Read Maasai Bible – Biblia Sinyati Esekiel 48 Bible Online

Esekiel 48 - Maasai Bible – Biblia Sinyati bible

Esekiel 48

¹“Kuna ninche inkarn oo loshon: Eiteru to lpolosie le moikuape, eiteru te naiposha te nkalo enkoitoi e Hetlon o meshomo enejing'ieki Hamat, o metabaiki Hasarenon (ina natii olpolosie le moikuape e Dameski o metabaiki Hamat), nepuku te nkalo oloo saen o metabaiki oloontoluo, Dan erubata nabo.

²Ore eiteru to lpolosie le nkop e Dan, eiteru te nkalo oloosaen o metabaiki Asheri, naa erubata nabo.

³Ore epuku to lpolosie le nkop e Asheri, te nkalo oloosaen o metabaiki oloontoluo, naa Naftali, naa erubata nabo.

⁴Ore eiteru to lpolosie le nkop e Naftali, eiteru tenkalo oloo saen o metabaiki oloontoluo naa Manase, erubata nabo.

⁵Ore eiteru to lpolosie le nkop e Manase, eiteru te nkalo oloo saen o metabaiki enkalo oloontoluo, naa Efraim, erubata nabo.

⁶Ore eiteru to lpolosie le Efraim, eiteru te nkalo oloosaen o metabaiki oloontoluo naa Ruben, erubata nabo.

⁷Ore eiteru to lpolosie le nkop e Ruben, eiteru tenkalo oloosaen o metabaiki oloontoluo naa Yuda, erubata nabo.

⁸“Ore eiteru to lpolosie le nkop e Yuda, eiteru te nkalo o loosaen, o metabaiki oloontoluo, naa keaku erubata naitaini aaiteng'el, intemat enkaina inkalifuni tikitam o imiet e ndapasho, ore tenkadori nerisiore eneba nabo e nena rubat olosho, eiteru tenkalo oloo saen o metabaiki oloontoluo, etii ewueji sinyati empolos enye.

⁹Ore ina rubata ninteng'elakiki Olaitoriani, naa keaku intemat enkaina inkalifuni tikitam o imiet te nkadori, o ntemat enkaina inkalifuni tikitam tendapasho.

¹⁰Kuna ninche naaku iorot ewueji sinyati, naa keishori ilapolosak eoroto nabaiki intemat enkaina inkalifuni tikitam o imiet te nkalo e moikuape, intemat enkaina inkalifuni tomon te ndapasho te nkalo oloontoluo, intemat enkaina inkalifuni tomon te nkalo oloo saen o ntemat enkaina inkalifuni tikitam o imiet te nkadoro te nkalo e kopikop, netii ewueji sinyati o Laitoriani eneitorit.

¹¹Keaku ena enoo lapolosak ooitisinyaki lelo ayiok le Sadok, lelo ooibung'a enkitanapata ai, lelo leitu epuo aapong'ori ina kata napuo iltung'ana le Israel aapong'ori, anaa enataasa ile Lawi.

¹²Naa keaku enenye anaa erubata e tipat naing'uaa ine wueji sinyati eina kop, e wueji neisul te sinyatisho eiteru to lpolosie le Lawi.

¹³Ore te mbata ina kop oo lapolosak keaku keeta Ilawi ewueji oo ntemat enkaina inkalifuni tikitam o imiet te nkadori naa intemat enkaina inkalifuni tomon endapasho. Ore enkadori enye pooki naa keaku intemat e nkaina inkalifuni tikitam o imiet ore endapasho naa intemat enkaina inkalifuni tikitam.

¹⁴Nememir aashu ewalaa ina rubata enkop ake pooki, amu aisinyati ninye to Laitoriani.

¹⁵“Ore ina naleku, intemat enkaina inkalifuni imiet te ndapasho, o ntemat enkaina inkalifuni tikitam o imiet te nkadori, naa keaku ene pooki siaai teina anasa eiana anasa, ee nemanyi oe wueji nemetii toki. Ore te mpolos enye netii enkanasa;

¹⁶naa kuna ninche intemet enyena: ore enkalo e moikuape naa intemat enkaina inkalifuni ong'uan o iip imiet, ore enkalo e kopikop intemat enkaina inkalifuni ong'uan o iip imiet, ore te nkalo oloontoluo naa intemat enkaina inkalifuni ong'uan o iip imiet.

¹⁷Naa keeta enkanasa enkop nalala: ore te nkalo e moikuape intemat e nkaina iip are oo onom, ore te nkalo e kopikop naa intemat enkaina iip are o onom, ore tenkalo o loontoluo naa intemat enkaina iip are o onom.

¹⁸Ore ina adori natelekua ina natashare ine wueji sinyati naa keaku intemat enkaina inkalifuni tomon te nkalo oloosaen, naa intemat enkaina inkalifuni tomon te nkalo o loontoluo, naa keaku enatashare ina rubata sinyati. Ore ina naiu ninye naa keaku endaa e lelo aisiaayiak le nkanasa.

¹⁹Ore ilaisiaayiak le nkanasa, too loreren pooki le Israel, naa ketur ninye.

²⁰Ore ine wueji pooki ninteng'el naa keaku intemat e nkaina nkalifuni tikitam o imiet erisioro nkaloli pooki, aa taa, ina rubata nasinya tenebo nena tokitin naara ineina anasa.

²¹“Ore enaleku te pooki alo eina rubata sinyati o ina nara ene nkanasa naa keaku ino lkitok. Eiteru too ntemat enkaina inkalifuni tikitam o imiet eina rubata nasinya o meshomo olpolosie lo loosaen, neito oloontoluo eiteru too ntemat enkaina inkalifuni tikitam o imiet o meshomo olpolosie lo loontoluo, ine neshepita isashat oo loshon, naa keaku eneilo kitok. Ore inewueji sinyati tenebo ina aji sinyati Enkai natii empolos enye,

²²tenebo ina nara enoo le Lawi, tenebo ina nara ene nkanasa, naa keaku enatii empolos eina nara enoo lkitok. Ore erubata eilo kitok naa keaku enatii ilo polosie le Yuda olpolosie le Benchamen.

²³“Ore tenkaraki ilkulikae oshon: Eiteru te nkalo oloosaen o meshomo oloo ntoluo, naa Benchamen, erubata nabo.

²⁴Ore eiteru to lpolosie le nkop e Benchamen, eiteru te nkalo oloo saen o meshomo oloontoluo, naa Simion, erubata nabo.

²⁵Ore eiteru to lpolosie le nkop e Simion, eiteru te nkalo oloo saen o meshomo oloontoluo, naa Isaakar, erubata nabo.

²⁶Ore eiteru to lpolosie le nkop e Isaakar, eiteru te nkalo oloo saen o meshomo oloo ntoluo naa Sebulon, erubata nabo.

²⁷Ore eiteru to lpolosie le nkop e Sebulon, eiteru tenkalo oloo saen o meshomo oloo ntoluo naa Gad, erubata nabo.

²⁸Ore eiteru to lpolosie le nkop e Gad o meshomo kopikop, naa kepuku olpolosie te Tamar o meshomo nkariak e Meribatkadesh, aa keim enkiyopata ina shorro e Misiri o metijing'a enaiposha kitok.

²⁹Ore ena naa enkop nidung'oki metaa enjung'o tiatua iloshon le Israel, naa kuna ninche irubat enye ejo Olaitoriani Enkai.

³⁰“Keaku keetae ineepukunyeki enkanasa: Ore te nkalo e moikuape ina naaku intemat enkaina inkalifuni tikitam o ong'uan o iip imiet te ntemet, inchomito uni,

³¹e nkishomi e Ruben, e nkishomi e Yuda, o enkishomi e Lawi, ore nchomito enkanasa naa keipotieki iloshon le Israel.

³²Ore te nkalo oloosaen, ina naaku intemat enkaina inkalifuni oong'uan o iip imiet, naa inchomito uni, kishomi e Yosef, kishomi e Benchamen, o kishomi e Dan.

³³Ore te nkalo e kopikop, ina naaku intemat enkaina inkalifuni ong'uan o iip imiet te ntemet, naa inchomito uni, kishomi e Simion, kishomi e Isaakar, o kishomi e Sebulon.

³⁴Ore te nkalo oloo ntoluo ina naaku intemat enkaina inkalifuni ong'uan o iip imiet naa nchomito uni, kishomi e Gad, o kishomi e Asheri, o kishomi e Naftali.

³⁵Ore emanaroto e nkanasa naa keaku intemat enkaina inkalifuni tomon o isiet. Ore enkarna e nkanasa eiteru teina kata nelo dukuya naa keji, Etii Olaitoriani ine!”