Read Maasai Bible – Biblia Sinyati Esekiel 29 Bible Online

Esekiel 29 - Maasai Bible – Biblia Sinyati bible

Esekiel 29

¹Ore to lari le tomon, lo lapa le tomon, te nkolong e tomon aare o lapa, nelotu ororei lo Laitoriani enatii nanu naajoki:

²“Enkerai e tung'ani, impirare taarare Farao olaiguanani le Misiri, nimbonoki aarare ninye niarare sii Misiri pooki.

³Irorie nijo, inji ejo Olaitoriani Enkai: “Ing'ura ajo kaarare iyie, Farao olaiguanani le Misiri, ilo asurai kitok olejisho, te mpolos oo nchorroi enyena, ina najo, ‘Ore olkeju le Nail naa olalai ake; nanu oitobirua ninye.’

⁴Ekaapik ilala oololo iltagiligil linono, naisho lelo sinkir loo nchorroi inyi mikimbung'a iyie akurraki, naa kaaitayu iyie aitupuku te mpolos oo inchorroi inono, nena nikimbung iyie.

⁵Naa kaanang'aki iyie ong'ata, iyie tenebo lelo sinkir pooki loo nchorroi inono; isulakinono enkoriong e ong'ata naisiasha, nemeiturrurri intae aapuo aanukaa. Meinosa intae ing'uesi e ina kop o montonyi o loing'ang'e, aaishooyie iyie taa endaa enye.

⁶“Ina peyie eyilou lelo pooki oomanya Misiri aajo Kara nanu Olaitoriani. Amu itaa apa iyie eng'udi entiyani te nkaji e Israel.

⁷Ore tinikimbung ninche iyie te nkaina, nigiligili, nipolososo iloilila lenye pooki; naa tenepetaa ninche intae, nigiligili, ninchosho impolosi enye pooki meikirikirata.

⁸Metaa inji ejo Olaitoriani Enkai: Ing'ura ajo, ekayau olalem shumata iyie, naa kadung'oo te iyie oltung'ani o eng'ues;

⁹ore ina kop e Misiri neaku mitil nemeeta toki natii. Ina peyie eyiolou ninche aajo Kara Olaitoriani. “Ore amu itejo iyie ore olkeju le Nail naa olalai, nanu oitobira,

¹⁰neaku ing'ura ajo kaarare iyie; naarare inchorroi inono, naa kaitaa enkop e Misiri enkop mitil nemetii toki, eiteru te Migdol ometabaiki Siene o meshomo abaiki olpolosie le Etiopia.

¹¹Meetae enkeju e tung'ani naim atua ninye, nemeetae enkeju e ng'ues naim atua ninye; keaku ninye mitil ilarin artam.

¹²Naa kaitaa enkop e Misiri enkop mitil tiatua nkuapi mitili; ore inkanas enyena neaku mijoonito ilarin artam tiatua nena anas naaidaikieki. Ekaidapashaki Ilmisiri iloreren, naidapash ninche too nkuapi.

¹³“Amu nji ejo Olaitoriani Enkai: Ore te nkiting'oto oo larin artam naa kaiturrurru Ilmisiri too loreren, lelo pooki ooidapashakaki ninche;

¹⁴naa kashukoki Misiri entonata enye e apake, nashukoki ninche ina kop e Patros, ina kop naa ninye apa eing'uaa; neaku ninye teine enkitoria nashal.

¹⁵Keaku ninye enkitoria nashal too nkitoriat pooki nemeitoki aekata aigil ailepie kewan too loreren; naa kaitaa ninche kiti oleng metaa meitoki aekata aaitore iloreren.

¹⁶Nemeitoki aekata aaku osiligi leina aji e Israel, edamu ing'ok enye, ina kata eibelekenyakino ninche eing'oru eretoto enye. Ina peyie eyiolou aajo Kara nanu Olaitoriani Enkai.”

¹⁷Ore to lari le tikitam o naapishana to lapa le dukuya, te nkolong e dukuya olapa, nelotu ororei lo Laitoriani enatii naajoki:

¹⁸“Enkerai e tung'ani, ore Nebukadnesa olaiguanani le Babilon neishoo enjore enye metaasisho oleng earare Tiro, ore pooki dukuya netabarnoki ore pooki oililai netujutoki aasip; ore ake eyia eitu hoo etum ninye aashu enjore enye ae toki naing'uaa Turopeyie elak ina siaai nataasa earare ninye.

¹⁹Neaku inji ejo Olaitoriani Enkai: Ing'ura ajo kaisho ina kop e Misiri Nebukadnesa olaiguanani le Babilon; naa kenap ninye arsisisho enye neitaa ninye enaaruno neidaikie ninye; naa keaku elaata enjore enye.

²⁰Aishoo ninye ina kop e misiri metaa olerrinyore teina naisiayua, amu nanu eisiaayia ninche, ejo Olaitoriani Enkai.

²¹“Ore teina olong naa kaitubulu emowuo tiatua enkaji e Israel, naa kabol inkutukie inyi tiatua ninche. Ina peyie eyiolou ninche aajo Kara nanu Olaitoriani.”