Read Maasai Bible – Biblia Sinyati Esekiel 40 Bible Online

Esekiel 40 - Maasai Bible – Biblia Sinyati bible

Esekiel 40

¹Ore to lari le tikitam o miet le yararoto ang, te nkiterunoto o lari te nkolong e tomon o lapa, to lari le tomon oong'uan eidipaki aaibung'a enkanasa, teina olong; netii apa enkaina o Laitoriani shumata nanu.

²Naayau nanu Enkai too nduaat atua enkop e Israel naaitoton ninye nanu te nchumata oldoinyo oodo oleng, netii shumata enye olchetiei laaijo enkanasa naipirare nanu.

³Ore peyie aayau ninye ine, nadol oltung'ani, laa ore empukunoto enye netiu anaa osuyai, neeta te nkaina enye enkopito natemishoreki o entiyani natemishoreki te nkaina enye; neitashe ninye te nkalo kishomi.

⁴Naajoki nanu ilo tung'ani, “Enkerai e tung'ani ing'ura, too nkonyek inono, nining too nkiyiaa inono, nipik indamunot inono nena pooki naaitodol iyie, amu kitorikuoki ene peyie aatum aitoduaa iyie ninye; imbalakinye nena pooki nidol enkaji e Israel.”

⁵Nadol esuntai namanita ine wueji e oriong netii enkaji e Nkai, ore enkadori e ina tiyani natemishoreki natii enkaina e ilo tung'ani naa intemat ile enkaina enkadori, ore pooki nabo enye naa entemata enkaina nabo o endap te nkadori; metaa etetema ina kirrushai eina suntai, naa entiyani nabo.

⁶Neitoki ninye alo ina kishomi naipirare oloosaen, eilep too nkedeta enyena, neipim entonata eina kishomi, entiyani nabo enguton; o lgilat oomanita, entiyani nabo enkadori.

⁷Ore ilgilat loo mbat naa entiyani nabo enkadoro ore erishata e lelo gilat loo mbaat naa ntemeta imiet e nkaina; ore ine neitasheyie ina kishomi te mbata o lgoriet tenejing'ieki kishomi naa entiyani nabo.

⁸Neitoki ninye atem olgoriet le kishomi, intemat enkaina isiet;

⁹tenebo ineeitasheyie enyena, intemeta are enkaina; ore olgoriet le kishomi netii enkalo enkiting'oto e atua e kishomi.

¹⁰Netii ilgilat pokira okuni loo mbaat inkaloli pokira e kishomi oloosaen; ore nena pokira uni nerisio pooki; ore ing'apeta oo nkaloli pokira nerisioro.

¹¹Ina peyie etem endapasho eine nebolieki kishomi, intemeta tomon; o endapasho e ina kishomi, intemeta tomon ookuni.

¹²Netii apa enerisha dukuya lelo gilat okuni loo mbat naa entemet nabo enkaina te pooki shoto.

¹³Ina peyie atem ina kishomi tioriong enkalo olgilata obo ometabaiki oriong olikae, neeta endapasho o ntemat imiet o ntemeta tikitam eiteru te kutuk aji ometabaiki enkae kutuk aji.

¹⁴Neitoki ake sii atem olgoriet, intemete tikitam enkaina; ore ine emanaroto e ilo goriet netii olodung'oro.

¹⁵Ore te dukuya ina kishomi teine nejing'ieki o metabaiki ine enkiting'oto olgoriet liatua leina kishomi naa intemeta onom.

¹⁶Ore ine wueji nejing'ieki kishomi neeta ilusien naamanita naapirik ijing atua nena ng'apeta enye tiatua lelo gilat loo mbat, neeta ake sii ilo goriet ilusien naamanita tiatua, ore too ng'apeta e kutuk aji netii iltuka.

¹⁷Naariku nanu atua endung'oroto e oriong; nadol etii ilgilat olgos oomanaa teilo odung'oro; ilgilat tomoni uni ootii dukuya ilo gos.

¹⁸Neim ilo gos embata nena shomito, eipirare ina adori e nena shomito; ele apa olgos le abori.

¹⁹Neitoki ninye atem enkadori eiteru tiatua te nkalo e dukuya enkalo e atua eina kishomi e abori o metabaiki oriong te nkalo e dukuya ea atua olgoriet, intemat iip nabo enkaina.

²⁰Neituruk ninye te dukuya nanu alo enkalo e moikuape, nadol enkishomi naing'orita enkalo e moikuape, enaa ene nkalo olodung'oro lioriong. Netem enkadori enye o endapasho enye.

²¹O lgilat lenyena loo mbat, okuni ake te pooki matua o ng'apeta enyena tenebo o lgorieti lenye laa erisiori o nekua e kishomi e dukuya; ore enkadori naa intemat enkaina onom o imiet.

²²Ore ilusien enyena o lgorieti lenyena, tenebo iltuka lenyena naa erisiori nabo anaa lelo leina kishomi ina naing'orita enkalo oloosaen; naa inkedeta naapishana ninche naailepaki ine; netii olgoriet atua ine.

²³Ore te nkae alo naipirare kishomi te nkalo e moikuape, anaa enatiu te nkalo o loo ntoluo netii enkishomi natii atua olgoriet; netem eiteru te kishomi o metabaiki kishomi, intemat e nkaina iip nabo.

²⁴Naarik ninye nanu enkalo e kopikop, nadol enkishomi enkalo e kopikop; netem ninye ing'apeta enyena tenebo ilgilat lenyena; neeta apa pooki erisiori nabo anaa ilkulikae.

²⁵Netii apa ilusien naamanita tiatua olgoriet lenye, anaa ilusien e kulie; ore enkadori enye naa intemat e nkaina onom, ore endapasho enye naa intemat tikitam o imiet.

²⁶Netii apa inkedeta naapishana naailepaki ninye, ore olgoriet lenye netii enkalo e atua; neeta apa iltuka too ng'apeta enye, obo ake te nkalo e atua; neeta apa ilkeek loo ltuka too ng'apeta enye, obo ake te nkalo nabo too nkaloli pooki.

²⁷Netii apa enkishomi te nkalo e kopikop te nkalo e atua olodung'oro; netem ninye eiteru te kishomi o meshomo kishomi te nkalo e kopikop, intemat e nkaina iip nabo.

²⁸Ina peyie aariku nanu atua olodung'oro li atua te nkalo e kishomi e kopikop, netem ninye ina kishomi e kopikop; nerisio apa o nkulie.

²⁹Ore ilgilat lenyena loo mbat o ing'apeta enyena, olgorieti lenye nerisio o nena kulie; netii apa ilusien naamanita tiatua tenebo olgilata lenye; ore enkadori naa intemat enkaina tikitam o imiet.

³⁰Netii ilgorieti oomanita, intemeta e nkaina tikitam o imiet enkadori naa intemeta imiet endapasho.

³¹Ore olgoriet lenye neipirare olodung'oro li oriong netii iltuka ing'apeta enyena, ore enekedieki enye neeta inkedeta isiet.

³²Ina peyie aariku nanu oliatua lo lodung'oro te nkalo oloosaen, netem ninye ina kishomi; nerisiore nena kulie.

³³Ore ilgilat lenyena loo mbat o ing'apeta enyena tenebo ilgorieti lenyena naa erisiori o lkulikae; netii atua ilusien naamanita tiatua tenebo olgoriet lenye, ore enkadori enye naa intemat enkaina onom, ore endapasho enye naa intemat e nkaina tikitam o imiet.

³⁴Ore olgoriet lenye neipirare ilo odung'oro li oriong, neeta apa iltuka too ng'apeta enyena, obo ake te pooki shoto; ore enekedieki enye neeta inkedeta isiet.

³⁵Ina peyie aariku nanu enkalo e kishomi e moikuape, netem ninye; naa kerisioro o nkulie.

³⁶Ore ilgilat lenyena loo mbat, o ng'apeta enyena, tenebo ilgorieti lenyena nerisioro o lkulikae; neeta ilusien naamanita, ore enkadori enye naa intemat e nkaina tikitam o imiet.

³⁷Ore olgoriet lenye neipirare olodung'oro lioriong, neeta iltuka too ng'apeta enyena, obo ake te pooki shoto; ore enekedieki enye neeta inkedeta isiet.

³⁸Netii apa olgilata sapuk oata kutuk aji enye to lgoriet le kishomi, naa teine apa eisuji ilo asar opejori.

³⁹Ore tiatua ilo goriet le kishomi netii enkishomi natii imisai are too nkaloli pokira, naa ninche eyieng'ieki ilasarri oopejori o lasarri le ng'oki o lasarri le nkitarruorroto.

⁴⁰Ore tioriong ilo goriet te nkalo najing'ieki e kishomi moikuape, netii imisai are, ore te nkae alo eilo goriet eina kishomi netii imisai are.

⁴¹Netii apa imisai are atua, netii imisai ong'uan oriong, te nchoto e ina kishomi, imisai isiet, naa te nchumata enye eyieng'ieki ilasarri.

⁴²Netii sii apa imisai ong'uan oo soito oogueta te nkaraki olasar opejori entemata enkaina nabo o lpisiai enkadori, naa entemata nabo olpisiai endapasho, naa entemata nabo enkaina enkilepata, laa ninye eiteleikini intokitin pooki naayieng'ishoreki laa teine eteyieng'ieki olasar opejori.

⁴³Ore ilala oololo, naa ore enkadori enye naa endap e nkaina, neenikino atua ninye tiatua. Ore te nchumata e nena misai naa ine eiteleikini nena kiri naaitaini metaa olasar.

⁴⁴Ina peyie aariku nanu tiauluo aitijing'u atua olodung'oro liatua, etii apa ilgilat aare sapuki otii atua olodung'oro liatua, ore obo naa ole nkishomi e moikuape naipirare kopikop, ore enkae neipirare enkalo e kishomi naing'orita moikuape.

⁴⁵Naajoki ninye nanu, ore ele gilata oipirare enkalo e kopikop naa enelelo apolosak ooitasheiki enkaji e Nkai.

⁴⁶Ore olgilata oipirare moikuape naa olgilata loo lapolosak ooing'or olperere lo lasar; naa kulo ninche ilayiok le Sadok, laa ninye openy tiatua ilayiok le Lawi eishoro enyikaki Olaitoriani aaisiyiai ninye.

⁴⁷Netem ninye ina dung'oroto, intemat e nkaina iip nabo enkadori o ntemat iip nabo endapasho, nerisio inkaloli pokira ong'uan; netii olperere dukuya ina aji Enkai.

⁴⁸Ina peyie aariku nanu olgoriet le nkaji e nkai, netem ing'apeta olgoriet, naa intemat imiet enkaina too nkaloli pokira; ore endapasho eina kishomi naa intemat e nkaina tomon oong'uan ore isunta enchoto naa intemat e nkaina uni te pooki shoto.

⁴⁹Ore enkadori o lgoriet naa intemat e nkaina tikitam ore endapasho naa intemat e nkaina tomon aare naa inkedeta tomon naailepaki; netii apa inkitotoneta embata oo ng'apata too nkaloli pooki.