Read Maasai Bible – Biblia Sinyati Esekiel 39 Bible Online

Esekiel 39 - Maasai Bible – Biblia Sinyati bible

Esekiel 39

¹“Ore iyie, nakerai e tung'ani, imbonoki tigilunore Gog, nijoki: Inji ejo Olaitoriani Enkai: ekaarare iyie, iyie Gog, ilo arikoni kitok le Meshek o Tubal;

²naa kaaibelekeny iyie naareu iyie dukuya, naayau iyie shumata aitung'uaa inkiting'ot pooki e moikuape, naarik iyie taarare lelo doinyo le Israel;

³naa kaosh enkawuo ino te nkalo e nkaina ino e kedianye, naisho imbaa inono metadoiki enkop te nkaina ino e tatene.

⁴Ibatatakino iyie enchumata oo ldoinyo le Israel, iyie tenebo ilturrurri linono pooki tenebo iltung'ana pooki likiboitare iyie; ekaaisho iyie lelo motonyi oonya nkiri le pooki pukunoto tenebo nena ng'uesi e ong'ata peyie kinya.

⁵Ibatata iyie te nkong'ata naisiasha; amu airoro nanu, ejo Olaitoriani Enkai.

⁶Ekairriwaki enkima Magog, tenebo lelo ootoni te seriani to lomanaa le nkiyopata e naiposha; naa keyiolou ninche aajo Kara nanu Olaitoriani.

⁷“Ore enkarna ai Sinyati naa kaibalie ninye te rishata oo ltung'ana laainei Isiraeli; nemaitoki aisho enkarna ai sinyati eitokini aaisarkionie; neyiolou iloreren aajo Kara nanu Olaitoriani, ilo Sinyati le Israel.

⁸Kelotu ina olong abau, ejo Olaitoriani Enkai. Ina olong ina naimaka.

⁹“Neaku ore lelo oomanya nena anas e Israel naa kepuo dukuya neitobiru inkimaitie too masaa olarrabal nepejoo ninche, ilong'oi sapuki o long'oi kutiti o inkai o mbaa, irinkan o mperria. Naa keitobiru inkimaitie te ninche too larin oopishana;

¹⁰metaa meitoki ninche aayieu neya ilkeek le nkima aaitung'uaa olokeri aashu edung'u too ntimi, amu keitobiru enkima enye too masaa enye o larrabal; ekeinyal ninche lelo ooinyal ninche, nemut lelo oomut ninche ejo Olaitoriani Enkai.

¹¹“Ore teina olong naa kaisho Gog ewueji nanukarieki te Israel, ina nong'oto oo lapuayak te nkalo o loosaen le naiposha; keibooyo ninye ilapuayak, amu keaku teine eturori Gog o lorora lenye pooki naa keipoti ninye aajo oyarata le Hamon-gog.

¹²Ore too lapaitin oopishana, keaku keturoo ina aji e Israel ninche peyie etum aaipoo ina kop.

¹³Ore iltung'ana pooki leina kop naa keturoo ninche; naa keyanyiti ninche teina olong naitodolu enkitoo ai, ejo Olaitoriani Enkai.

¹⁴Keitasheyie ninche iltung'ana ooim atua ina kop inkatitin pooki peyie epuo aanukaa lelo ootelekutua ti oriong e nkop, peyie etum aaipoo ninye; ore te nkiting'oto oo lapaitin oopishana neitoki aaing'oru impopoki aajurru.

¹⁵Naa ore teneim atua ina kop nedol ake obo oloito loo ltung'ani, naa kepik ninye olmonekie lenye o metaba anaa neturoo lelo aturorok ninye teina nong'oto e Hamon-gog.

¹⁶(Etii sii enkanasa e Hamona netii sii ninye ine). Neaku neijia eiko teneipok ina kop.

¹⁷“Ore te iyie, nakerai e tung'ani, inji ejo Olaitoriani Enkai: Irorie imotonyi e pooki pukunoto o pooki pukunoto eng'ues e ong'ata: Enturrurrunye wootu, enturrurroto too nkaloli pooki, enturrurrokinoto ina masho o lasar ilo laitobiraki intae, emasho kitok oleng o lasar te nchumata e lelo doinyo le Israel, naa inyanya inkiri niokioko osarge.

¹⁸Inyanya nena kiri e lelo magil niokioko osarge loo lkituaak le nkop, o loo lmeregeshi, o loo lkuoo le kerra, o loo lkineji o loo loing'ok, lelo pooki oopir le Bashan.

¹⁹Naa inyanya nena pooki naapir o entaraposhoto, niokioko osarge o entemerata, teina masho olasar naitobiraki intae.

²⁰Naa iraposhosho intae te misa ai te nena bartan o lakedok lenye, tenebo iltung'ana magil o ilmurran loo mpukunot pooki; ejo Olaitoriani Enkai.

²¹“Naa kaitasheyie enkitoo ai tiatua iloreren; naa kedol iloreren pooki enkiguana ai, ina nayawua, o enkaina ai naiteleikia ninche.

²²Ore enkaji e Israel naa keyiolou aajo Kara nanu Olaitoriani Enkai enye, eiteru ina olong nelo dukuya.

²³Naa keyiolou iloreren aajo eshomo apa enkaji e Israel eyararoto te nkaraki ing'ok enye, amu etaasa ninche ine nkarruoisho oleng te nanu metaa aisudoyie nanu enkomom ai aitung'uaa ninche naisho ninche metijing'a inkaik oo lmang'ati lenye, nebatata ninche pooki to lalem.

²⁴Aaitaasa ninche te risioroto olduruk o nkitarruorrot enye, naisudoo enkomom ai aitung'uaa ninche.

²⁵“Metaa inji ejo Olaitoriani Enkai: Ore tena kata naa kashukoki Yakobo imayianat enyena, natum olng'ur te nkaji pooki e Israel; naaku oloota olom te nkaraki enkarna ai sinyati.

²⁶Kerikino ninche enkurruna enye o mbaa pooki torrok naataasa ninche aagilunore nanu, ina kata etoni te seriani te nkop enye meeta likae oiture ninche,

²⁷ina kata nayau ninche ashuku too loreren naiturrurru ninche aitung'uaa ilmang'ati le nkop enye, naa tiatua ninche aibalie esinyatisho ai edolita iloreren kumok.

²⁸Ina peyie eyiolou aajo Kara nanu Olaitoriani Enkai enye amu aterewa ninche eyararoto tiatua iloreren, naitoki aiturrurroki ninche enkop enye maate. Maing'uaa hoo obo lenye eton tiatua iloreren aitoki;

²⁹nemaitoki aikata aisudoo enkomom ai aigil te ninche, ina kata nabuku Enkiyang'et ai abukoki ina aji e Israel, ejo Olaitoriani Enkai.”