Read Maasai Bible – Biblia Sinyati Esekiel 42 Bible Online

Esekiel 42 - Maasai Bible – Biblia Sinyati bible

Esekiel 42

¹Ina peyie aariki nanu atua olgoriet liatua le nkalo e moikuape, naariku nanu atua ilgilat ooipirare enkalo olodung'oro le nkaji e Nkai netii sii enkae alo eina aji natii moikuape.

²Ore enkadori eina aji natii enkalo e moikuape naa intemeta iip nabo, ore endapasho enye naa intemat onom.

³Neibung'are intemeta e nkaina tikitam naatii atua olodung'oro liatua, neipirare enkiyopata naimi enkaji e oriong olodung'oro. Oltapeet le nkaji oipirare olikae too nkajijik uni naakedo aaidikidiko.

⁴Ore eitu ijing lelo gilat netii enkoitoi najing atua, intemat enkaina tomon endapasho o ntemat e nkaina iip te nkadori netii inkutukie oo nkajijik enye enkalo e moikuape.

⁵Ore ilgilat le shumata naa aironkeni, amu ewaita iltapeeti le shumata erishata sapuk aalang ilgilat liabori o le mpolos e nkaji.

⁶Amu inkajijik apa uni naakedo, nemeeta apa ing'apeta anaa ing'apeta ololodung'oro liauluo; metaa ore ilgilat le shumata neingat enkop aalang ile abori o le polos.

⁷Netii apa esuntai boo naipirare lelo gilat te nkalo olodung'oro lioriong; eipirare lelo gilat, intemat enkaina onom enkadori.

⁸Ore ilgilat lolodung'oro lioriong naa intemat onom te nkadori, ore lelo ootii enkae alo enkaji e Nkai naa intemat iip nabo enkadoro.

⁹Ore tiabori lelo gilat netii kutuk aji te nkalo naing'or oloosaen, najing'unye iltung'ana eing'uaa olodung'oro le boo.

¹⁰Ore sii te nkalo e kopikop, eipirare olodung'oro o eipirare sii ina aji; etii ilgilat oata enejing'ieki te dukuya ninche;

¹¹nenyaanyukie ninche lelo gilat ootii enkalo e kopikop, nabo enkadoro o endapasho, neeta ewueji nebo neipang'ieki, naa nabo o nkutukie oo nkajijik.

¹²Ore tiabori ilgilat le kopikop netii enejing'ieki te nkalo oloosaen, teine nejing'ieki ina oitoi, ore te nkalo e kurum netii esuntai narish esuntai.

¹³Ina peyie aajoki ninye nanu, “Ore ilgilat le nkalo e moikuape o lgilat le kopikop lelo ooipirare ilo odung'oro naa lgilat Sinyat, laa teine epuo lelo apolosak oopuonu enetii Olaitoriani aanya lelo asarri sinyat oleng: ilo asar le ntapa, ilo asar le ng'oki, o ilo asar le nkitarruoroto, amu ore ine wueji naa aisinyati.

¹⁴Ore tenejing ilapolosak ine wueji sinyati, nemeipang auluo teine aapuo ina dung'oroto e auluo eitu eitayu teine nena kilani enye a enkisiaayiare, amu aisinyat kuna; neishop ninche kulie kilani eton eitu epuo aanyikaki ewueji netti iltung'ana.”

¹⁵Ore peyie eidip atetema atua ine wueji e nkaji e Nkai, naarik nanu aipang'ie teina kishomi naipirare enkalo oloosaen, netem ewueji e nkaji e Nkai aman.

¹⁶Netem enkalo oloo saen te ntiyani natemishoreki intemat enkaina iip imiet te ntiyani natemishoreki.

¹⁷Neitoki aibelekenya netem enkalo e moikuape, intemat enkaina iip imiet te ntiyiani natemishoreki.

¹⁸Neitoki aibelekenya netem enkalo e kopikop, intemat iip imiet e nkaina teina tiyani natemishoreki.

¹⁹Neitoki aibelekenyakino enkalo oloontoluo, netem, intemat iip imiet e nkaina teina tiyani natemishoreki.

²⁰Etetema ninye too nkaloli pokira ong'uan. Neeta apa esuntai namanita ninye, intemat enkaina iip imiet te nkadori, o ntemat iip imiet e nkaina endapasho, pee etum atirishu ewueji sinyati o ene pooki ng'ae.