Read Maasai Bible – Biblia Sinyati Esekiel 44 Bible Online

Esekiel 44 - Maasai Bible – Biblia Sinyati bible

Esekiel 44

¹Naaitoki ariku nanu ina kishomi e auluo e ine wueji sinyati, naipirare enkalo oloosaen, naa keikeno apa.

²Naajoki ninye nanu, “Keton ena kishomi eikeno; meboli ninye, nemeeta oltung'ani ojing'u aimu ina kishomi; amu ore Olaitoriani Enkai e Israel, naa ine etijing'unye, neaku keton ninye eikeno.

³Olkitok ake oton tiatua ninye peyie etum ainosa emukate te dukuya Olaitoriani; naa kejing ninye atua te nkoitoi olgilata le kishomi, neitoki ake aipang teina oitoi.”

⁴Naariku ninye nanu aimunye enkalo e kishomi e moikuape omatabaiki enkalo e dukuya e nkaji e Nkai, naing'or naa ng'ura, eiputa enkitoo Olaitoriani e nkaji o Olaitoriani; nabatata te nkomom ai.

⁵Naajoki Olaitoriani nanu, “Enkerai e tung'ani, tujurru oleng, toduaa too nkonyek inono, nining too nkiyiaa inono nena pooki naaliki iyie naaipirta inkitanapat pooki e nkaji o Laitoriani tenebo nkitanapat enyena pooki; nijurru oleng ayiolou lelo pooki ooishori metijing'a enkaji e Nkai o lelo pooki oodung'ori tewueji sinyati.

⁶Nijoki ina aji kiserut, ina aji e Israel, Inji ejo Olaitoriani Enkai: Naaji e Israel, inchoo eish ilo minong lino pooki,

⁷teine ning'amaa ilomon ilememurata too ltauja o seseni, peyie ejing ewueji ai sinyati, neisarkionie ninye, ina kata nikinchosho nanu endaa ai, nena naapir o ilo sarge. Itigila intae olning'o lai lo sotua, tenebo ilo minong linyi pooki.

⁸Neitu iramatata intokitin aainei sinyat; kake itipika ilomon meing'ura atua ewueji ai sinyati.

⁹“Metaa inji ejo Olaitoriani Enkai: Meetae olomoni, olememurata oltau o sesen lenye, o pooki omoni lelo ootii atua iltung'ana le Israel, oojing ewueji ai sinyati.

¹⁰“Kake ore lelo le Lawi laashomo aalam nanu, ootapong'ori te nanu aasuj nena kitanyaanyukot enye oo nkaitin ina kata peyie epong'ori Israel, naa kenap enkitamioto enye maate.

¹¹Keaku ninche ilaisiaayiak te wueji ai sinyati, neitasheiki too nchomito e nkaji e Nkai, neisiaaisho te nkaji e Nkai; naa keyieng ninche olasar opejori te nkaraki iltung'ana, naa keramat ninche olorere, eisiaai ninche.

¹²Amu eisiaayia ninche te dukuya inkaitin enye oo nkitanyaanyukot neaku ninche ilo oibooyo ng'ok te nkaji e Israel, neaku ainosa olmumai te ninche, ejo Olaitoriani Enkai, inchere kenap ninche maate enkitamioto enye.

¹³Maapuonu ninche aanyikaki nanu aaisiai nanu anaa ilapolosak, aashu epuonu aanyikaki intokitin aainei sinyat o ntokitin naa sinyat oleng; kake kenap ninche enkurruna enye, te nkaraki ilo minong otaasa ninche.

¹⁴Ore ake sii naa kagelu ninche meitasheiki ina aji e Nkai, peyie atum aas esiaai pooki naasi tiatua ninye.

¹⁵“Kake ore ilapolosak loo Lawi, lelo ayiok le Sadok, lelo oogolie ewueji ai sinyati, ina kata nashomo iltung'ana le Israel aapong'ori aaing'uaa nanu, kepuonu ninche enatii aanyiku peyie aasiai nanu, naa kaaisiaai nanu aaitaiki nanu nena naapir tenebo ilo sarge, ejo Olaitoriani Enkai;

¹⁶naa kejing ninche ewueji ai Sinyati, naa kejing ninche emisa ai, peyie aaisiai nanu, naa keibung ninche enkitanapata ai.

¹⁷Ore peyie ejing ninche atua inchomito o lgoriet liatua, naa keishop ninche inkilani e kitani naapuyiapui; meishop hoo ninche toki naitobiruno too lpapit loo ntare, ina kata aaisiaai too nchomito o lgoriet tiatua aji.

¹⁸Naa keishop ninche inkarash e kitani too lukuny enye o surualini e kitani too mpolosi enye; merrotian ninche ae toki naitaar ninche enkima.

¹⁹Naa tenebo eipang aapuo olodung'oro lioriong, enetii iltung'ana, naa keitayu nena kilani nena apa naaisiaaishore, neirragie ninche too lgilat sinyat; neishop ninche kulie kilani, pee mepik ake esinyatisho iltung'ana too nkilani enye.

²⁰Nemebarn ninche ilukuny enye aashu eisho ilpapit lenye ebulu aadoru, keisor ake ninche ilpapit lenye loo lukuny enye.

²¹Meetae olapolosani ook enaisho oo sabibu, ina kata ejing olgoriet liatua.

²²Meyam ninche enkoliai, aashu enkitok natung'uayie o lpayian lenye, kake eselenkei ake o lorere le nkaji e Israel, aashu enkoliai naa enkoliai o lapolosani.

²³Keiteng'en ninche iltung'ana laainei enepaashare ina nasinya o ina nemesinya, neitodol ninche eneiko tenerishu ina naiduruk o enemeiduruk.

²⁴Ore te mbae pooki natii enchankar, neaku ninche ilarishak te risioroto oo nkiguanat aainei. Keibung ninche inkitanapat aainei tenebo inkiguanat too siruai laainei pooki gelunot, neitisiny isabatoni aainei.

²⁵Eisarkionie ninche ate aapuo aanyikaki olmeneng'ani; ore ake eyia, te papaai aashu yieyioo, to layioni aashu te ntito, to lalashe aashu teina anashe nemeyama keidim aaisarkionie ate.

²⁶Ore peyie eidip aiduruko, neikenaki kewan nkolong'i naapishana neaku ninye olemeeta olduruk.

²⁷Ore teina olong nalo ninye ine wueji sinyati, atua olgoriet liaatua, peyie aaisiai tiatua ewueji sinyati, naa keitayu ninye olasar lenye le ng'oki, ejo Olaitoriani Enkai.

²⁸“Meitoki ninche aata enjung'ore; nanu enjung'ore enye; nimincho ninche toki naitaa enenye tiatua Israel; ara nanu emasaai enye.

²⁹Kenya ninche olasar le ntapa, olasar le ng'oki tenebo olasar le ntorroni; ore pooki toki te Israel naiteng'elaki neaku enenye.

³⁰Ore pooki ng'anayio le dukuya le pooki pukunoto o pooki kishooroto e pooki pukunoto too nkishoorot inono pooki, naa keaku inoo lapolosak; nincho sii ninche lelo apolosak olng'anayioi lino le dukuya le mukate, peyie etum emayianata atotona te nkaji ino.

³¹Menya ilapolosak pooki toki, aa emotonyi aashu eng'ues, ina natua makewan aashu enataara nkulie.