Read Maasai Bible – Biblia Sinyati Esekiel 32 Bible Online

Esekiel 32 - Maasai Bible – Biblia Sinyati bible

Esekiel 32

¹Ore to lari le tomon aare, to alapa le tomon aare, te nkolong e dukuya o lapa, nelotu ororei lo Laitoriani enatii naajoki:

²“Enkerai e tung'ani, teyietu inchiraki Farao olaiguanani le Misiri nijoki ninye: “Itadamua iyie aitaa kewan olng'atuny tiatua iloreren, kake itiu iyie anaa olasurai otii inaaiposha; idanya iyie apuku too lkejek linono, nintanyamal inkariak too nkejek inono, nindurukie ilkejek lenye.

³Inji ejo Olaitoriani Enkai: ekanang'aki orreshet lai shumata iyie; tenebo olorora sapuk loo ltung'ana; naa kaaikurtutaa iyie tiatua orreshet lai.

⁴Naa kaanang'ie iyie enkop, ore te nkong'ata naisiasha naayieng iyie naisho ilmotonyi pooki lo loing'ang'e mikitadoiki iyie, naitaraposh ng'uesi enkop te iyie.

⁵Naidapashaki inkiri inyi inchumat oo ldoinyo, naiput inong'ot too mpopoki inono.

⁶Naa kaitadooyo osarge lino te nkop o too ldoinyo; nimput iyie lelo shorroi.

⁷Ore peyie aajutoo iyie, naa kaitoip keper o loing'ang'e lenye, naitomisimis ilakir lenye; naa kaitoip enkolong te nkatampoi, nemeitoki olapa aitayu ewang'an enye.

⁸Ore ilkilang'ilang'eta pooki le shumata na kaitomisimis te shumata iyie, napik enaimin shumata enkop ino ejo Olaitoriani Enkai.

⁹“Ekaitanyamal sii iltauja loo ltung'ana kumok, ina kata naaya iyie eyarunoto tiatua iloreren, naapik iyie inkuapi neitu iyiolou.

¹⁰Ekaisho iltung'ana kumok meing'asiata te nkaraki iyie, ore ilaiguanak lenye neilanyisho te nkaraki iyie, ina kata naiwul olalem lai te dukuya ninche; naa keikirikira pooki kata, pooki ng'ae te nkaraki enkishui enye, teina olong embatatata ino.

¹¹Amu inji ejo Olaitoriani Enkai: Ore ilo alem lo laiguanani le Babilon naa kelotu shumata iyie.

¹²Ekaitaa olorora linyi metabatatata too lalema loo lmagil, ninche pooki lelo torrok oleng too loreren. “Naa kayau aitaa olemeetae ilo wuasa le Misiri, ore ilororani lenyena pooki naa keish.

¹³Kaidakie nanu ing'uesi enyena pooki, too nkiyopat oo nkariak kumok; nemeetae enkeju e tung'ani naitoki aitanyamal ninche aigil, nemeitoki lelo oisotok loo ng'uesi aaitanyamal ninche.

¹⁴Ina peyie aitaa nkariak enye inaasila, naisho ilkejek lenye meturukoto anaa eilata, ejo Olaitoriani Enkai.

¹⁵Ore ina kata naitaa enkop e Misiri mitil, o ina kata nakinyi enkop te pooki nabore, o ina kata naosh lelo pooki ootii atua ninye, naa keyiolou ninche aajo Kara nanu Olaitoriani.

¹⁶Ore ele naa osinkolio lo lkiyioi opuoi aarany; ore nena toyie oo loshon nepuo aaranyaki; Misiri tenebo lelo pooki ororani lenyena, kepuo ninche aarany ilo sinkolio ejo Olaitoriani Enkai.”

¹⁷Ore to lari le tomon o are, to lapa le dukuya, te nkolong e tomon o imiet o lapa, nelotu ororei lo Laitoriani enatii naajoki:

¹⁸“Enkerai e tung'ani, inchiraki ilo orora le Misiri nirriwaa ninche abori, ninye tenebo nena toyie kituaak oo loreren, ine olodo le nkop, enetii lelo ooshomo abori enemeneng'a ijoki ninye:

¹⁹‘Aing'ae doi italang'a iyie te nkishiaa? Shomo abori, nikirragieki iyie tenebo ilememurata.’

²⁰“Kebatatakino ninche erishata e lelo ootaraki to lalem, ore tenebo ninye neirrag olorora pooki lenye.

²¹Ore ilaiguanak magil naa keimaki imbaa naaipirta ninche, tenebo ilaretok lenye, tiatua empolos e nemeneng'a ejo: ‘Etadoutuo ninche abori, neirrag aaitirring'a, lelo lememurata, ootaraki to lalem.’

²²“Etii sii Asiria ine, tenebo olorora lenye pooki, nemanita ninye inkuraren enye, lelo pooki ootaraki, ootumutaki to lalem;

²³lelo ootipikaki nkuraren enye nene wuejitin neegut oleng e nemeneng'a nemanita olturrur lo lorora enkurare enye, etaraki pooki aabatat to lalem, ilo oidapashaa olkirutoto tiatua ina kop oo loishu.

²⁴“Eti sii Elam ine, nemanita ninye olorora lenye pooki enkurare enye; netaaraki pooki, aabatat to lalem, lelo lememurata ooshomo atua olodo le nkop, lelo oidapashaa olkirutoto teinakop oo looishu, neya enkurruna enye tenebo lelo oopuo abori eng'umoto.

²⁵Eitobirakita ninye endapash tenebo lelo ootaraki to lalem tenebo olorara nemanita ninye inkuraren enyena, lelo pooki lememurata lelo ootaaraki to lalem; amu eidapashakaki olkirutoto lenye ninche ina kop oo looishu, nenap ninche enkurruna enye tenebo lelo oopuo adoyio aapuo eitaboitakaki ninche lelo ootaraki to lalem.

²⁶“Etii sii ine Meshek o Tubal, tenebo olorora lenye pooki, emanita inkuraren enye ninche, lelo pooki lememurata, ootaraki to lalem; amu eidapasha ninche olkirutoto teinakop oo loishu.

²⁷Nemeirrag ninche tenebo lelo ootabatatate magil liopa lelo ooshomo abori enemeneng'a tenebo imasaa enye olarrabal, lelo ooiteleikiaki ilalema lenye abori ilukuny enye, ore ilong'oi enye neiteleikino iloik lenye; amu ore olkirutoto le lelo tung'ana magil netii enkop e lelo ooishu.

²⁸Metaa aikigili iyie nikirragieki tenebo lelo lememurata, tenebo lelo ootaraki to lalem.

²⁹“Etii sii Edom ine o ilaiguanak lenyena tenebo ilkituaak lenye pooki, laa ore te ngolon enye pooki neirragieki tenebo lelo ootaraki to lalem; neirrag ninche tenebo lelo lememurata, tenebo lelo oopuo abori enemeneng'a.

³⁰“Etii sii ilkituaak le moikuape ine ninche pooki tenebo ile Sidon pooki lelo ooshomo abori te nkurruna tenebo lelo ootaraki, tenebo ina kirutoto pooki nayautua te nkaraki olkirutoto lenye eirragie ninche memurata tenebo lelo ootaraki to lalem, nenap enkurruna enye tenebo lelo oodoyio aapuo enemeneng'a engumoto.

³¹“Ore peyie edol Farao ninche, neilejilej kewan to lorora lenye pooki, ore Farao tenebo enjore enye pooki naaraa to lalem, ejo Olaitoriani Enkai.

³²Amu eidapashayie olkirutoto te nkop oo looishu; metaa keirragieki ninye tenebo lelo lememurata, tenebo lelo ootaraki to lalem, Farao tenebo olorora lenye pooki, ejo Olaitoriani Enkai.”