Read Maasai Bible – Biblia Sinyati Esekiel 30 Bible Online

Esekiel 30 - Maasai Bible – Biblia Sinyati bible

Esekiel 30

¹Nelotu ororei lo Laitoriani enatii; naajoki:

²“Enkerai e tung'ani, imbonisho nijo, Inji ejo Olaitoriani Enkai: “Teyietu nchira, ‘Woi ina olong!’

³Amu etinyikua ina olong! Etinyikua ina olong o Laitoriani; keaku enkolong oo nkatampo enkata enkidaaroto too loreren.

⁴Kelotu olalem shumata Misiri, nejing oloputukunyi sapuk Etiopia, ina kata nabatata lelo ooyieng'i te Misiri, nenapi karsisisho enye aaya, ore ilkitamanyunot nepolosi aauroo.

⁵“Ore Etiopia o Put o Lud o Arabia pooki, o Libya o iltung'ana pooki le nkop ooibung'are, naa kebatata te nebo to lalem.

⁶“Inji ejo Olaitoriani: Ore lelo ooretu Misiri naa kebatata, ore olwuasa lenye le ngolon enye nedou; eiteru te Migdol o meshomo Siene kebatatakino ninye to lalem, ejo Olaitoriani Enkai.

⁷Neaku ninye mitil tiatua nena kuapi mitili, ore inkanas enyena nejing empolos e nena anas naaitomijoonoki.

⁸Ina peyie eyiolou ninche aajo Kara nanu Olaitoriani, ina kata nainuaaki enkima Misiri, ore ilaretok lenye pooki negili.

⁹“Ore teina olong nepuo lelo kiliku ooisarrisar ooing'uaa enatii, aaiture lelo le Etiopia meiteiki. Nejing ninche emion o sina teina olong e nkidaata e Misiri, amu ng'ura ajo etabawua!

¹⁰“Inji ejo Olaitoriani Enkai: Ekaiting'ie karsisisho e Misiri, teina aina e Nebukadnesa olaiguanani le Babilon.

¹¹Ore ninye tenebo iltung'ana lenyena, inkuapi torrok oleng too loreren, eyauni ninche meidaikie ina kop; naa keshurtu ninche ilalema lenye aarare Misiri, neiput ina kop lelo meneng'a.

¹²Naa kaitoi nanu olkeju le Nail, namiraki ina kop inkaik oo ltung'ana torrok; Kayau ina kop aitaa mitil o pooki toki natii atua ninye teina aina oo ltung'ana leeiking'a nanu Olaitoriani oiroro.

¹³“Inji ejo Olaitoriani Enkai: Ekaidaikie nena kitanyaanyukot oo nkaitin nemeishu, naiting'ie nena kitanyaanyukot oo nkaitin naatii Memfis; meitoki atii aekata olkitok ina kop e Misiri; neaku kapik enkuretisho ina kop e Misiri.

¹⁴Ekaitaa Patros mitil, naisuroki enkima Soan nayau inkiaasin enkiguana shumata Tebes.

¹⁵Naa kabukoki engoro ai shumata Pelusium ilo sempewuet le Misiri, nadung'oo olorora le Tebes.

¹⁶Naa kaisuroki enkima Misiri; ore Pelusium neigor enkigoroto kitok; ore Tebes nepiki ilusien, ore isunta enyena neurori aasulaki enkop.

¹⁷Ore ilbarnot le On o Pibeset, nebatatakino ilo alem; ore inkituaak nepuo e yararoto.

¹⁸Ore te Tehafnehes keaku ina olong enaimin, ina kata nagil teine enkitoria e Misiri, ore ina golon enye olwuasa nebaiki enkiting'oto; keitoipi ninye te nkatampoi, ore ntoyie enyena nepuo eyararoto.

¹⁹Neaku neijia aikunaki endung'okinoto enkiguana shumata e Misiri, Ina peyie eyiolou aajo Kara nanu Olaitoriani.”

²⁰Ore to lari le tomon oobo, to lapa le dukuya, te nkolong e naapishana o lapa, nelotu ororei lo Laitoriani enatii naajoki:

²¹“Enkerai e tung'ani, atigila ina golon e Farao olaiguanani le Misiri, naa ing'ura, eton eitu erubi ninye, peyie eishiunyeki ninye te enata enkarasha, peyie metum ninye atagolo peyie meidim ayuko olalem.

²²Metaa inji ejo Olaitoriani Enkai: Ing'ura ajo, kaarare nanu Farao olaiguanani le Misiri, naa kagil inkaik enyena, pokira are, aa ina nagol o ina natigile; naa kaisho olalem lenye epuku te nkaina enye.

²³Ekaidapashaa Ilmisiri tiatua iloreren, naidapashaa ninche tiatua iloreren tiatua inkuapi.

²⁴Naa kaitagol enkaina e ilo aiguanani le Babilon, napik enkaina enye olalem lai; kake kagil nena aik e Farao naa keigor te dukuya ninye anaa oltung'ani otipikaki olbae aaidop.

²⁵Ekaitagol nena aik o laiguanani le Babilon, kake ore nena aik e Farao naa kebatata; naa keyiolou ninche aajo Kara nanu Olaitoriani. Ore ina kata napik olalem lai inkaik olaiguanani le Babilon, naa keitorioo ninye aarare ina kop e Misiri;

²⁶naa kaidapashaki Ilmisiri atua iloreren, naidapashaa meshomo too nkuapi pooki. Ina peyie eyiolou ninche aajo Kara nanu Olaitoriani.”