Read Maasai Bible – Biblia Sinyati Esekiel 26 Bible Online

Esekiel 26 - Maasai Bible – Biblia Sinyati bible

Esekiel 26

¹Ore to lari le tomon oobo, te nkolong e dukuya o lapa, nelotu ororei lo Laitoriani enatii naajoki:

²“Enkerai e tung'ani, ore amu etejo Tiro embae naipirta Yerusalem ejo, ‘Aha, ore ina kishomi oo loreren netigilaki, etabole tukul aisiu te nkaraki nanu; ekaaitasheyieki nanu, ore naa amu eitomijoonoki,’

³neaku inji ejo Olaitoriani Enkai: Ing'ura ajo kaarare iyie, iyie Tiro, naa kayau iloshon kumok mikitaarare iyie, anaa enayau enaiposha ilopir lenyena.

⁴Kemut ninche isunta e Tiro, negil auroo iltaleta lenyena; naa keoroo enterit aitung'uaa ninye neitaa ninye endapidapoi nasipa.

⁵Keaku ketii ninye empolos e naiposha ewueji neisalaashieki irresheta; amu airoro nanu, ejo Olaitoriani Enkai; naa keaku ninye entoki naaruno too loreren.

⁶Ore intoyie enyena naatii enkop natoyio naa keyieng'i to lalem. Ina peyie eyiolou aajo Kara nanu Olaitoriani Enkai.

⁷“Amu inji ejo Olaitoriani Enkai: Ing'ura ajo ekayau shumata e Tiro eiteru te moikuape Nebukadnesa olaiguanani le Babilon, olaiguanani loo laiguanak, eeta imbartan oo ngarrin enye tenebo ilakedok loo mbartan tenebo olorora loo sikarini kumok.

⁸Kear ninye to lalem intoyie inyi naatii enkop natoyio; naa kemuat aaman ninche esuntai nagol nikiarare, nashetaki intae oltim aagilunore intae, neitasheyie ilchureta o long'oi aarare intae.

⁹Ekeitorioki ninye intae imasaa oo sekenke agilunore isunta inyi ore too ntoluo enyena naa keuroo iltaleta linyi.

¹⁰Keaku kumok oleng imbartan enyena metaa ore enterit enye neitoipoo intae; ore isunta inyi naa keigusugus te ilo toilo le lelo akedok loo mbartan tenebo ngarrin oo mbartan, tenejing atua inchomito inyi anaa oltung'ani ojing enkanasa natumutaki naata ilusien too sunta.

¹¹Ore too loisotok loo mbartan enyena naa keituny inkoitoi dapashi e nkanasa inyi naa kear iltung'ana linyi to lalem; ore ing'apeta inyi kituaak naa kesulakini enkop.

¹²Keitaa ninche iyarunot e karsisisho inyi imasaa enye; anaa eng'ues entim imasaa inyi e biashara naa kesulaa ninche isunta inyi neinyal inkajijik inyi sidain; ore isoito linyi o mbaoi o enterit naa kenang'akini empolos oo nkariak.

¹³Naa kaitasheyie eranyare oo sinkolioitin linyi, ore oltoilo loo wululi loo usin inyi nemeitokini aekata aaning.

¹⁴Ekaitaa intae endapidapoi nasipa nemetii toki; iakuku intae ewueji neisalaashieki irresheta; nemeitokini aekata aashet intae; amu nanu Olaitoriani oiroro, ejo Olaitoriani Enkai.

¹⁵“Inji ejo Olaitoriani Enkai ajoki Tiro: amaa olmanie le naiposha aimeikirikira tenening embuaata e mbatatata ino, ina kata naigor ilo otipikaki olbae, ina kata etii lelo ootipikaki ilbaa atua erishata inyi?

¹⁶Neaku ore lelo kituaak leina aiposha tenedou aaing'uaa ilorikan lenye le nkitoo, neitayu ilkilani lenye, neng'ishaa nena kilani enye naaikodo; naa keishopoki ate enkuretisho; Eketoni ninche te nkop neikirikira anaa adake, neureyu intae oleng.

¹⁷Naa kedumu enkishirata aaishiraki intae, nejoki intae ‘Kaji inkuna peyie iisha too naaiposha, iyie na anasa yioloti, ina apa magilani teina aiposha, iyie o lelo likimanya, lelo ooikonyu olkirutoto lino, tiatua enkop natoyio!

¹⁸Eikirikira ile mankale[6] teina olong ino embatata; ee, lelo loo lemankale ootii enaiposha neing'asia ina kata niishunye!’

¹⁹“Amu nji ejo Olaitoriani Enkai. Ore ake peyie aitaa enkanasa ino, anaa inkanas nememanya, ore peyie ayau ailepunye enegut peyie aaitoip iyie nikintoip iyie nkariak sapuki,

²⁰neaku kaanang'aki iyie abori tenebo lelo oodoyio aapuo engumoto, ine netii iltung'ana liopa, naaitaa iyie olobik to lodo le nkop, tenebo lelo apa ooidaaitie te dukuya tenebo lelo oopuo abori ina gumoto, metaa mikintokini aamanya aashu iatata ewueji te nkop oo looishu.

²¹Kaayau iyie apik enkiting'oto torrono, nimintoki aekata atii; hoo naa aiking'oruni iyie, kake mikintokini aekata aatum aaigil, ejo Olaitoriani, Enkai.”