Read Maasai Bible – Biblia Sinyati Baruk 4 Bible Online

Baruk 4 - Maasai Bible – Biblia Sinyati bible

Baruk 4

¹Ore eng'eno nagut naa embuku oo nkitanapat e Nkai nabikoo intarasi. Ore lelo pooki ooibung ninye naa kebikoo intarasi, ore lelo lemeshilaa ninye naa keye.

²Imbelekenyayu iyie Yakobo niya ninye nilo te wang'an enye.

³Mincho enkitoo ino likae aashu nena dupot inono iltung'ana omon.

⁴Kishipa iyiook, Israel, amu aikiyiolo inaaitiship Enkai.

⁵Entagoluoto lo tungana laainei, intae oitudupaa enkarna e Israel!

⁶Mme te nkaraki emutata apa pee etimirakaki ntae inkuapi, kake eitarasayioki intae aaitarasaki ilmang'ati linyi amu intagoro Enkai.

⁷Amu intagoro ninye ilo oitobirua intae, ipololosakiki iloiriruani neme Enkai.

⁸Itorikinote Enkai oo ntarasi ilo oitubulua intae, neisinanuo Yerusalem nikintubulua iyie

⁹amu etoduaa engoro naewuo shumata iyie eing'uaa Enkai, nejo Entoning intae ile latia le Sion, eyawua Enkai osina sapuk shumata nanu;

¹⁰amu atoduaa rrindikisho oo layiok laainei o ntoyie aainei nayaua Enkai oo Ntaras shumata ninche.

¹¹Ore te nchipai naitubulua ninche kake airriwayie ninche to lkiyioi o to sina.

¹²Mincho hoo obo linyi eshipa tialo nanu, te nkaraki nara taata enkoliai, naatung'uayioki, aatung'uayioki mataa mijooni te nkaraki ing'ok oo nkera aainei, amu eibelekenyate ninche tialo inkitanapat e Nkai.

¹³Meeta ninche euriata e Nkai, eitu ninche epuo too nkoitoi oo nkitanapat e Nkai neitu epuoyie enkoitoi e supatisho.

¹⁴Enchoo elatia e Sion elotu; tadamu enkibung'ata oo layiok laainei o ntoyie aainei nayawua Enkai oo ntarasi shumata ninche.

¹⁵Eyaka ninche olosho le nkop nalakua metigilunore ninye, enkop nemeeta enkanyit, nairo enkutuk napaashari nemeeta enkanyit too ltung'ani kitok, nemeing'urrie enkerai.

¹⁶Eitapong'oitie inkolia oo layiok oonyorri neinosie osina enkitok nainosita eliyio aaya entito enye,

¹⁷Kake, kaji aiko pee aretu ntae?

¹⁸Amu ore oloyaua kuna nyamalaritin shumata iyie na ekikordu iyie too nkaik oo lmang'ati linono.

¹⁹Enchom inkera aainei amu aatung'auyioki ara mijooni.

²⁰Aitayio olkila laishopo too nkolong'i e seriani naishop ilkuniyiani laainei le nkomono, ekaishiraki Enkai oo ntarasi inkolong'i aainei pooki.

²¹“Entagoluoto inkera aainei, enchiraki Enkai, naa kekordu intae te ngolon e nkaina o lmang'atinta.

²²Atipika osiligi Enkai oo ntarasi meitajeu intae, neewuo enchipai enatii eing'uaa Ilo Sinyati te nkaraki olng'ur olotu too nkolong'i naataana eing'uaa olaitajeunoni loo ntarasi.

²³Airriwayie intae to lkiyioi o too nkishirat, kake kerrinyu intae Enkai te nchipai o eng'ida intarasi

²⁴amu ore anaa enatoduaa ile latia le Sion enkibung'ata inyi, keitoki aadol to nkolong'i naapuonu enjeunoto inyi te Nkai nalotu enitii te nkitoo sapuk o te karsisisho e Nkai oo ntarasi.

²⁵Enting'iria inkera aainei te nkaraki engoro naewuo shumata intae naing'uaa Enkai, etogiroitie intae ilmang'ati kake idolidolo te siokinoto emutata enye nirororo imurto enye.

²⁶Eima olayioni lai kiti enkoitoi torrono, ewaki anaa eluaata o nkerra nayaita olmang'atinta.

²⁷“Entagoluoto inkera aainei ninchirakiki Enkai, amu kedamu intae ilo oyawua shumata intae kuna.

²⁸Ore anaa eniterretenate aapuo aaing'uaa Enkai, entorinyunye eng'oru ninye.

²⁹Amu ore ilo oyawua ena torroni shumata iyie, naa keyau enchipai oo ntarasi o enkordunoto shumata iyie.”

³⁰Ntagoluoyu iyie Yerusalem amu ore ilo likimpot iyie na aikilejilej.

³¹Oi lelo likisilisilo neshipakino embatatata ino.

³²Oi nena anas naaisiayia inkera inyi anaa irrindiki, oi nena anas naang'amu ilayiok linono.

³³Amu ore anaa enashipakino embatatata ino te mutata ino, na ketum osomit.

³⁴Neya ina nawuasare te nkumoi enye, ore olwuasa lenye neitaai osina.

³⁵Kelotu enkima shumata ninye eing'uaa Enkai oo ntarasi too nkolong'i kumok o te rishata naado, ore te rishata naado na kemany iloiriruani.

³⁶Ing'ura oloosaen iyie Yerusalem nidol enchipai nagira alotu initii naing'uaa enetii Enkai!

³⁷Ng'ura ajo egira ilayiok linono aapuonu litaarayie apa, eiturruruoki ninche to loosaen o to loontoluo to rorei Lo Sinyati, eshipa te nkitoo e Nkai.