Read Maasai Bible – Biblia Sinyati Baruk 3 Bible Online

Baruk 3 - Maasai Bible – Biblia Sinyati bible

Baruk 3

¹“Olaitoriani, Enkai magilani e Israel, ore te nguton e nyamali ang o ltauja oonaurate nikinchiraki iyie.

²Toning'o iyiook Olaitoriani, ning'urrie amu kitaasa eng'oki te dukuya iyie.

³Intoreisho anaa Olaiguanani intarasi, kake aikiiye nikipuoyie intarasi.

⁴Olaitoriani Enkai e Israel, toning'o enkomono ang. Mikiinkash iyiook aalang ilootuata. Etaasa eng'oki iloo papa tialo iyie, Olaitoriani Enkai enye. Etanyaita kining ninche iyie, nikinyamal iyiook te nkaraki ing'ok enye.

⁵Inchoo kirikino imbaa e ng'oki nataasa iloo papa, ore te rishata natiu inji, tadamu engolon ino o enkarna ino,

⁶amu ira olaitoriani Enkai ang na aikiisis iyie.

⁷Inchoo iyiook maturia iyie, pee kitum atoomon iyie. Ore kitii eyararoto, aikiisis iyie amu kimbelekenyate aaing'uaa ng'ok o loo papa.

⁸Indapashaka iyiook inkuapi, nintemena iyiook ninche, nesakut iyiook. Igira aitame iyiook te nkaraki ing'ok o loo papa ina kata pee kigolong'aki iyie, Olaitoriani Enkai ang.”

⁹Toningo inkitanapat e nkishui, iyie Israel, toning'u abaraki pee itum eng'eno nagut!

¹⁰Kainyoo Israel pee itii e nkop oo lmang'ati linono, inchere igira amoruau te nkop eeikinga? Nchere kisairkenioki olo tuata,

¹¹kinkenaki tenebo ilootii enemeneng'a?

¹²Itung'uiyie olkitamanyunoto le ng'eno nagut.

¹³Tinishomo apa too nkoitoi e Nkai, anaata ibikito te seriani intarasi.

¹⁴Inteng'enayu te wueji netii eng'eno nagut netii engolon netii ening'unoto pee itumoki atujurru ine netii inkolong'i kumok o enkishui o netii ewang'an o nkonyek o eseriani.

¹⁵Kaing'ae nanoto ewueji enye? Naa kaing'ae natijing'a atua enkaji enye nashumishoreki?

¹⁶Koree ilaitoriak loo nkuapi o lelo oitore ingu'esi e nkop?

¹⁷Lelo oodalare imotonyi o loing'ang'e, lelo ootushuma iropiyiani o saabu, lelo ooisilig iltung'ana nemeraposho too nena naatum;

¹⁸o lelo pooki oorretena eing'oru enkosholai te nkariyiano sapuk nemeibala esiaai enye?

¹⁹Etumutate nedoyio aapuo enemeneng'a, netudumunye lkulikae te rishata enye.

²⁰Etoduaa iltung'ana ooti ewang'an e nkolong, nemanyisho te nkop; kake eitu eiteng'ena inkoitoi e ng'eno aashu eyiolou inkotoi e ng'eno neitu etum ninye.

²¹Ore ilayiok lenye netapong'ori te nkoitoi.

²²Eitu ening'i ninye te Kanaani aashu te Temani

²³eishoi e Hagari naing'oru enkarriyiano te nkop, ilamirak le Merani o Temani ooinosu inkaatini neing'oru eyiolounoto neitu eyiolou enetumieki eng'eno nagut nemeyiolo inkoitoi e ng'eno nagut.

²⁴Oi iyie Israel, kebaa enkitoo e nkaji e Nkai! Nebaa esapuko oo lpolosien lenyena!

²⁵Aikitok nemeeta ilpolosien nemetemayu te nkadoro.

²⁶Teine etoiwuoki intiamasin sapuki apa naataa yiolot naa arriyiak to larrabal.

²⁷Eitu egelu Enkai ninche neitu eisho ninche enkoitoi e ng'eno

²⁸kake eidaaitie ninche amu meeta eng'eno nagut aashu ening'unoto.

²⁹Kaing'ae aikata nashomo keper neyau eng'eno aitadou too nkatampo?

³⁰Kaing'ae nashomo inaaiposha, netum eng'eno, neinyang'u te saabu?

³¹Meetae obo oyiolo enkoitoi enye ashu indamunot enyena.

³²Kake ore ilo oyiolo eng'eno nagut naa Enkai, neyiolo pooki toki. Neitayio ninye te ning'unoto enye, neitayu enkop te nkiterunoto neiput ingu'esi oo mpukunot pooki

³³ilo oirriwua ewang'an newang'u, neipot ninye neirukisho te nkuretisho;

³⁴newang'u ilakir neng'ida; neipot ninche neirukisho aajo, “Loolo iyiook!”

³⁵Enkai ang ena; meetae likai likintanyayukieki!

³⁶Eitobiriua inkoitoi pooki e ng'eno neisho ninye Yakobo osinka lenye o Israel nanyor.

³⁷Ore te siadi neewuo eng'eno nagut enkop nemany enkop te nebo o iltungana.