Read Maasai Bible – Biblia Sinyati Baruk 6 Bible Online

Baruk 6 - Maasai Bible – Biblia Sinyati bible

Baruk 6

¹Ena empalai nairriwaka Yeremia iltung'ana ootii Yerusalem eton eitu eyae eyararoto, olaiguanani le Babilon. Keimaki ena palai iutarot naishoo Enkai Yeremia pee eisho ninche.

²Ore te nkaraki ing'ok nitaasa te dukuya Enkai, ekeya intae Nebukadinesa, olaiguanani le Babilon eyararoto.

³Ibikibiki te yararoto ilarin kumok ishoritin naapishana; neitoki taa Enkai arrinyu intae aitung'uaa ine to sotua.

⁴Ore te Babilon naa idolidolo inkaitin naaitobiruno to suyai o saabu o noo lkeek naanapi too loilela loo ltung'ana neyau enkuretisho enkop pooki.

⁵Entorrip naa ate pee mitiuu anaa iloreren aashu inchosho eiput intae enkuretisho oo nkaitin te nidolidolo ilororani te dukuya o te siadi eserem inkaitin.

⁶Kake entejo too ltauja linyi, “Iyie ake Olaitoriani kiserem.”

⁷Etii olmalaika lai te nebo o ntae, neing'orita enkishui inyi.

⁸Ore ilng'ejepa le kuna aaitin neguetuno aaitobiraki nemurare saabu o enkosholai, kake meiro.

⁹Kedumu iltung'ana saabu neitobiru inkopiyiani oo lukuny oo nkaitin enye, anaa enaitobiraki eselenkei nanyor imasaa.

¹⁰Ore too nkulie rishat neya ilapolosak kituaak saabu o enkosholai namurakino nena aaitin nepuo aamir aadupore maate,

¹¹neisho imulayoni embata e saabu o enkosholai. Keya iltung'ana kuna aaitin naaguetuno too nkeek o enkosholai o saabu neishopoki inkilani anaa iltung'ana.

¹²Ore duoo ninye neishopokini nena aaitin inkilani pilei anaa ilaiguanak, meidim aatorrip ate pee merruoyo nemeidim atorrip ate tialo oriri.

¹³Kejuti enterit too nkomomi enye naing'uaa enkaji naomonieki.

¹⁴Neibung isiaren too nkaik enye, kake meeta enkidimata naarie oloinyal ninche.

¹⁵Neibung ilalema too nkaik enye neeta ntoluo kake meeidim aaitajeu ate to larrabal o too lapurrok.

¹⁶Keutu kuna baa pooki ajo mme nkaitin naasipa neaku emiureyu nimiserememe.

¹⁷Ore anaa enatiu embakuli nadanya, neijia etiu inkaitin e nkop te nkaji enye e nkomono. Kebore enterit inkomomi enye naelie olorere ejing'u enkaji e nkomono.

¹⁸Ore sii anaa enaikenori oltung'ani oitagoro olaiguanani too nkaloli pooki anaa olotudung'okoki keeya, neijia eiko ilapolosak kituaak, keiken kutuk aji too lkonchii pee mepur ake ilapurrok.

¹⁹Neinuaaki nena aaitin iltaii alang enainuaaki ate hoo nemedol nena aaitin ilelo taai.

²⁰Etiu ninche anaa orishina le nkaji e Nkai oinosa oriri nenya sii inkilani sidan enye nemeyiolou nena aaitin.

²¹Ore inkomomi enye neitoroka empuruo naing'uaa enkaji e nkomono.

²²Ore nagor kewan o sarampalani o nkulie motonyi neitashe too lukuny enye netonie mpuusin.

²³Ore kuna pooki neitadedeyie ajo mme nkaitin naasipa neaku emiserem ake ninche.

²⁴Etumuraki kuna aaitin te saabu pee eitisidan ninche, kake mesidanu o metujuti.

²⁵Keinyang'uni kake meishu ninche.

²⁶Kenap iltung'ana too loilela amu meeta ninche inkejek neitodolu ajo mme ine tipat.

²⁷Ore lelo ooisiaai ninche naa kedol enkurruna amu ninche oodumu aitasheyie kuna aaitin pee mebatata ake. Ore tenedumuni nabo enye, nemeigutie kewan. Ore te neitasheyie oltung'ani nabo, neitoki aigut te neiragieki, nemedumu kewan. Ore te neishori inkishoorot netiu anaa olmeneng'ani eishoritai.

²⁸Ore ilapolosak kituaak nemir inkishoorot naaishori kuna aaitin neasishore impisai, neijia ake etiu sii inkituaak enye, keisudoo nemeisho hoo ilaisinak aashu ilemeidim ate.

²⁹Ore ilasarri lenye naa keibung inkituaak naata olapa aashu naatoishote. Ore naa anaa enitayioloito ajo mme nkaitin emiserem ake.

³⁰Kaji eiko pee eji inkaaitin, tenaa keisho inkituaak inkishoorot, kuna tokitin naitobiruno to nkeek o enkosholai o saabu?

³¹Ore te nkaji enye e nkomono naa ketonie ilapolosak kituaak ilkilani lenye, nebarni ilmunyo lenye nemeimulumul ilukuny enye.

³²Kebuak ilapolosak te dukuya inkaitin enye anaa enaas ilkumok te nkata enukaroto o ltung'ani otua.

³³Keya sii ilapolosak inkilani oo nkaitin enye neishopoki inkituaak enye o nkera enye.

³⁴Ore te neitaas oltung'ani entoroni nemeidim atorinyu esidai. Meidim aaitasheyie olaiguanani nemeidim aaiwuang'ie te nkitoo.

³⁵Nemeidim aishooi karsisisho aashu impisai, ore pee eitayu obo enkisiligata nemeitabaya, nemeikilikuanu.

³⁶Nemeidim aaitajeu oltung'ani te keeya aashu eitajeu olaisinani to ltung'ani ogol.

³⁷Nemeidim aatabol inkonyek o lmodook; mmeidim atokordu oltung'ani onyamal.

³⁸Meidim aing'urie enkoliai aashu eitaas esidai enkerai okishi.

³⁹Ketiu kuna tokitin naaitobiruno to nkeek nemurakino saabu o enkosholai anaa isooito ooing'uaa oldoinyo, ore lelo oisiaai ninche naa keitukurruni.

⁴⁰Kainyoo naa pee edamu pooki ng'ae ajo nkaitin, aashu eipot ajo nkaitin? Ore ile Babilon nemeyanyit ninche inkaitin enye.

⁴¹Ore te nemeiro oltung'ani, neya ninye enkaji e nkomono neikilikuan Bel pee eisho enkidimata nairorie, netiu duoo anaa kening'u Bel aitoki.

⁴²Kake ore te neyiolou iltung'ana aajo meretu inkaitin enye ninche na keitoki ake aaserem te modai.

⁴³Ore inkituaak nerrotiana netoni te mbata e nkoitoi, nepej enkoropil neas esiaai o mulayoni, ore pee elo nabo aloloito, neshukunye aitang'or ina naboitare ajoki mme sidai anaa ninye pee eitu eloloitoreki.

⁴⁴Ore pooki toki naipirta kuna aaitin naa elejare. Kaji eiko pee edamu oltung'ani ajo nkaitin aashu eipot ajo inkaitin?

⁴⁵Ilkunono ooitobiru o laguetak lo nkeek, neemeaku aitoki aikata meteleku ina nayieu ilaitobirak neaku.

⁴⁶Ore ninye ilaitobirak le kuna aaitin nemebik oleng, kaji naa eiko pee eaku kuna tokiting inkaitin enye naa ninche ooitobir?

⁴⁷Enkurruna ake o elejare eing'ueiki eishoi enye.

⁴⁸Ore pee epukoki ninche olarrabal o enyamali neikilikuana ilapolosak kituaak aajo kaji eisudoriyie tenebo o nkaitin enye.

⁴⁹Kaji naa eiko pee medoli aajo mme nkaitin kuna amu meidim aaitajeu ate to larrabal o enyamali?

⁵⁰Ore amu too nkeek eitobiruno nemurakino saabu o enkosholai, keyiolouni te siadi aajo elejare ake.

⁵¹Keibalunyeki too loshon o too laiguanak ajo mme nkaitin kake esiaai oo nkaik oo ltung'ana neme esiai Enkai

⁵²naa keishaakino pee eyiolou pooki ng'ae ajo mme nkaitin.

⁵³Ore kuna aaitin nemeidim aaitayu olaiguanani aashu eyau enchan

⁵⁴nemeidim aiguanare mbaa enye maate aashu ekordu oloinyalaki, amu meeta enkidimata, netiu anaa imotonyi naapuo to loing'ang'e.

⁵⁵Ore te neibung enkima enkaji natii nkaitin o nkeek nemuraro te saabu aashu te nkosholai neisik ilapolosak aailany enkima kake kenya inkaitin enkima anaa olchata.

⁵⁶Meeidim sii aataarare ilaiguanak aashu epuo olarrabal aarare ilmang'ati. Kaji eiko pee eiruk oltung'ani ajo inkaitin?

⁵⁷Ore kuna aaitin naaguetuno netii enkosholai o saabu meeidim aatorrip ate tialo ilapurrok

⁵⁸oopurroo enkosholai o saabu o nkilani neya pooki. Esipa, meeidim aataret ate katukul.

⁵⁹Neaku enaikash olaiguanani oitodolu empijan enye, aashu emasai enkaji naisiai olopeny, alang te niaku kuna aaitin nemesipa, enaikash ninye kutukaji e nkaji narrip ina natii atua aji alang nena aaitin nemesipa, enaikash sii eng'ape te nkaji o laiguanani alang kuna aaitin nemesipa.

⁶⁰Eitobirua Enkai enkolong o lakir neitawang enkop neirriwaa te nkisiaayiare neyanyit ninye.

⁶¹Nejia ake etiu enkiwuang'ata eiwuang, kedol pooki ng'ae, nejia sii etiu osiwuo ekutu te nkop pooki.

⁶²Ore pee eitanap Enkai inkatampo pee epuo te shumata enkop pooki nesuj inkitanapat enyena.

⁶³Ore enkima nairriuno te shumata meidaikie ildoinyo o lkeek naa keas anaa enaitanapaki. Kake ore kuna aaitin naaitorisiokini Enkai nemeidim ataas kuna baa.

⁶⁴Meishiaakino naa pee eji inkaitin, amu meidim ninche aitaasa oltung'ani esidai aashu entorrono.

⁶⁵Iyiololo ajo mme nkaitin ninche neaku emiserem ake

⁶⁶amu mesakutisho nememayianisho ninche,

⁶⁷nemeidim aitodolu ilmonek te shumata o to nkuapi, aashu ewang'u anaa enkolong aashu eishoru ewang'an anaa olapa.

⁶⁸Keikash ing'uesi e ntim alang ninche amu keidim aaisika neimulumula neret ate.

⁶⁹Neaku kesipa ajo mme nkaitin - kuna, emiserem ake.

⁷⁰Ore kuna aaitin enye naaitobiruno too nkeek nemurare enkosholai o saabu na pesho ake, meidim aatorrip hoo nyoo.

⁷¹Ore ake eyia, ore inkaitin enye o nkeek naamuraro te saabu o enkosholai nenyaanyukie entim oo lkiku te nkurma natonie imotonyi pooki o loing'ang'e; netiu ana iseseni ootuata ooiturrayioki aanang'aki enaimin.

⁷²Kemuta lelo kilani mugiein ooishop, neaku aikiyiolo ajo mme nkaitin. Ore te siadi naa kenya oriri nemeitoki aata tipat te nkop.

⁷³Enaikash naa oltung'ani asipani lemeeta inkaitin oo nkitanyaanyukot amu mekurru aikata.