Read Maasai Bible – Biblia Sinyati Esekiel 21 Bible Online

Esekiel 21 - Maasai Bible – Biblia Sinyati bible

Esekiel 21

¹Nelotu ororei lo Laitoriani enatii aajoki:

²“Enkerai e tung'ani, intorioki enkomom ino enkalo e Yerusalem niliki ororei aarare nena wuejitin sinyat; imbonoki tigilunore enkop e Israel

³nijoki ina kop e Israel, Inji ejo Olaitoriani: Ing'ura ekaarare iyie, naa kaaitorioki iyie olalem lashutu te nchashur enye, nadung'oo tiatua iyie lelo supati o ltorrok.

⁴Ore amu kadung'oo te iyie lelo supati o lelo torrok, neaku kepuku olalem lai aing'uaa enchashur enye aarare iltung'ana pooki eiteru te kopikop o meshomo moikuape;

⁵neyiolou iltung'ana pooki aajo Kara nanu Olaitoriani otushutua olalem lai te nchashur; nemeitokini aaigil aashukoki olalem enchashur.

⁶Iyagie naa, enkerai e tung'ani; iyagie oltau omu keeta osina to ltau le mion te dukuya nkonyek enye.

⁷Naa tinikinkilikuan ninche aajoki, ‘Kainyoo peyie iyagie?’ Naa ijoki, ‘Te nkaraki lelo kiliku oopuonu. Ore peyie ebau, naa kelepori pooki tau ore nkaik pooki naa keshalu, ore pooki tau neiterre neshalu nkung pooki anaa enkare. Ing'ura, ajo kelotu naa keitabari ninye.’ ” Ejo Olaitoriani Enkai.

⁸Nelotu ororei lo Laitoriani enatii naajoki,

⁹“Enkerai e tung'ani, imbonisho nijo, Ena ejo Olaitoriani: Olalem, eiyoki olalem, neiutuutoki aasik,

¹⁰aaii te nkaraki eyieng'are, netisikaki meimerlela anaa enkiwuang'ata! Aashu aikintobiru enkuenia? Itemenayie eng'udi, enkerai ai, o pooki toki e nchata.

¹¹Metaa eishooyioki olalem metisiki, peyie etumi aaibung'a neiyoki nesiki, peyie etumi aatipik ina aina oloyieng'isho.

¹²Inchira niyietu nakerai e tung'ani, amu kegilunore ninye iltung'ana laainei; kegilunore ninye iltung'ana pooki kituaak le Israel; etipikaki ninche pooki olalem tenebo iltung'ana laainei. Toosho naa enkupes ino.

¹³Amu meaku ninye entemata kaa keas ninye tinimenaa iyie engudi?” Ejo Olaitoriani Enkai.

¹⁴“Imbonisho naa, enkerai e tung'ani, toosho inkaik inono nincho olalem meeu adou katitin are, ee kat uni, ilo alem le lelo ooari metuata; olalem leyieng'are kitok, laa ninye oman ninche,

¹⁵peyie etum iltauja lenye aatalepori, nebatata ilkumok too nchomito enye. Aishorua ilo alem oimerlel; Aha! Eitobiruno ninye anaa enkiwuang'ata, netisikaki peyie etum ateyiengisho.

¹⁶Tudung'o oleng tatene o kedianye ine wueji netuutakaki enepi olalem.

¹⁷Ekaosh sii nanu inkaik aainei, naa kaitaraposh engoro ai; nanu Olaitoriani oiroro.”

¹⁸Neitoki ororei lo Laitoriani alotu enatii naajoki:

¹⁹“Enkerai e tung'ani, tuutu inkoitoi are te nkaraki ilo alem le ilo aiguanani le Babilon olotu; epuonu pokira are teinakop. Nintobiriri embao nautu eneimi, nipik ninye dukuya ina oitoi nalo enkanasa;

²⁰tuutu enkoitoi naaim ilo alem alo Raba oo Lamoni o meshomo Yuda o meshomo Yerusalem ina ang nasheta isunta.

²¹Amu eitasho olaiguanani le Babilon teine neorore inkoitoi te rishata e nena oitoi are, easishore enaibon; neikirikirie mbaa, neikilikuanishore enkitanyaanyukoto e nkai naji Terafi, neing'or emoinyua eina ng'ues naibonishore.

²²Ore atua enkaina enye e tatene nepuku enkukuo e Yerusalem pee ebol enkutuk enye te nkishirata, peyie eilepie oltoilo te mbuaata, pee eitorioki isekenke naagilieki nchomito neitasheyie nenen neesheta te ng'olon neshetu iltaleta ooibung'ishore.

²³Kake ore te ninche, netiu anaa enaibon elejare; einosa ninche ilmuma oogol; kake eyau ninye eng'oki enye metadamuni, peyie etumi aaibung'a.

²⁴“Metaa inji ejo Olaitoriani Enkai: Ore amu intaa ing'ok inono inaadamuni, teina nemeekure eisudoroyu intorrok inono, neaku ore too siaaitin inono pooki naa keibalayu ing'ok inono; amu ieuo iyie adamu; naa aikiya ninche iyie.

²⁵Ore iyie, intae iltung'ana torrok lemesinya, olkitok le Israel, ilo oewuo enkolong enye, erishata enkitamioto ino nabayie,

²⁶inji ejo Olaitoriani Enkai: Intayu enkarasha endukuya, nintayu ina maupe enkitoo; meitoki intokitin aatiu anaa enaikununo; isisa ina nidol etii abori, nintadou ina natii shumata.

²⁷Enkidaata, enkidaata, kaitobiru nanu enkidaata; metumi ninye eneima ninye o meeu ninye aa enenye esipata; naa ninye aisho nanu.

²⁸“Ore iyie, nakerai e tung'ani, imbonisho nijo: Inji ejo Olaitoriani Enkai tialo Ilamoni, neipirta sii enkurruna enye; tejo, Olalem, olalem etushurtuaki peyie eyieng'ishoi, netisikaki meimerlela anaa enkiwuang'ata,

²⁹ore edol ninche te ntae induaat elejare ina kata eibonoki ninche intae elejare, peyie eeniki imurto e lelo tung'ana lemesinya torrok, lelo ootabaikia ninche enkolong enye enkata enkitamioto enye nabayie.

³⁰Tushukoki olalem enchashur enye. Teine wueji nikintobirieki iyie, teinakop apa ning'uaa ekaaiguanare nanu iyie.

³¹Naa kabukoki shumata intae engoro ai; nakutaki intae enkima engoro ai; naa kapik intae inkaik oo ltung'ana arruok meidaikie.

³²Iakuku intae ilkeek le nkima; ore osarge linyi nejing empolos e ina kop; meitokini aekata aadamu intae; amu nanu Olaitoriani oiroro.”