Read Maasai Bible – Biblia Sinyati Baruk 1 Bible Online

Baruk 1 - Maasai Bible – Biblia Sinyati bible

Baruk 1

¹Kulo Irorei le mbuku e Baruk olayioni le Neria, olayioni le Maaseya, olayioni le Sadekia, Hasadia o Hilkia. Eigero Baruk kulo rorei te Babilon,

²te nkolong e naapishana olari le miet te nkata nawaita Ilkaldayo Yerusalem nepej te nkima.

³Neisum Baruk kulo rorei ooigero te dukuya olaiguanani Yekonia olayioni le Yehoakim, olaiguanani le Yuda o te dukuya iltung'ana pooki ooetuo aainining,

⁴o te dukuya ilkituaak o laiguanak o lpayiani o te dukuya iltung'ana pooki, ilooti o lbotorok oomanya Babilon embata olkeju le Sudi.

⁵Neishir, neen aitupukoo ate te dukuya Olaitoriani;

⁶nesotu iropiyiani, neitayu pooki ng'ae ina naata,

⁷neirriwaki olapolosani kitok Yehoakim olayioni le Hilkia, olayioni le Shallum te Yerusalem o lapolosani o ltung'ana pooki otii te nebo te Yerusalem.

⁸Ore ake teina rishata, te nkolong e tomon e Sifan, neya Baruk imasaa e nkaji e Nkai, naawaki apa aaitung'ua enkaji e Nkai, neshuku ninche enkop e Yuda. Ore enkitanyaanyukoto e kuna naa imasaa e nkosholai naitobirua apa Sedekia olayioni le Yosia, olaiguanani le Yuda,

⁹pee eidip Nebukadnesa olaiguanani le Babilon aawa te Yerusalem Yekonia o enkaiguanani o looena o oltung'ana ogoli o ltungana le nkop, neyau ninche Babilon.

¹⁰Nejo iltung'ana: “Kiyakita intae iropiyiani; einyang'u enkishooroto napejori o enkishooroto e ng'oki o enkoropil, nirretenene enkishooroto oo lpaek, nintayuyu olasar to lperere lo Laitoriani e Nkai ang;

¹¹niomonono te nkaraki enkishui e Nebukadnesa olaiguanani le Babilon, entoomonoki sii enkishui e Belshasa olayioni lenye pee ebikoo anaa enabik keper.”

¹²Naa keisho iyiook Olaitoriani engolon neisho ewang'an inkonyek ang nikibik tiabori erripore e Belshasa olayioni lenye nikisiaai ninche inkolong'i kumok nikitum omom too nkonyek enye.

¹³Entoomonoki sii iyiook Olaitoriani Enkai ang, amu kitaasa eng'oki naa ore engoro e Nkai ebaiki ena olong neitu eibelekenya aing'uaa iyiook.

¹⁴Esuma ena buku nikirriwaki intae, pee imbalielie te nkaji e Nkai enkolong o sirua o erishata naishoruno.

¹⁵Ipuopuo aajo ore esupatisho naa eno Laitoriani Enkai ang, kake kinoto iyiook enkurruna teina olong ometabaiki iltung'ana le Yuda o loomanya Yerusalem,

¹⁶o too laiguanak lang o nkaiguanak o lapolosak lang o loibonok lang o loo papa lang,

¹⁷amu kitaasa eng'oki te dukuya Olaitoriani,

¹⁸nikitogolong'akita ninye neitu kining oltoilo lo Laitoriani Enkai ang, eitu kimbung inkitanapat o Laitoriani naatipika dukuya iyiook.

¹⁹Ore ebaiki ina olong nayawua Olaitoriani iloo papa aitung'uaa enkop e Misiri ometabaiki taata, nikitogolong'akita Olaitoriani e Nkai ang, neitu kishiila oltoilo lenye.

²⁰Ore ebaiki ena olong nenoto iyiook intabo o nyamalaritin o ldeketa ootejo Enkai te Musa osinka lenye teina rishata nayawua iloo papa aitung'uaa Misiri pee eisho iyiook enkop naruko kule o naishi.

²¹Eitu kining oltoilo lo Laitoriani Enkai ang too rorei loo Loibonok ooirriwaka iyiook, kake kitusuja iyiook iyieunot oo ltauja lang arruok kisiaai inkulie aaitin nikias ine nkarruisho te dukuya Olaitoriani Enkai ang.