Read Maasai Bible – Biblia Sinyati Esekiel 24 Bible Online

Esekiel 24 - Maasai Bible – Biblia Sinyati bible

Esekiel 24

¹Ore to lari le naaudo to lapa le tomon, te nkolong e tomon o lapa, nelotu ororei lo Laitoriani enatii naajoki:

²“Enkerai e tung'ani ing'ero enkarna ena olong, etamuata olaiguanani le Babilon Yerusalem.

³Niro endung'et e rashe te nkaraki ina aji kiserut nijoki ninche, inji ejo Olaitoriani Enkai:

⁴Intasheyie ina moti, intasheyie ninye, tubukoki ninye enkare; tipika ninye indung'ot oo nkiri, nena dung'ot pooki sidain, enkupes o orony; nimput ninye too loik sidain gelunot.

⁵Iwa enker naisul eluaata, nipik ilkeek le nkima abori enye; nintokitokie indung'ot enyena, nintokitokie sii iloik lenyena tiatua.

⁶“Metaa inji ejo Olaitoriani Enkai: Woi iyie ina anasa osarge, ina nanyaanyukie emoti nainosa enkop, neton ake eitu eing'uaa ninye oloirerio lenye! Intayu te ninye indung'ot iitu, miata enigelu te nkukuo.

⁷Amu ore osarge oibukoyie ninye neton ake etii atua erishata enye; eiteleiki ninye enchumata endapidapoi nasipa eitu ninye ebukoki pee eitoipoo enterit.

⁸Peyie edumu engoro ai napi, peyie aitalaku, atipika ninye shumata endapidapoi nasipa ilo sarge oibukoyie ninye peyie meitoipori ake.

⁹Neaku inji ejo Olaitoriani Enkai: Wooi iyie ina anasa naibukori osarge! Kaitaa sii nanu osototi loo lkeek sapuk.

¹⁰Turupa ilkeek ninok enkima, nintokitokie oleng nena kiri nibuku nena tokitin naapiki ndaiki, nincho iloik epejori.

¹¹Nintasheyie ninye metii toki te shumata nkuk, peyie etum airowuaja, ore osuyai lenye nepeji peyie aa ore oloirerio lenye nesholi tiatua ninye, nemuti kutu enye.

¹²Te mpesho aitanaura nanu kewan, ore ina kutu enye nairrusha nemeim enkima.

¹³Ore ina kutu enye naa olduruk le nkiborra ino oo nkonyek. Amu anaata apa aaitukuo iyie neitu eitukuori olduruk lino. Mikintokini aaituku iyie aaigil o metaba anaa naidip aishu engoro ai te iyie.

¹⁴Nanu Olaitoriani oiroro; naa kelotu aasayu ina, ekaas nanu; marrinyo nanu siadi, maaleku nanu, mairridu nanu; ore te risioroto oo inkoitoi inono o siaaitin inono ekaaiguanare nanu iyie ejo Olaitoriani Enkai.”

¹⁵Ore ake sii eewuo ororei lo Laitoriani enatii naajoki,

¹⁶“Enkerai e tung'ani, ng'ura ajo etaa kaya enchipai oo nkonyek inono peyie aaitung'uaa iyie te oshoto, niminchir hoo aashu isinanuo nemedou ilkiyio linono.

¹⁷Iyang'a kake mibuaku; minchiraki ake lelo meneng'a. Teena enkarasha ino elukunya, nipik inkejek inono inamuka; niminuk ake enkutuk ino, aashu inya endaa e lelo ooishir.”

¹⁸Neaku airorie nanu lelo tung'ana tadekenya, ore teipa neye enkitok ai, ore enkolong entadekenya nasuju naas ina naaitanapaki.

¹⁹Naajoki nanu iltung'ana, “Aimiliki iyiook enautu kuna baa te iyiook, paa ninche iasita?”

²⁰Ina peyie ajoki ninche, “Aairorie Olaitoriani naajoki:

²¹‘Tiaaki ina aji e Israel, Inji ejo Olaitoriani Enkai: ng'ura ajo kaisarkionie ewueji ai sinyati o lwuasa le ng'olon ino o enchipai oo nkonyek inono o eyieunoto oltau lino; ore ilayiok linono tenebo ntoyie inono nena nitung'uayie te siadi naa kebatata to lalem.

²²Naa ias iyie anaa ina nataasa; minuk iyie enkutuk ino, aashu inya endaa e lelo ooishir.

²³Ore inkarash inono e lukunya naa ketii ilukuny inyi netii inamuka nkejek inyi; nimisinanuonuo aashu inchirishiri, kake iishunyenye aamuta te nkaraki ing'ok inyi ning'orokinono maate.

²⁴Neaku neijia etiu Esekiel te iyie aaku olmonekie; te risioroto e nena pooki naataasa ias sii iyie. Ore peyie elotu ena naa iyiolouu taa aajo Kara nanu Olaitoriani Enkai!’

²⁵“Ore iyie nakerai e tung'ani, ore teina olong naya aitung'uaa ninche isempewueti lenye, enchipai enye o enkitoo enye o enchipai oo nkonyek enye o iyieunot oo ltauja lenye, tenebo sii ilayiok lenye o ntoyie enye,

²⁶ore teina olong naa keisiku olaishirani ayaki intae lelo omon.

²⁷Ore teina olong naa ibolokiki ilo aishirani nkutukie inyi neaku iroro nimintokiki aaku ilemeidim aairoro. Neaku iakuku intae olmonekie te ninche; neyiolou ninche aajo Kara nanu Olaitoriani.”