Read Maasai Bible – Biblia Sinyati Nkishirat 4 Bible Online

Nkishirat 4 - Maasai Bible – Biblia Sinyati bible

Nkishirat 4

¹Kainyoo pee meekure ewang saabu. Kainyoo pee eibelekenye saabu nasila! Ore lelo soito oosinya neirragaa aaidapasha te nkiterunoto e pooki oitoi nalala e nkanasa.

²Ore ilayiok le Sion le tipat anaa saabu sidan nesila, kainyoo pee etotiutuo anaa motioo oo nkulupuok, esiaai oo nkaik o laitobirani!

³Ore ninye mbariak keisho ilki neitanak nkera kake ore iltung'ana laainei netagogong'o, etotiwuo anaa isidan tiong'ota.

⁴Ore olng'ejep le nkerai nanakita, neibung enoret te nkure; neomonu nkera endaa, kake meetae oloisho ninche.

⁵Ore lelo oodaa te sikar, neidaaya too nkoitoi naalala e nkanasa; ore lelo apa ootamoo eishop nkilani pilei neirrag too lchalai loo nkuruon.

⁶Ore enkitamioto oo ltung'ana laainei naa eikitok, alang enkitamioto e sodom, apa natusulayioki nabo kata, nemeetae enkaina naiteleikiaki ninye.

⁷Ore apa ilkituaak lenyena newang aalang enturoto, neibor aalang kule; ore iseseni lenye nenyokioo aalang intoto sidain, ore enkishiaa enye newang anaa oltotoi oji safire.

⁸Netorokita taata nkomomi enye aalang nkuk, meekure eyiolounoyu too nkoitoi naalala e nkanasa; neibibiari iseseni lenye aarep iloik te saso netoito anaa nkeek.

⁹Enaikash apa lelo ootaraki to lalem, alang lelo ooya olameyu lelo ootemenate, ootomitiokoki ilng'anayio le nkop.

¹⁰Ore nkaik e nena kituaak naata olng'ur neitokitokie inkera enye maate; neitaa ninche endaa enye, teina kidaata e oo ltung'ana laainei.

¹¹Eitabayie Olaitoriani engoro enye etubukuo ninye engoro enye nairowua; neyupuyup anaa enkima te Sion, nemut ilkitamanyunot lenyena.

¹²Eitu apa enyorraa ilaiguanak le nkop anaa hoo obo le lelo oomanya enkop, nchere keidim olmang'atinta atijing'u nchomito e Yerusalem.

¹³Ore ena naa te nkaraki ing'ok oo loibonok le Nkai o ntorrok oo lapolosak lenyena lelo ooibukoo te mpolos enye osarge le lelo lemeeta entioto.

¹⁴Nelimana ninche too nkoitoi naalala e nkanasa medolisho, eeta olduruk lo sarge. Nemeetae ninye oltung'ani oiseyie ilkilani lenye.

¹⁵Nejoki iltung'ana ninche, “Entalamari ilooiduruk Entalamari, Entalamari! Emiseyie aitoki!” Neaku etaa ninche ilaisikak oloolimana; nejo iltung'ana too nkuapi, “Meigil aekata aatoni tenebo iyiook.”

¹⁶Olaitoriani makewan oidapasha ninche meigil aekata ninye ashilaa ninche nemeigili aayanyitu ilapolosak nemeikiroteti ilpayiani.

¹⁷Eiliilaitie nkonyek ang eisiligu eretoto nemetii, ore te rripore ang, nikiaanyu olorere lemeidim aaitajeusho.

¹⁸Nerreshu iltung'ana iroruat ang, ometaa meekure kipuo aaim nkoitoi ang naalala, nenyiku enkiting'oto ang, neaku kuti nkolong'i ang, amu etabawua enkiting'oto ang.

¹⁹Keneneng lelo oomirita iyiook aalang ilmotonyi oopuo tiaai nemir ninche iyiook too ldoinyo neirrag ninche aarresh iyiook tiong'ota.

²⁰Ore enkiyang'et oo nkumeishin ang, ilo otubukoko Olaitoriani eilata aput, neyae too nkumeishin enye ilo apa likitejo iyiook, “Tiabori oloip lenye kipuo aatoni tiatua iloreren.”

²¹Enting'idata nishipapa lo tung'ana le Edom, enting'idata sii ntae ile Usi, keimarieki intae enkikompe e nkitamioto; niokioko nimerara ninturraa ilkilani.

²²Ore enkitamioto e ng'oki ino, Yerusalem neitabayioki, meekure ninye kingil aibok te eyararoto aekata, kake ore eng'oki ino Edom, ninye eitamei, kebolu Olaitoriani ing'ok inono.