Read Maasai Bible – Biblia Sinyati Esekiel 35 Bible Online

Esekiel 35 - Maasai Bible – Biblia Sinyati bible

Esekiel 35

¹Nelotu ororei lo Laitoriani enatii aajoki:

²“Enkerai e tung'ani, impirare oldoinyo le Seir, nimbonoki aarare ninye.

³Nijoki ninye, Inji ejo Olaitoriani Enkai; Ing'ura ajo, kaarare iyie oldoinyo le Seir, naa kaaitorioki enkaina ai aarare iyie, naa kaaidapash iyie naaidaikie naitaa ene pesho.

⁴Ekaidaikie inkanas inono niaku iyie mitil; ina pee iyiolou ajo Kara nanu Olaitoriani.

⁵Amu inyor iyie emang'atisho e anaake, ninchoo lelo tung'ana le Israel engolon o lalem te nkata e ngolikinoto enye, te nkata e mutata enye nabayie;

⁶metaa, ore anaa enaishu nanu, ejo Olaitoriani Enkai, asip ajo kianyita keeya nemeeta enilanyaki te nkaraki ilo sargelimbukoyie. Neaku kesuj intae ilo osarge.

⁷Ekaitaa oldoinyo le Seir olemetii toki, naitaa mitil; naa kadung'oo te ninye lelo pooki oopuonu atua aaparan nepuo.

⁸Naa kaiput ildoinyo linyi impopoki; o too ndoinyo inyi o too nong'ot inyi o iyarat o lashepak linyi pooki kebatata nena pooki to lalem.

⁹Naa kaitaa intae mitili anaake, ore inkanas inono nemeitokini aamany. Ina peyie iyiolou ajo Kara nanu ilo Aitoriani.

¹⁰“Ore amu itejo, ‘Ore kulo oshon pokira o kuna kuapi pokira naa keaku inaainei, naa aikintaa ninche inkunaang,’ ore hoo netii apa Olaitoriani ine,

¹¹neaku, ore anaa enaishu nanu, ejo Olaitoriani Enkai, ekaitaas intae anaa enatiu engoro o enkiba nintodolua te nkaraki enkiba aarare ninche; naa kaitayiolo nanu kewan tiatua intae, ina kata naiguanare intae.

¹²Naa iyiolouu aajo nanu, Olaitoriani otoning'o nena baa pooki torrok nitejo iararere lelo doinyo le Israel, ijojo, ‘Eitaaki ninche mitili, eishooki iyiook maidakie.’

¹³Nirupurupu intae ate oleng kiararere nanu too nkutukie inyi, niponaa irorei aitaa kumok kiararere nanu; natoning'o nanu ina.

¹⁴Inji ejo Olaitoriani Enkai: Ore te nkaraki enchipai enkop pooki ekaaitaa iyie mitil.

¹⁵Ore anaa enitishipakine ina jung'o enkaji e Israel, amu aimitil apa ninye, neaku kaarare sii nanu iyie; iaku sii iyie mitil, oldoinyo le Seir o Edom pooki, pooki elulung'a. Ina peyie eyiolou ninche aajo Kara nanu Olaitoriani.