Read Maasai Bible – Biblia Sinyati Esekiel 37 Bible Online

Esekiel 37 - Maasai Bible – Biblia Sinyati bible

Esekiel 37

¹Etii apa enkaina o Laitoriani shumata nanu, naaitupuku nanu te Nkiyang'et o Laitoriani, naaitoton nanu te mpolos e nong'oto; naa kebore apa ninye iloik.

²Naarik nanu aitaman ninche; nadol ajo ketii apa ina nong'oto iloik kumok oleng; netoito ninche oleng.

³Naajoki ninye nanu “Enkerai e tung'ani, keidim kulo oik aatopiu?” Nawaliki ajoki, “Iyie Olaitoriani Enkai, iyiolo iyie.”

⁴Naaitoki ake ajoki nanu, “Imbonoki kulo oik, nijoki ninche, intae kulo oik ootoito, entoning ororei lo Laitoriani.

⁵Inji ejo Olaitoriani Enkai ajoki kulo oik: eng'ura ajo kapik intae enkiyang'et najing atua intae, nipiuu.

⁶Naa kapik intae imorlooishi, naisho nkiri metijing'a intae, neitoip intae to lchoni lo sesen, napik intae enkiyang'et, nipiuu; niyiolouu aajo Kara nanu Olaitoriani.”

⁷Metaa aibonoko anaa enaaitanapaki; ore ina kata aibonisho, nelotu oltoilo nadol enkop eikirikira; nepuonu lelo oik aaibung'a maate, oloito ake o loito lenye.

⁸Ore aingorisho netii ninche imorlooishi, neetuo nkiri osesen aaibung'are ninche, neitoip olchoni ninche; kake metii apa enkiyang'et atua ninche.

⁹Ina peyie aajoki ninye nanu, “Imbonoki enkiyang'et, imbonoki, enkerai e tung'ani, nijoki enkiyang'et, inji ejo Olaitoriani Enkai: Wou too nkaloli pokira ong'uan enkijape, iyie na kijape, niyang'aki kulo ootuata, peyie etum ninche aatopiu.”

¹⁰Metaa aibonoko ninche anaa enaaitanapa ninye nanu, nelotu enkiyang'et atua ninche, nepiu ninche neitashe too nkejek enye, olorora kitok oleng.

¹¹Naajoki ninye nanu, “Enkerai e tung'ani, ore kulo oik naa enkaji pooki e Israel. Ing'ura ajo ninche ‘Etoito iloik lang, neiting'o iyiook osiligi; etudung'oyioki iyiook katukul.’

¹²Metaa imbonoki ninche nijoki, inji ejo Olaitoriani Enkai: Ing'ura ajo kabol inkuraren inyi, naitopiu intae too nkuraren inyi, intae lo tung'ana laainei; naa kayau intae ang atua ina kop e Israel.

¹³Niyiolouu aajo Kara nanu Olaitoriani, ina kata nabol inkuraren inyi, naitopiu intae too nkuraren inyi, intae iltung'ana laainei.

¹⁴Naa kapik nanu atua intae enkiyang'et ai, nipiuu intae, napik intae enkop inyi maate; ina peyie iyiolouu inchere Nanu ilo Aitoriani, oiroro, nataasa ina, ejo Olaitoriani.”

¹⁵Nelotu ororei lo Laitoriani enatii naajoki:

¹⁶“Enkerai e tung'ani iwa eng'udi nisir ninye ajo, ‘Ene Yuda o nkera e Israel o entalipa enye;’ nintoki aya ae ng'udi nisir ninye te dukuya enye, ‘Te nkaraki Yosef (ina ng'udi e Efraim) o enkaji pooki e Israel o entalipa enye;’

¹⁷nintutum ninche te nebo aitaa eng'udi nabo, peyie etum aataa nabo te nkaina ino.

¹⁸Ore peyie kijoki iltung'ana linono, ‘Aimintodol iyie iyiook enautu ena?’

¹⁹Tiaaki ninche, Inji ejo Olaitoriani Enkai: Ing'ura, etinyikua peyie aya ina ng'udi e Yosef (ina natii ina aina e Efraim) o loshon le Israel ooboitare ninye; naitutumoki ninye ina ng'udi e Yuda, naitaa ninche eng'udi nabo peyie etum aataa ninche nabo te nkaina ai.

²⁰Ore nena keek nisirishore naatii enkaina ino te dukuya inkonyek enye,

²¹ina peyie ijoki ninche, Inji ejo Olaitoriani Enkai: Ing'ura ajo, kaya iltung'ana le Israel aitupuku te lelo oshon apa ooshomo, lelo ootijing'a ninche, naiturrurru ninche too nkaloli pooki, nayau ninche enkop enye maate;

²²naa kaitaa ninche olorere obo te nkop o too nchumat e lelo doinyo le Israel, naa olaiguanani obo oitasheiki ninche pooki; nemeitoki aaku ninche iloshon aare, nemeitoki aaoro aaku inkitoriat are.

²³Nemeitoki aaisarkonie ate aaigil too nkitanyaanyukot oo nkaitin enye o ntokitin enye torrok, aashu te pooki ake ninye ng'oki enye nabo; kake kaitajeu ninche te pooki rrinyoto enye narrinyo siadi teina ng'oki nataasa ninche, naa kaituku ninche; naa keaku ninche iltung'ana laainei, naaku nanu Enkai enye.

²⁴“Naa keaku osinka lai Daudi olaiguanani lenye oitore ninche; naa keaku ninche ilo lchekut obo. Naa kesuj ninche inkitanapat aainei, neing'or oleng aasuj inkiguanat aainei.

²⁵Ekebik ninche te nkop apa natotonie iloo papaai linyi ina apa naishoo osinka lai Yakobo; ninche te nebo nkera enye o nkera oo nkera enye etoni ninche teine ntarasi; ore Daudi osinka lai neaku olkitok lenye intarasi.

²⁶Ekaitobiru olning'o le seriani tenebo ninche; naa keaku ninche olning'o lo sotua intarasi tenebo ninche; naa kamayian ninche naitaa ninche kumok, naitasheyie tiatua ninche enkaji ai sinyati intarasi o ntarasi.

²⁷Ore emanyisho ai neaku tenebo ninche; naa kaaku nanu Enkai enye, neaku ninche iltung'ana laainei.

²⁸Ore iloreren neyiolou aajo Kara nanu Olaitoriani oitisiny Isiraeli, ina kata etii ewueji ai sinyati atua ninche intarasi pooki.”