Read Maasai Bible – Biblia Sinyati Esekiel 4 Bible Online

Esekiel 4 - Maasai Bible – Biblia Sinyati bible

Esekiel 4

¹“Ore iyie, Nakerai e tung'ani, iwa osoit nirragie te dukuya iyie, nisir ilkererin te ilo soit oitodolu enkanasa e Yerusalem;

²nipik emanata amuat Yerusalem, nishetu esuntai aitaman, nituru olong'elu[3] aitaman ninye, intasheyie sii ilng'oborri te mbata, nipik ilkedeta aitaman ninye.

³Niya esaani e sekenkei nipik ninye aitaa esuntai e sekenkei te rishata ino o enkanasa; nintorioki enkomom ino ninye, nincho metaa enatii ewueji o sempewuet, nirrumoki osempewuet ninye. Keaku ena olmonekie le nkaji e Israel.

⁴“Nirrag iyie te nkalo ino e kedianye, naa kairragie enkitamioto enkaji e Israel te shumata ino; amu ore esiana oo nkolong'i nirrag apetaa, naa inapaki ninche enkitamioto enye.

⁵Amu kaaisho nanu iyie nkolong'i esiana oo nkolong'i iip uni o ntomoni naaudo, naarisiore esiana oo larin le nkitamioto enye; metaa erishata naba neijia imbung ina kitamioto enkaji e Israel.

⁶Ore peyie indip ena, nintoki airrag eniare, kake ore te nkalo ino e tatene, ninap enkitamioto enkaji e Yuda; inkolong'i artam aatipika ena, enkolong ake to lari pooki.

⁷“Naa intorioki enkomom ino ina manata namuati Yerusalem, metii toki enkaina ino; nimbonoki ina anasa.

⁸Naa kaapik iyie inkeenta, metaa mimbelekenyakino ae alo, ometaba anaa niishu nkolong'i inono nimanie ina anasa.

⁹“Ore iyie, iwa enkano o shairi, mpoosho o lpompo o loikempe o enkurma napuyiapui nipik nena pooki eng'irra nabo, nintobiru emukate te ninche. Ore te siadi e nena olong'i nirrag te murte ino; inkolong'i iip uni o ntomoni naaudo inya ina mukate (390).

¹⁰Naa ore endaa ninya naa keineneng'i, inchekelini tikitam te nkolong; ninya enkata nabo te nkolong.

¹¹Neaku iok enkare te ntemata ematua oo mbirbirili are; niok kata nabo te nkolong.

¹²Naa inya ninye anaa emukate e shairi, naa ipeju ninye te nkima nainokieki nkik oo ltung'ana edolita pooki ng'ae.”

¹³Nejo Olaitoriani, “Neijia eiko iltung'ana loo Siraeli tenenya emukate enye eeta oloirerio, tiatua iloreren laitarasaki ninche.”

¹⁴Ina peyie ajo, “Aha, Olaitoriani Enkai! Eitu aekata aisarkionie kewan; ina kata eton ara olbarnoti o matubulu taata eitu aekata anya entoki natua openy aashu enataara ing'uesi e ntim, aashu etijing'a enkutuk ai endaa torrono.”

¹⁵Ina peyie aajoki ninye nanu, “Ing'ura ekaaisho iyie ilboro le modiei e nkiteng te rishata oo nkik o ltung'ani, neaku ninye ipejunye emukate ino.”

¹⁶Aanyaaka ake sii ajoki, “Enkerai e tung'ani ing'ura ajo kadung'oo ine neimu emukate e Yerusalem; ee kenya ninche imukateni naaineneng'i te ntemet naineneng'ishoreki te nkuretisho; naa keok enkare naturuni te nking'ashing'ash sapuk.

¹⁷Ekaas ena peyie meitoki aatum emukate o enkare, neing'ura maate te nkidang'ata sapuk, neibiitiari tiatua enkitamioto enye.