Read Maasai Bible – Biblia Sinyati Nkishirat 5 Bible Online

Nkishirat 5 - Maasai Bible – Biblia Sinyati bible

Nkishirat 5

¹Tadamu Olaitoriani ena bae nanoto iyiook, ing'ura nidol enkurruna ang.

²Ore enjung'ore ang neibelekenyakaki iltung'ana leeiking'a, ore nkang'itie ang neaku inoo ltung'ana leeiking'a.

³Kitaa iyiook okishin, ilemeeta loomenye etiu noo yieyio anaa nkolia.

⁴Aikilak iyiook enkare nikiok ore ilkeek likitum aainok keinyiang'uni.

⁵Eturrumoyioki iyiook kiaata enchata oo murto nanapishoreki too murto. Kinaurate iyiook neitu eishori iyiook enkiyeng'iyeng.

⁶Kisiaayia iyiook Misiri o Asiria, pee kitum endaa naraposh iyiook.

⁷Etaasa apa loopapa eng'oki, nemeekure eetae; kinapita iyiook entorroni enye.

⁸Eitoreita iyiook irrindiki; nemeetae olokordu iyiook aitayu too nkaik enye.

⁹Kipik iyiook enkishui ang batisho pee kitum endaa, te nkaraki ilo alem tiong'ota.

¹⁰Eirowuaja iseseni lang anaa olkokuet, te nkaraki enkolong napejisho o lameyu.

¹¹Etabatataki nkituaak te Sion, o selenken too nkang'itie e Yuda.

¹²Neiki ilkituaak aaisiong too nkaik enye; nemeyanyiti ilpayiani kituaak.

¹³Nearakini ilbarnot meidong'isho te wueji neidong'ishoreki neitaari inkayiok ilolan loo lkeek.

¹⁴Eisha ntonat oo lpayiani too leng'ot neisha eranyata o sinkolio too lbarnot.

¹⁵Eisha eng'ida oo ltauja lang, neibelekenye eranyata ang o sinkolio aaku enkishirata.

¹⁶Eiwuang'ieki enkopiyia e nkitoo te ndukuya ang; oi iyiook, amu kitaasa iyiook eng'oki!

¹⁷Te nkaraki ena pee etamuoita iltauja lang, te nkaraki ena pee eiliilaitie nkonyek ang,

¹⁸amu ore ilo doinyo le Sion otoliyie netamanya mbariak.

¹⁹Kake ore iyie, Olaitoriani, ntoreisho ntarasi; Kebikoo olorika lino le nkitoo too ishoritin pooki.

²⁰Kainyoo iyie pee midamu iyiook ntarasi, kainyoo iyie pee inturraa iyiook te nkata naado?

²¹Torrinyoki iyiook kewan ino Olaitoriani, pee kitum aatorrinyunye! Ntang'ejuko nkolong'i ang metotiwuo anaa apa!

²²Anaa itanya iyiook tukul? Itagorokine doi iyiook tukul?