Read Maasai Bible – Biblia Sinyati Esekiel 38 Bible Online

Esekiel 38 - Maasai Bible – Biblia Sinyati bible

Esekiel 38

¹Nelotu ororei lo Laitoriani enatii naajoki:

²“Enkerai e tung'ani, impirare Gog, leina kop e Magog, ilo arikoni kitok le Meshek o Tubal, nimbonoki agilunore ninye

³ijoki ninye, Inji ejo Olaitoriani Enkai: Ing'ura ajo ekaarare iyie, iyie Gog, olarikoni kitok le Meshek o Tubal,

⁴naa kaaboin iyie arriny apik ilala oololo intakul inono; naa kaitupuku intae, tenebo enjore inyi pooki, imbartan o lakedok loo mbartan eishopo pooki imasaa o larrabal kitok oleng ninche pooki, eeta pooki ilong'oi kutiti, ilong'oi sapuki o lalema.

⁵Etii iltung'ana le Pasia o Kus o Put tenebo ninche, neeta pooki ilong'oi o nkopiyiani oo sekenke.

⁶Etii gomer tenebo ilturrurri lenyena pooki; o Bet-togaiman eing'uaa enkalo nalakua oleng e moikuape tenebo ilturrurri lenyena pooki o ltung'ana kumok tenebo iyie.

⁷“Terretenayu niton irretena, iyie tenebo lelo ororani pooki ooiturrurro tenebo iyie, niaku olarriponi te nkaraki ninche.

⁸Ore eishunye inkolong'i kumok naa aikipuonunui aabaiki iyie, ore too larin le siadi nilo agilunore enkop, ina kop nanyaaka aaku olosho eishunye olarrabal, ina kop naiturrurrore olorere oing'uaa kulikae oreren too ldoinyo le Israel, netaa te nkata naado mitil; ore iltung'ana lenyena neyauni aaitupuku too loreren, netoni taata ninche pooki te seriani.

⁹Inyikakiki ninche anaa olkutati nitiuu anaa enkatampoi naitoipito enkop, iyie tenebo ilturrurri linono pooki, tenebo iloreren kumok tenebo iyie.

¹⁰“Inji ejo Olaitoriani Enkai: Ore teina olong naa kepuonu atua iyie indamunot atua endamunoto ino, naa intobiruru endamunoto torrono.

¹¹Nijojo, ‘Ekalo ailepaki aarare ina kop nemetii isunta inkang'itie; naa kabatatakino shumata lelo tung'ana ooitirring'a te seriani lelo oomanya enemetii isunta nemeeta isekenke aashu inchomito;’

¹²peyie aaibung iyarunot nanap nena naibung'aki; naim nenen pooki nemeekure emanyae tenebo lelo tung'ana ooing'uaa iloreren, lelo ooata inkishu o masaa, lelo oomanya empolos enkop.

¹³Ore Sheba o Dedan o lbiasharani le Tarshishi tenebo inkang'itie enye pooki naa kejoki intae, ‘Iyetuo intae aaibung iyarunot? Inturrurro ilororani linono peyie enap aaya iyarunot, peyie enap aaya enkosholai tenebo saabu, neya nkishu tenebo imasaa, nenap iyarunot kumok?’

¹⁴“Metaa, enkerai e tung'ani, imbonoki Gog tiaaki, Inji ejo Olaitoriani Enkai: Ore teina olong etoni iltung'ana laainei Isiraeli te seriani, aimiyiolouu intae?

¹⁵Idumumu ate nipuonunu aaing'uaa ewueji inyi aaing'uaa nene wuejitin neelakua e moikuape, ntae tenebo olorora loo ltung'ana kumok tenebo iyie, ekedito ninche pooki mbartan enye o lorora kitok, enjore sapuk.

¹⁶Ipuonunu aailepu aagilunore aarare iltung'ana laainei Israel, nimulumululu enkop anaa enkatampoi. Ore too nkolong'i naasuju naa kayau intae entaarare enkop ai, peyie aatum iloreren aatayiolo nanu, aa te iyie Gog aitoduaaya nanu esinyatisho ai te dukuya ninche.

¹⁷“Inji ejo Olaitoriani Enkai: Ai iyie ilo apa laimaka too nkolong'i naatulusoitie too sinkan laainei, lelo aidetidetak le Israel, laa ore te nena olong'i eibonishe te ninche too larin ejo kaayau iyie taarare ninche.”

¹⁸“Kake ore teina olong, ina kata nalotu Gog aarare ina kop e Israel, ejo Olaitoriani Enkai, naa kedumuni engoro ai.

¹⁹Amu to lom lai o te ngoro ai napejisho atumuta, ore kenya teina olong naa ketumi olokirikiri sapuk tiatua enkop e Israel.

²⁰Ore isinkir le naiposha o motonyi o loing'ang'e o ng'uesi e ong'ata o ntokitin pooki naaiserpepiari tioriong e nkop, o ltung'ana pooki ootii oriong enkop, naa keilanyisho pooki te dukuya nanu, ore ildoinyo naa kenang'uni abori, ore imartin nesulari, ore pooki suntai naa keurokino enkop.

²¹Kaipotu olkirutoto pooki metaarare Gog, ejo Olaitoriani Enkai; ore pooki alem lo ltung'ani nearare olalashe lenye.

²²To lmeitai o te nkibukoroto o sarge ajing'aki ninye enkiguana, naa kashaiki shumata ninye te nebo ilororani lenyena o tenebo iltung'ana kumok ootii tenebo ninye, enchan sapuk tenebo isoito le nchan, enkima o enkibiriti nayupuyup.

²³Metaa kaitodolu nanu enkitoo ai tenebo esinyatisho ai, naitayiolo kewan te dukuya inkonyek oo loreren kumok. Ina peyie eyilou ninche aajo Kara nanu Olaitoriani.”