Read Maasai Bible – Biblia Sinyati Esekiel 45 Bible Online

Esekiel 45 - Maasai Bible – Biblia Sinyati bible

Esekiel 45

¹“Ore tenelo niorikinono enkop aaya, entooriki Olaitoriani erubata teinakop metaa enkop sinyati. Intemat enkaina inkalifuni tikitam o imiet enkadoro; o ntemat enkaina inkalifuni tikitam endapasho, naa keaku sinyati te pooki nebaiki pooki.

²Ore teina kurma nedung'uni ewueji nerisioro inkaloli pooki oo ntemeta e nkaina iip imiet neaku ine wueji sinyati neeta intemat onom enkaina e wueji nemetii toki namanita ninye.

³Ore teinakop sinyati nirishu aoru erubata intemat nkalifuni tikitam o imiet te nkadoro o ntemat enkaina inkalifuni tomon te ndapasho, naa ninche ejing ina aji sinyati, ewueji sinyati oleng.

⁴Keaku ninye esashati sinyati teina kop; naa keaku enelelo apolosak ooasisho tiatua ine wueji sinyati; nejing ine wueji sinyati aaisiai Olaitoriani; naa keaku ninye ewueji oo nkajijik enye, naa ewueji Sinyati te nkaraki ina Aji sinyati.

⁵Ore enkae sashati, intemat e nkaina nkalifuni tikitam o imiet tenkadoro naa ntemat e nkaina nkalifuni tomon endapasho, naa keaku enoo le Lawi lelo ooisiaisho te nkaji e Nkai, pee eaku ewueji oo nkanas enye naamany.

⁶“Ore ake sii teina sashati natudung'uoki aitaa enkop nasinya, nidung'u aitaa ewueji e nkanasa, enkop oo ntemat nkalifuni imiet te ndapasho naa ntemat enkaina inkalifuni imiet te nkadoro neaku ene nkaji pooki e Israel.

⁷“Naa keaku eno lkitok enkop pooki natii nkaloli pokira ina kop sinyati o ine wueji e nkanasa, emanita ine wueji sinyati o ine wueji enkanasa, te nkalo oloontoluo o te nkalo o loosaen, eipirarete nkadoro nabo sashati olorere, nenyikaa eiteru te nkalo o loontoluo o meshomo oloo saen lo lpolosie leina kop. Keaku ina enkop enye te Israel.

⁸Ore ilkituaak laainei nemeitoki aekata airony iltung'ana laainei; kake keisho ina aji e Israel menoto ina kop te risioroto oo loshon lenye.

⁹“Inji ejo Olaitoriani Enkai: itaasa ing'ok, lo kituaak le Israel! Ewuang'ie enkikonya o enkitorogonyare, nimbalilie esipata o esinyatisho; entapal eyararoto oo ltung'ana laainei, ejo Olaitoriani Enkai.

¹⁰“Entaa ilooata intemat naasipa naaineneng'ishoreki, efa[12] nemetii emonkoi, o bati[13] nemetii emonkoi.

¹¹Ore efa tenebo e bati naa erisiori nabo, ore bati neeta ematua nabo e tomon e Homa, ore efa ematua nabo e tomon e Homa; neaku ore Homa ninye erikorieki enkiroishi pooki.

¹²Ore shekeli naa keaku gera tikitam; ore shekeli imiet neaku shekeli imiet, ore shekeli tomon neaku shekeli tomon, ore mina neaku shekeli onom.

¹³“Ena ninye enkishooroto naa ninye intayu; ore ematua nabo e ile e efa te pooki homa e nkano e ematua nabo e ile e pooki homa e shairi,

¹⁴o erubata nauno e ilata, ematua nabo e tomon bati te pooki Kori (ore kori netiu anaa homa, eeta bati tomon);

¹⁵ore enker nabo te luaata oo nkerrai iip are, too lmarei pooki le Israel. Ena ninye enkishooroto te nkaraki olasar le ntapa, olasar opejori, o lasar le seriani, peyie itum aitobira olasar lo lning'o lo sotua te nkaraki ninche, ejo Olaitoriani Enkai.

¹⁶Ore iltung'ana pooki leina kop, neisho ena kishooroto ilo kitok otii atua Israel.

¹⁷Keaku esiaai o lkitok peyie eitobir ilasarri oopejori, ilasarri le ntapa, o lasarri ooki, te lelo siruai, teina rishata nadoli olapa too Sabatoni, o te lelo siruai pooki gelunot le nkaji e Israel: keitayu ninye ilasarri le ng'oki, o lasarri le ntapa, o lasarri oopejoro, o lasarri le seriani, peyie etum aitaiki olning'o lo sotua ina aji e Israel.

¹⁸“Inji ejo Olaitoriani Enkai: ore to lapa le dukuya, te nkolong e dukuya o lapa, niyaya oloti oing'oni lemeeta entioto, nimpok ine wueji sinyati.

¹⁹Naa keya olapolosani oloti sarge lo lasar le ng'oki nepik ninye intaloishin e kutuk aji eina aji e Nkai, nepik sii inkedeta pokira ong'uan o lperere lo lasar, o ng'apeta e kishomi e ine wueji olgoriet liatua.

²⁰Niasiasa ina te nkolong e naapishana o lapa te pooki ng'ae otaasa eng'oki te ntorroni aashu te modai; metaa intayuyu olning'o lo sotua te nkaraki enkaji e Nkai.

²¹“Ore to lapa le dukuya, te nkolong e tomon oong'uan o lapa, naa ishipakinono ilo sirua le ng'iroroto oji Pasaka ore too nkolong'i naapishana naa kenyae emukate neitu eisiujieki.

²²Ore teina olong naa keitayu olkitok te nkaraki enkewan enye tenebo iltung'ana pooki leina kop oloti oing'oni te nkaraki olasar le ng'oki.

²³Ore te nena olong'i naapishana e ilo sirua, naa keitaiki anaa olasar opejokini Olaitoriani iloing'ok ooti oopishana o lmeregeshi oopishana lemeeta entioto, te pooki olong e nena naapishana; o loro pooki olong te nkaraki olasar le ng'oki.

²⁴Naa keitayu anaa olasar le ntapa e efa te pooki oing'oni, e efa te pooki meregesh, o hini e ilata te pooki efa.

²⁵Ore to lapa le liopishana, te nkolong e tomon o imiet o lapa o too nkolong'i naapishana e ilo sirua, naa keitobiri ina kishorunoto te nkaraki olasar loo ng'ok, ilasarri oopejori, o lasarri le ntapa o le ilata.