilo otii shumata aisul,

³⁶neibelekeny esipata too nkiguanat, menyorraa Olaitoriani nena.

³⁷Kaing'ae oiro embae nebaya aaku,

³⁸teneme Olaitoriani otonyorrayie?

³⁹Kainyoo pee eilepilep iltung'ana ooishu, kainyoo pee eilepilep oltung'ani te nkitamioto oo ng'ok enyena?

⁴⁰Maineneng'a nikijurru nkoitoi ang, nikirrinyokino Olaitoriani!

⁴¹Mailepie iltauja lang o nkaik ang, aailepakinye Enkai natii keper:

⁴²“Kitapong'ori iyiook nikitogolong'utua, neitu iyie ipalaki iyiook.

⁴³Kimputa iyie engoro oleng nimir iyiook nisesekuan miata olng'ur;

⁴⁴imulumula iyie kewan te nkatampoi neaku meetae enkomono, nabau enitii.

⁴⁵Ntaa iyie iyiook isuut o ntokitin e pesho, tiatua iltung'ana.

⁴⁶“Ore ilmang'ati lang pooki neng'a nkutukie te nkaraki iyiook.

⁴⁷Kinoto olkirutoto le keeya nikinoto, eliyio o enkidaata.

⁴⁸Eruko ilkejek loo lkiyio too nkonyek aainei, te nkaraki enkidaata oo ltung'ana laainei.

⁴⁹“Keruko ilkiyio too nkonyek aainei nemeishunye, nemegem aekata,

⁵⁰ometaba anaa neing'or Olaitoriani te keper nedol asipu.

⁵¹Ore naadol nkonyek aainei netipika osina oltau lai te nkaraki nena silan e nkanasa ai.

⁵²“Aatarreshoki nanu anaa emotonyi, lelo mang'ati laainei metii emporeet.

⁵³Aatusulakita ninche engumoto naanang too soito;

⁵⁴naaimisie enkare endukuya ai; najo, ‘Aimina nanu.’

⁵⁵“Aipoto nanu enkarna ino iyie Olaitoriani atii enguton e ngumoto.

⁵⁶Itoning'o iyie osayia lai, ‘Minken iyie enkiok ino, te nkishirata ai te nkaraki eretoto!’

⁵⁷Kitinyikaka iyie nanu ina kata pee aaipot, itejo iyie, ‘Miureishoyu!’

⁵⁸“Kitomituo iyie nanu Olaitoriani, itokordua iyie enkishui ai.

⁵⁹Itoduaa iyie entorrono naaitaasaki nanu, Olaitoriani, tudung'okoki iyie nanu enkiguana.

⁶⁰Itoduaa iyie elap enye pooki nena kitobirat enye pooki te nkaraki nanu.

⁶¹“Itoning'o iyie imorot enye, Olaitoriani nena kitobirat enye pooki te nkaraki nanu.

⁶²Ore nkirorot o ndamunot oo lmang'ati laainei, naa nanu egilunore endama pooki.

⁶³Ng'ura ajo ore etoni o eitashe, naa nanu ake eimaki eranyisho.

⁶⁴“Ntalaku iyie te ninche Olaitoriani, te risioroto e siaai oo nkaik enye.

⁶⁵Tipika iltauja lenye emodai; nelotu oldeket lino shumata ninche.

⁶⁶Nisujaa iyie ninche te ngoro nindaikie ninche; aiwuang'ie tiabori keper ino, Olaitoriani.”