Read Maasai Bible – Biblia Sinyati Baruk 2 Bible Online

Baruk 2 - Maasai Bible – Biblia Sinyati bible

Baruk 2

¹Neitabaya Olaitoriani ororei lenye, oiroro egilunore iyiook o tiaalo ilaiguanak ooiguanare Israel o laiguanak lang o nkaiguanak ang o ltung'ana le Israel o Yuda.

²Ore tiabori Keper neitu aikata easi enataase te Yerusalem, anaa enaigero too nkitanapat e Musa,

³inchere pee kinya inkiri o layioni lenye o nkiri e ntito enye.

⁴Nepik ninche tiabori inkitoriat pooki naamanita iyiook, pee eaku enkurruna too ltung'ana pooki oomanita teine neidapashaka Olaitoriani ninche.

⁵Ore amu kitasaa eng'oki tialo Olaitoriani Enkai ang, kitanyaita kinining oltoilo lenye, neaku etimiraki iyiook.

⁶Ore esupatisho naa eno Laitoriani Enkai ang, kake ore yiook o loo papa, nebore iyiook enkurruna tena olong.

⁷Ore entoroni pooki nanoto iyiook naa enatejo Olaitoriani

⁸neitu kirrinyokino ninye nikiomon pee king'uaa indamunot ang arruok.

⁹Neterretena Olaitoriani entorroni, neyaua Olaitoriani shumata iyiook, amu kaasipani Olaitoriani too siaaitin enyena naaitanapa iyiook mataas.

¹⁰Kake eitu kiyanyit oltoilo lenye, aapuo too nkoitoi o Laitoriani natipika dukuya iyiook.

¹¹Ore naa tena kata Olaitoriani Enkai e Israel, iyie oyawua iltung'ana linono aitayu te nkop e Misiri te nkaina ino nagol o too lmonek o mbaa e nking'asia o te nkitoo sapuk nintobira iyie enkarna, tena olong,

¹²kitaasa eng'oki, nikitaa arruok, kitaasa entorroni Olaitoriani Enkai ang, neitu kimbung inkitanapat inono.

¹³Inchoo eibelekenya engoro ino tialo iyiook, amu kitaa kuti te siana too nkuapi nindapashaka iyiook.

¹⁴Toning'o enkomono o esayiata ang Olaitoriani nikordu iyiook, nincho iyiook omom too nkonyek inono te lelo oowaita iyiook eyararoto;

¹⁵pee eyiolou enkop pooki ajo ira iyie Olaitoriani Enkai ang, Enkai e Israel naipotieki enkarna ino.

¹⁶Olaitoriani ing'ura abori te wueji emanyisho ino sinyati, niduaaya iyiook. Inining'o iyiook;

¹⁷tabolu inkonyek inono Olaitoriani, ning'or ilootuata otii enemeneng'a, oowaki enkishui enye too seseni lenye nimikindim aaisisa,

¹⁸kake ore oltau onyamal oleng o nkejek naashali o nkonyek naaelielari o ltau oata esumash naa ninche nikincho enkisisa o esipata Olaitoriani,

¹⁹neme te nkaraki inkiasin sidain oo loo papa aashu ilaiguanak lang, kiomon iyie pee ing'urie iyiook, Olaitoriani Enkai ang.

²⁰Irriwua iyie engoro ino o entoroni ino shumata iyiook, to loiboni sinka lino nijo:

²¹Inji ejo Olaitoriani: “Errugo ironyi linyi esiaayia olaiguanani le Babilon na ilekuku te nkop naisho ilo papa linyi.

²²Kake ore te niminig'inig'i oltoilo lo Laitoriani niyanyiyanya isiyiayiayia olaiguanani le Babilon,

²³naa kaitigir nanu too lkerenketi le Yuda o te Yerusalem iltoiloshi le nchipai, ore oltoilo lo loyamisho o enayami o enkop pooki na keaku mijooni.”

²⁴Kake eitu ininginigi oltoilo lai, aaisiaai olaiguanani le Babilon; nintabayie irorei linono, lelo liroro to sinka lino oiboni, ajo ore iloik lo laiguanani o loik loo loo papa neitayuni too nkuraren;

²⁵naa ng'ura ajo, etanang'akaki enkirowuaj e ndama o endeem e nkewarie. Nemuta te nyamali sapuk o to lameyu o to lalem o too muoyiaritin torrok.

²⁶Ore ina aji naipotieki enkarna ino nintaa iyie anaa enatiu taata, te nkaraki entorroni e nkaji e Israel o enkaji e Yuda.

²⁷Ore eyia nejia, iting'iriakine iyie iyiook Olaitoriani te supatisho o lng'ur lino kitok,

²⁸anaa eniroro to sinka lino Musa teina olong apa nintanapa meigero inkitanapat inono te dukuya olosho loo Siraeli, ejo,

²⁹“Tinimining'nig'i oltolio lai, ena umata sapuk na ipupuo intae aaku kuti te siana tiatua inkuapi nalo aidapashaki intae.

³⁰Kayiolo ajo maaning'i nanu, amu iltung'ana oogol ong'u kake ore pee eyae eyararoto nerinyokino indamunot enye,

³¹na keyiolou ajo kara nanu Olaitoriani Enkai enye. Ekaisho nanu ninche oltau laaning o nkiyiaa naaning'isho;

³²naa kaisis nanu te nkop eyararoto enye, naa kedamu enkarna ai,

³³neibelekenya te ngolong'u o too nkiasin torok; amu kedamu inkoitoi o loo papa lenye, ootaasa eng'oki te dukuya Olaitoriani.

³⁴Ekayau intae ina kop apa naisiligie makewan ilo papa linyi, Abraham, Isak o Yakobo naa keigil aaku eninyi.

³⁵Kaitobiru olning'o lo ntarasi te nebo o ntae; Kaaku Enkai inyi niakuku iltung'ana laainei. Nemaitoki aikata aitayu intae iltungana le Israel, te nkop naishoo intae.